ISAI 66 - Mara Bible RV (BSI)

Abeipa pachiana nata Zaio hnabeiseihna

¹ Abeipa ta hetana heta a tah: “Avâ cha ei beidyuchhai châ ta, Alei cha ei phei tlyna a châ. Kheihawhpa o ma eina sapa aw ei chi? Khataih liata ma ei pahâ nawpa su cha a y?

² He hmo zydua he keima ku ta tao ta, Chatanachata he hmo zydua he a vaw ypa a châ,” Abeipa ta a tah. “A panawhpa ta a palôh liata a ngiapachhi ta, Ei bie liata a chalyupa chyhsa lâta ei mo ei padeih aw,” Abeipa ta a tah.

³ “Âmo khopa lâpi a tlyh ei ta, Hmo pasichhihpazy taopa liata Ama hro a lypazy deikua cha, Viahchao tôhpa ta atheihna hlâ hra ei sala, Chyhsapa a thiepa hawhta châ ei ta; Mietakutaw ta atheihna hlâ hra ei sala, I rao a thliepa hawhta ama châ; Niepa hlâna hlâ hra ei sala, Vao thisaih a hlâpa hawhta châ ei ta, Atheithlâhna ropahâhpa hlâ hra ei sala, Khazoh nothlahpa a reithaipa hawhta ama châ.

⁴ Aw ei na ta, ahy hmahta na chhy leipa ei ta, Bie reih na ta, nathlie hra veih ei; Ei mohmô liata hmo pha leipa tao ei ta, Ei ly leipa hmo amâ tlyhpa vâta, Kei chhao ta ama chô liata chahrâh kawpa ta tao aw na ta, Ama chipazy ama chô liata ei patlôsa aw,” Abeipa ta a tah.

⁵ Nâmo, a bie liata a chalyu tyhpazy saih u, Abeipa bie he thei teh u: “Châ hao ei ta, Ei moh vâta châ papuatuhpa nama unawhzy ta, ‘Namâ lyna eima hmô thei nawpa ta, Abeipa cha parônahsapa ta y mawh sy,’ ama tah; Châhrasala âmo chaipa cha, Nozapa ta paysapa tlao ama châ aw.

⁶ “Khihpi liata tyhreihna pyu nathlie u la, Achhyna o tawhta pyu a vaw puapa nathlie tua u! Abeipa pyu châ ta, A chariahpazy viari a thôna pyu a châ chuh!”

Zerusale alykheina

⁷ “Zerusale cha nawh a zeih hmâ leipa ta saw sa ta, Sawzeih pasa tao hmâ leipa ta sawchapaw a sa.

⁸ Cha hawhpa cha ahy ma a thei beih tly? Cha hawhpazy cha ahy ma a hmô beih tly? Noh kha ta râh a pih aw ma? Ei kha ta phopi sapa ta a y aw ma? Zaio deikua cha nawh â zeihpa nahta, A sawzy thlai a sa pâ haw.

⁹ Nawh pina daihti taih a chhi ha tlôhpa ta, Saw pasasa leipa ta ei y aw ma?” Abeipa ta a tah. “Kei, saw a pasasa thei tuhpa heta Chhi ei khaw aw ma,” Na Khazohpa ta a tah.

¹⁰ “Nâmo, Zerusale kyh a pachâtuhpa zydua saih u, Zerusale cha thaphakhei u la, a lykhei teh u; Nâmo, Zerusale châta mâchhie a satuhpa zydua saih u, Zerusale â lyna liata a lykhei hra teh u.

¹¹ Chatanachata a thlapalôhna sâhpi pazy aw ei chi ta, Lôhrâtlôpa ta nama y aw. A sâhpi a thua ta a thlaoh ngâpa doh aw ei chi ta, Palôhtlâhpa ta nama y aw,” Abeipa ta a tah.

