ISAI 60 - Mara Bible RV (BSI)

Zerusale thiehpa rônahna

¹ Hy Zerusale, thyu la, khaih teh; Na khaihna vaw tlô ha ta, Abeipa rônahna na chô liata a vaw khaih haw.

² Pachâ teh, zohna ta alei he khu aw ta, Zoh kaluhna ta phopizy a khu aw. Nâma chô liata deikua cha, Abeipa noh vaw chhi aw ta, A rônahna na chô liata â lâ aw.

³ Phopizy na khaihna lâ a vy aw ei ta, Beizy na nohchhi khaihpa lâ amâ vy aw.

⁴ Na chheipâh zydua mohmia pasaih la, moh tua, Na chyhsa zydua a hmaoh ei ta nâ lâ amâ vy. Na sawchapawzy lâhlapi tawhta a vy aw ei ta, Na sawchanôzy chhao vaw pi aw ei ta, Ama vaw tlô hra aw.

⁵ Tilaipi hneirônazy nâ lâ vaw tlô aw ei ta, Râhzy liata sôh nata thihzy nâ lâ amâ vy aw. Chazy cha moh aw chi ta, Na hmia a kai kaw aw; Na palôh thapha aw ta, Nâ ly ngaita aw.

⁶ Râraoseihpa hluh ngaitapazy ta Cha pahly aw ei ta; Midia nata Epha liata râraoseihpa lochopazy ta Ama cha pahly aw; Sebâ râraoseihpa zydua vaw tlô khai aw ei ta, Ngôh nata deiryh zy vaw phaopa ta, Abeipa reithaina thâtihpha ama vaw tlôkhei aw.

⁷ Kedâ mietaku zawzy nâ lâ a vaw hmaoh aw ei ta, Nebaiô mietaku tôhpazy ­ta ama cha chakao aw. Ei maisâh liata hlâ awpa châta a pyh tlâhpa châ aw ei ta, Ei o rônahpa cha ei parônahsa via rili aw.

⁸ Meihdo hawhta a zaw ei ta, Vachhuh hawhta ama bu lâ a pangaipazy he, Ahyzy ma ama châ tly?

⁹ Na sawchapawzy lâhlapi tawhta a vaw chhipa ta, Ama tâkâ nata ngôh chhaota a vaw chhi awpa ta, Tilaipi kiah râhzy ta na hâ ei ta, A vaw tlô tua awpa Tâsi balyhzy ama hâ thlâh haw. Abeipa ta a cha parônahsapa vâta, He hmo he Abeipa na Khazohpa moh châta taopa châ aw ta, Izarei Mo Pathaihpa châta taopa a châ aw.

¹⁰ Chihropazy ta na thokhyzy paduapathi aw ei ta, Ama beizy ta ama cha chakao aw. Ei hiehâhpa ta cha tu ei na ta, Châhrasala ei khokheina ta ei cha ngiachhie heih ei.

¹¹ Râhzy tawhta sôh nata thihzy vaw phaoh ei sala, Ama beizy ta hmia amâ vaw sah thei nawpa ta, Na thokhy ochhizy cha, Khâ pahypa châ bâ aw ta, Chhô nah zâ ta khaw khao aw veih ei.

¹² Châ chakao khoh leipa Phopi nata khinarâh cha a leidia aw; Cha phopizy cha, Tlokhuh pahleipadia khaipa a châ aw.

¹³ Ei supathaihpa tobi nawpa ta, Lebanaw rônahna nâ lâ a vaw tlô aw; Meisah vyhpa nâ lâ vaw tlô aw ta, Tho hna phiapa nata meisah thozy nâ lâ ama vaw tlô aw; Chatanachata ei phei tlyna su cha, Rônahpa ta ei tao aw.

¹⁴ Pasa châ pataosatuhpa sawchapawzy cha, A bôhpa ta nâ lâ a vy aw ei ta; Châ mohnaotuhpa zydua chhao, Na phei thaby liata amâ bôh aw. “Abeipa Khihpi” cha tah aw ei ta, “Izarei Mo Pathaihpa Zaio Khihpi” ama cha tah aw.

¹⁵ Pathluapa nata a haopa châ chi ta, Châ chapia chahreihpa chhao ama y khao leipa kha, Chhâzaw ta a palaikheipa ta cha tao aw na ta, Kôzaw ta alyna ta ei cha tao aw.

¹⁶ Phopizy sâhpiti pazy aw chi ta, Beizy sâhpi nâ ngieh aw. Chatanachata kei he Abeipa châ na ta, Châ Pachhatuhpa ei châpa na pahno aw; Châ Chatlaituhpa châ na ta, Zakaw Thatlôpa ei châpa na pahno aw.

¹⁷ Dawh vyuhpa ta ngôh vaw phaoh aw na ta, Thua vyuhpa ta tâkâ ei vaw phaoh aw. Tho vyuhpa ta dawh vaw phaoh aw na ta, Alô vyuhpa ta thua ei vaw phaoh aw. Thlalôhna cha, Châ vaotuhpa ta tao aw na ta; Siana cha, Na chô liata ryureituhpa ta ei tao aw.

¹⁸ Thachahra hmâna pyu cha, Na râh liata thei khao leipa aw chi ta; Chhiena nata raona zy chhao, Na râhri chhôh liata thei khao aw va chi. Na thokhy cha Pachhana tah aw chi ta, Na thokhy chhikaozy cha Reithaina na tah aw.

¹⁹ Noh cha nohchhô ta na châta khaihna châ khao leipa aw ta, Thlâpâ chhao zâ ta na châta khaihna châ khao aw vei. Abeipa cha na châta tlyzaw khaihna châ aw ta, Na Khazohpa cha na rônahna a châ aw.

²⁰ Na noh tla khao leipa aw ta, Na thlâpâ lei khao aw vei. Abeipa cha na châta tlyzaw khaihna châ aw ta, Na mâchhiesana nohzy a chhâ bâ aw.

²¹ Na phopi cha ama zydua ta mosiapa châ khai aw ei ta, Râh cha tlyzaw ta ama hnei aw. Palyupalihpa ta ei y thei nawpa ta, Âmo cha chhyh thao awpa ta loh ei na ta, Ei ku raihriazy ama châ.

²² A nawh chaipa cha, Pho ta a duah aw ta; A chyh chaipa chhao, Phopi thatlôpa a vaw châ aw. Kei he Abeipa châ na ta, He hmo he a daihtita liata thlai ei tao aw.