ISAI 7 - Mara Bible RV (BSI)

Bei Ahâza châta Isai bietapa

¹ Uzia sawchapawpa Zôthâ sawchapawpa Zudâh bei Ahâza â beina daihti liata, Aramia bei Rezi nata Remâliah sawchapawpa Izarei bei Pekâ cha Zerusale a dyuh awpa ta khyhnao ei ta, châhrasala pahnie thei leipa ei ta.

² Aramia ta Epharai nata azaona a taopa kyh Dâvi pathlazy ama chho nahta, Ahâza nata a chyhsazy palôh cha lyurâhpa thokôzy thlih ta a chalyupa hawhta a chalyu ta.

³ Abeipa ta Isai hnohta “Na sawchapawpa Siazasubâ a chhi la, machhua tipo chhâna liata Chysia Pasutuhpa Lyu lâpi liata Ahâza a kaw tyh u la,

⁴ a hnohta, ‘Â vaih la, a thlih thlâh ha la, chi khah y. He meirei peih pachhupa khu ngâpa miano, Aramia bei Rezi nata Remâliah sawchapawpa hiehâhna ru ngaitapa vâta na palôh dua khah sy.

⁵ Aramia nata Epharai nata Remâliah sawchapawpa ta na chô liata hmo chhiepa tao a chhuahpa ta,

⁶ “Zudâh khyhnao sih la, kaw pachisa ei suh u. Keimo châta kaw pahnie sih la, Tâbi sawchapawpa cha, cha liata bei ta tao ei suh u,” ama tah.

⁷ Abeipa Zehôvâh ta hetana heta a tah: “‘Cha cha a duah leipa aw ta, Vaw tlô hra aw vei.

⁸ Aramia luh cha Dâmaskâ châ ta, Dâmaskâ luh cha Rezi a châ. Kô sycharu nata kô pangawh chhôh ta, Epharai cha phopi a châna parao khaipa a châ aw.

⁹ Epharai luh cha Samâri châ ta, Samâri luh cha Remâliah sawchapaw­pa a châ. Namâ ngiapâna â i vei khiahta la, Â ipa ta a duah thei aw veih ei chi,’ a tah,” tah ta.

Imanuel ngiana

¹⁰ Abeipa ta Ahâza hnohta,

¹¹ “Abeipa na Khazohpa tawhta ngiana hiah teh. Cha ngiana cha Athihkhih hawhta athupa tlyma, vârâh hawhta a sâhpa tlyma châ mawh sy,” tah heih ta.

¹² Châhrasala Ahâza ta, “Hiah aw va na, Abeipa pasia aw va na,” tah ta.

¹³ Chatawhcha Isai ta, “Hy Dâvi pathlazy saih u, tahmâ thei teh u! Chyhsa rie nama pathei ha tawhta cha a daih ha bâ vei ma, khazia ei Kha­zopa taihta a rie nama pathei tly?

¹⁴ Chavâta Abeipa tlai ta ngiana a cha pie aw ei. Pachâ teh u, laihsa kôpa ta saw phaoh aw ta, sawchapaw sa aw ta, a moh Imanuel a bi aw.

¹⁵ Hmo chhiepa dythapa ta hmo phapa atlyhna châh a pahno tita cha, sâhpiti kuapa nata kheihti a nie tyh aw.

¹⁶ Hawtipa ta hmo chhiepa dythapa ta hmo phapa atlyhna châh a pahno hlâ chhao ta, na chi kawpa bei panozy râh cha siesaipa a châ aw.

¹⁷ Epharai ta Zudâh a puasai noh tawhta a tlô beih leipa nohzy cha, Abeipa ta Asuria bei vaw tuah aw ta, na chô liata nata na phopi chô liata nata na paw chhôhkha chô liata a patlôsa aw,” tah ta.

¹⁸ Cha noh liata, Abeipa ta Izi chavahzy chhâna lâta mathyupa a ypa nata Asuria râh liata kheih a ypa zy cha a pahipa ta a aw aw ei.

¹⁹ A vy aw ei ta, saikao athupa liata zy, lôpanô keina khaoh liata zy, ahloh buh zydua chô liata nata ti yna zydua liata ama pahrâ aw.

²⁰ Cha noh liata, Ufrâti Chavah haosâ lâta Asuria bei tawhta â hlâpa chaidâh hmâpa ta, Abeipa ta nama sâ nata keih hmizy ngyu khai aw ta, nama kâhhmi chhao a ngyu khai aw.

²¹ Chatawhcha hetana heta a vaw châ aw. Cha noh liata chyhsa pakha ta viahchao zeinô pô kha nata mietaku pô no pasa aw ta,

²² sâhpiti hluhpi ama papua awpa vâta, sâhpiti kuapazy a nie tyh aw. Râh liata pahlôhpa zydua chhao sâhpiti kuapa nata kheihti ama nie tyh hra aw.

²³ Cha noh liata, sekel sâh kha mâpa kre zôh sâh kha y tyhna su zydua cha, diahsai nata ahloh su lâta amâ lie khai aw.

²⁴ Râh zydua cha diahsai nata ahloh ta a bie khai awpa vâta, chyhsa ta libaw nata châtaizy chabapa ta, cha su lâ cha a pangai aw.

²⁵ Tupi ta lyu thlyu tyhna tlâhthlôhzy lâ chhao, diahsai nata ahloh chipa vâta, sie khao aw veih ei chi. Viahchaozy pathliena nata mietakuzy tlaihna su lâta amâ lie ha aw.