¹² Abeipa ta he hetana heta a tah: “Moh teh u, Zerusale chô liata Chavah hawhta thlalôhna palosa aw na ta; Vahtie kao a khô ngâpa hawhta, A chô liata râh rônahna ei palosa aw. A sâhpiti pazy aw ei chi ta, A chakhai ta cha phaoh aw ei ta, A pakhu liata pasuapalipa ta nama y aw.

¹³ A nô ta thlah a palôhpa saw hawhta, Thlah cha palôh aw ei na ta, Zerusale liata thlah ei cha palôh aw ei.

¹⁴ Cha cha hmô aw ei chi ta, Nama palôh a ly aw ta, Nama ruzy sibie hrohpa hawhta a laiseih aw. Chatanachata Abeipa ku cha, A chakaotuhpazy ta pahno aw ei ta, A chariahpazy chô liata a ruchhôna a palâsa aw.

¹⁵ “Moh teh u, a pathiiana lei thlupa ta, Meipaleih ta chhorei awpa ta, Abeipa cha mei chhaota vaw tlô aw ta, A talailihzy cha khisô hawhta a châ aw.

¹⁶ Abeipa ta mei ta pachia aw ta, A zaozi ta chyhsa zydua a pachia aw; Chavâta Abeipa ta a thiepazy cha, Ama hluh ngaita aw.

¹⁷ “Sadôzy liata a ngia awpa ta âmosasyh ta a hlâpa ta a pathaisa ei ta, vao sa nata pazu sa nata hmo pathaih leipa a niepazy hry liatapa a pazituhpazy cha, ama pazipa chyhsa nata â raohpa ta ama chhâ khoh aw,” Abeipa ta a tah.

¹⁸ “Ama hmotaopazy nata ama pachâpazy ei pahno. Râh to nata reih to ei chhipakhy nawpa daihti a vaw tlô hai. A vy aw ei ta, ei rônahna ama hmô aw.

¹⁹ Ama hry liata ngiana soh aw na ta, ahrohpazy cha âmo tawhta râhzy lâta tuah aw ei na ta, libaw a chabapa Tâsi, Puli nata Ludi lâzy tuah aw ei na ta, tilaipi kiah râh hlapi liata a ypa, ei mohpathâhna a thei beih leipa nata ei rônahna a hmô beih leipa Tubâ nata Zavâ mozy lâ ei tuah aw ei. Chatanachata râhzy liata ei rônahna ama phuah aw.

²⁰ Nama unawhpa zydua cha, Abeipa lâta hmohlâpa châta râh to tawhta a vaw chhi aw ei ta, arâzy, talailihzy, asynazy, sabaituzy, râraoseihpazy kiapa ta ei tlâh pathaihpa Zerusale lâ amâ vaw chhi aw,” Abeipa ta a tah. “Izarei sawzy ta hmobaoh pathaihpa ta Abeipa o lâ niepa hlâna ama vaw cheipa hawhta, nama unawhzy cha Abeipa lâta hmohlâpa châta amâ vaw chhi aw.

²¹ Ama hry liata thokha cha theihthaipa châta nata Livai chyhsa châ zy ta ei la aw ei,” Abeipa ta a tah.

²² “Avâ thiehpa nata alei thiehpa ei taopazy cha, Ei hmiakô liata khâ ama y thlâh ha awpa hawhta, Nama pathlazy nata nama moh chhao khâ a y thlâh ha aw,” Abeipa ta a tah.

²³ “Ei hmiakô liata nâ chhy awpa ta, Thla thiehpa maihta chyhsa zydua a vy aw ei ta, Pahânoh maihta amâ vy aw,” Abeipa ta a tah.

²⁴ “Pua aw ei ta, nâ dyuhtuhpazy ri ama moh tyh aw. Ama lôpazy thi leipa aw ta, ama mei pachhaipa châ hra leipa aw ta, chyhsa zydua châta hmo pasichhih ngaitapa ama châ aw,” Abeipa ta a tah.