ISAI 57 - Mara Bible RV (BSI)

Izarei ta nothlahpa â chhy

¹ Mosiapa leidia ta, A pachâ muaruapa y leipa ei ta; Khazohpa a pachâpazy lapa châ ei ta, A chhâpa a pahnopa y veih ei. Mosiapa cha chhiena a vaw tlô awpa tawhta lapa châ ta,

² Thlalôhna liata â ngia hapa tlao a châ. Â dopa ta a hrohpazy cha, Ama rakhô liata thlalôhpa ta amâ zia tyh.

³ Nâmo, dyuthainô sawchapawzy deikua cha, A vaw hnia u la; Nâmo, apheinô nata sihryhnô chipathlazy A vaw hnia teh u.

⁴ Ahy ma saisona ta nama hmâ tly? Ahy ma nama pakah pakawh thlu ei chi ta, Nama paleih nama pachhao chie tly? Nâmo palie kha moleina sawzy châ ei chi ta, Dôveina chipathlazy tlao châ veih ei chi ma?

⁵ Ôkâ thozy hry liata a patla ei chi ta, Tho hrohpa to ry liata Aohraohna ta a kâ tyhpazy châ veih ei chi ma? Saikaozy nata lôpanô keipazy chhôh liata nama sawzy thie ei chi ta, Atheihna ta a hlâ tyhpazy kha châ veih ei chi ma?

⁶ Saikao alô mihpazy hry tawhta Na khazoh ta na tao awpazy a tlyh chi ta, Chazy tlai cha nâ chhy tyh. Chazy lâta dopa hlâna patlai chi ta, Niepa hlâna na hlâ tyh. Cha hmozy chata ei palôh eina patlâh aw ma?

⁷ Tlâh sâhpa nata tlâh laki liata na rakhô soh chi ta, Cha liata atheihna hlâ awpa ta na khy tyh.

⁸ Ochhi nata ochhi tôh hnôhkyzy liata chhao, Nothlahpa achhyna ngiana hmozy na soh ei. Na aohraohna lôhrâ patlô nawpa ta, Kei na pathluapa ta, Âmo nata biehrai na tao; Na rakhô pakawh chi ta, Na rakhô kiakhei chi ta nâ ziakhei tyh ei.

⁹ Sathaw chhaota abei lâ pangai chi ta, Na ropahâhpazy thata na papôh. Na lyuhchâpazy lâhlapi lâ tuah chi ta, Athihkhih lâ taihta na tuah ei.

¹⁰ Na siena lâpi pasipa vâta, Na tha chhâ kaw hra sala, “Hnabeiseihna rai y vei,” Tah va chi; Thatlôna thiehpa hmô chi ta, Chavâta panao va chi.

¹¹ Ahy ma chi chi ta, Ahy nâ ngiarohpa vâta ma, Haipa bie reih chi ta; Kei nâ thei khao leipa chi ta, Na palôh liata eina so khao vei chi tly? A chalih thlâh ha na ta, Bohpi ei chalih thlâh hapa vâta, Eina chi leipa chi châ vei ma?

¹² Na siana kyh phuahpa ta, Na hmotaopazy reih hraw sah la, Na châta phahnai hlei aw vei.

¹³ Baona hiapa ta na aw tita, Nothlahpa na sopakhypazy ta Cha pachha mawh ei sy. Châhrasala âmo cha thlih ta cheih aw ei ta, Ei kha hu sopa ta a phaoh pathlah khai aw ei. Keima nâ chhaipa deikua cha râh ryu to aw ta, Ei tlâh pathaihpa ryu a to aw.

Angiapachhipa châta thlalôhna

¹⁴ Abeipa ta hetana heta a tah: “Padua u la, padua u la, Lâpi a chhuahdy teh u; Ei phopi lâpi liata Pakhâpadiena a ypazy thy khai teh u.”

¹⁵ Moh chônôpa nata cheihchalopa ta hetana heta tah ta, Tlyzaw ta a ypa, a moh Pathaihpa bipa ta hetana heta a tah: “Areisipazy thlahpa pahra ta, Angiapachhipazy palôh pahra awpa ta, Kei he su sâhpa nata su pathaihpa liata pahrâ na ta, Angiapachhipa nata areisipazy hnohta ei pahrâ.

¹⁶ Chhâzaw ta a dyuh leipa aw ei na ta, Ei pathi khâ ia aw vei. Chataleipatala thlahpa cha, Ei hmiakô lia tlai ta panao aw ta; Keima tlai ta ei taopa hrona hu chhao, A panao pathlei aw na.

¹⁷ Â do leipa ta athôhna a hmôpa vâta, Hiehâhpa ta tu na ta; Hiehâhpa ta ei hmia ei nyusai ha aw. Chatanachôta ano palôh khopa lâ sie ta, Chhorupa ta a y lymâ.

¹⁸ A hroziezy hmô na ta, Châhrasala ei patlâh pyly aw. Ano cha a chhi aw na ta, Thlalôhna ei pie heih aw; Ano châta mâchhie a sapazy chhao, Thlalôhna ei pie heih aw.

¹⁹ Ama hmao liata reithaina ei paysa aw. Lâhla lâhnia liata a ypazy chô liata thlalôhna y sala, Thlalôhna y mawh sy,” Abeipa ta a tah. “Ano cha ei patlâh aw.

²⁰ Moleipazy deikua cha, Tilaipi a chatlaopa hawhta châ ei ta, A chalih beih veih ei; Ama tizy ta apuapa papua ei ta, Chiatlao zy ama papua tyh.

²¹ Moleipazy châta la, Thlalôhna rai y vei,” Ei Khazohpa ta a tah.