ISAI 65 - Mara Bible RV (BSI)

Pachiana nata pachhana

¹ Nâ pado leipazy ta eina tlua awpa ei ta A mâ thlâh ha na ta, Nâ tlua leipazy ta eina hmô awpa ei ta Ei mâ thlâh haw. Ei moh a phaoh leipa phopi hnohta chhao, “He liata ei y, he liata ei y,” ei tah tyh.

² Âmo pachânazy zi ei ta, Lâpi pha leipa a chhihpa chhorupazy lâta Noh y ta ei ku ei pazawh tyh.

³ Âmo cha sadôzy liata atheihnazy hlâ ei ta, Leiraopazy chô liata ropahâhpazy raopa ta, Hmiadaisâ ta ei hie nâ pahâh tyhpa phopi ama châ.

⁴ Thlâzy liata a tyuh ei ta, Su dâhthlohpazy liata amâ rie tyh; Vao sa zy nie ei ta, Ama beihzy liata sa pathaih leipazy yna chôta,

⁵ “Â hlapa liata a duah teh, Nâ vaw hnia kha, Nâma hlâta ei pathaih via,” A tah tyhpazy ama châ. Ei hnapasu liata meikhuh châ ei ta, Noh y ta mei a iapa ama châ.

⁶ Moh teh u, he bie he ei hmiakô liata ropa ta a y: “A chalih thlâh ha leipa aw na ta, Viari thô aw na ta, Ama kalachhôh lia tlai ta viari ei thô aw.

⁷ Nama paraonazy viari cha thô aw ei na ta, Châ pathlatuhpazy paraona viari chhao ei cha thô aw ei,” Abeipa ta a tah. “Tlâhpizy liata ropahâhpazy rao ei ta, Tlâhthlôhzy liata eina reipachhiepa vâ ei ta, Ama hmotao parohpazy kha, Ama kalachhôh liata ei panuapa aw ei,” Abeipa ta a tah.

⁸ Abeipa ta hetana heta a tah: “Kresawhti thiehpa cha kre sao liata y ta, ‘Parao khah u, byhnâ a hnei khawh,’ ama tahpa hawhta; Nâ chakaotuhpazy vâta, He hmo he tao aw na ta, Pahleipadia khai aw veih ei na.

⁹ Zakaw tawhta chipathlazy papua aw na ta, Zudâh tawhta ei tlâhzy a to awpa ei papua aw. Ei tlyhpazy ta tlâhzy cha to aw ei ta, Nâ chakaotuhpazy ta cha liata ama pahrâ aw.

¹⁰ Saraw bypi cha, Nâ tluatuhpa ei phopi châta Mietaku zawzy tlaihna châ aw ta, Akhaw Saikao chhao, Viahchao hrizy abyuna su a châ aw.

¹¹ “Nâmo, Abeipa siesaipa ta, Ei tlâh pathaihpa my ei chi ta, Vâphana châta tlâhkhai a chhuahdypa ta, Tovyuh châta nyu liata Kresawhti ropahâhpa a patlai tyhpazy deikua cha,

¹² Ei cha aw no ei ta nâ chhy leipa ei chi ta, Bie ei rei nota chhao nathlie leipa ei chi ta, Ei mohmô liata hmo pha leipa taopa ta, Ei ly leipa hmozy namâ tlyhpa vâta, Nama tovyuh châta zaozi cha raopa aw ei na ta, Nama zydua ta thietuhpa hmia liata namâ bôh aw.”

¹³ Chavâta Abeipa Zehôvâh ta hetana heta a tah: “Pachâ teh u, nâ chakaotuhpazy cha nie aw ei ta, Nâmo deikua cha nodipa ta nama y aw; Nâ chakaotuhpazy cha doh aw ei ta, Nâmo deikua cha dâhphipa ta nama y aw; Nâ chakaotuhpazy cha a ly aw ei ta, Nâmo deikua cha nozapa ta nama y aw;

¹⁴ Nâ chakaotuhpazy cha palôh tlâhna hla sa aw ei ta, Nâmo deikua cha palôh pasapa ta cha aw ei chi ta, Thlahpa rietheipa ta namâ hrô aw.

¹⁵ Nama moh cha ei tlyhpazy chô liata Chhiesana châta siesai aw ei chi ta, Abeipa Zehôvâh ta a cha thie aw ei. A chakaotuhpazy deikua cha, Moh hropa a bie aw ei.

¹⁶ Kha hlâta nôponazy kha mypa châ ha ta, Ei mo tawhta nyupa a châ hapa vâta, Alei liata anosasyh ta byhnâ â awpa cha, Biehmeiseihpa Khazohpa ta byhnâ pie aw ta, Alei liata bietai a taopa cha, Biehmeiseihpa Khazohpa liata bietai a taopa a châ aw.”

Avâ thiehpa nata alei thiehpa

¹⁷ “Moh teh u, avâ thiehpa nata alei thiehpa tao na ta, Hmo parohpazy kha a thei thlâh hapa châ khao aw vei; Palôh liata chhao a ngia khao aw vei.

¹⁸ Châhrasala hmo ei taopazy liana heta Thaphapa nata alypa ta khâ y teh u. Moh teh u, Zerusale cha alyna châta tao na ta, A khihsawzy chhao thaphana châta ei tao.

¹⁹ Zerusale chô liata a ly aw na ta, Ei phopi chô liata ei tha a pha aw. Cha liata chana pyu theipa châ khao leipa aw ta, Nôpopa ta a awhpa pyu chhao theipa châ khao aw vei.

²⁰ Cha liata hawsaih thina y khao leipa aw ta, Chhâ a palo leipa ta a thipa y khao aw veih ei. Kô za kha ta a thipa cha, Thyutlia daihti ta a thipa hawhta pachâpa châ aw ta; Kô za kha a tlô leipa cha, Chhiesa thlupa moleipa hawhta pachâpa a châ aw.

²¹ Ozy sapa ta tlôh aw ei ta, Kre sadôzy tao aw ei ta, A theizy ama nie aw.

²² Mohropa tlô awpa ta o sa khao leipa aw ei ta, Mohropa nie awpa ta chi cheih khao aw veih ei. Thokô hro chhôh nohzy hawhta, Ei phopi hro chhôh nohzy cha pasi aw ta; Ei tlyhpazy chhao, Ama ku raihria thei bohpi ama nie aw.

²³ Hraoleipa ta hriapasa khao leipa aw ei ta, Chhiena a tyh awpa sawzy sa khao aw veih ei. Abeipa byhnâ piepa sawzy châ aw ei ta, Ama pathlazy chhao, Abeipa byhnâ piepa ama châ aw.

²⁴ Eina aw hlâ ei ta chhy aw ei na ta, Bie ama rei hai nota ei thei aw ei.

²⁵ Changie nata mietakutaw zy Hmaohkha ta ama tlaih aw; Chakeibarôhneipa cha, Viahchao tôhpa hawhta sâhkô bâ aw ta, Dohlei cha parih pati a châ aw. Ei tlâh pathaihpa liata cha, A pasasa khao leipa aw ei ta, A parao khao aw veih ei,” Abeipa ta a tah.