ISAI 52 - Mara Bible RV (BSI)

Zaio pachhana hla

¹ Hy Zaio, a hra la, a hra la, Na thatlôna ta a tobi mah y; Hy Zerusale, khihpi pathaihpa, Na chysia a ngiapazy ta a tobi mah y. Tahmâ tawhta cha, Chopawtaileipa nata pathaih leipazy Na chhôh liata a ngia khao aw veih ei.

² Hy Zerusale, thyu la, Dohlei châ baipa kha chatho la, Na beidyuchhai liata a tyuh teh! Hy Zaio sawchanô sei ta a tâhpa y, Na rao liata bâlia nâ kypazy kha pathlâ mah y.

³ Abeipa ta hetana heta a tah: “Mâ hnei leipa ta zuapa châ ei chi ta, Sôh leipa ta chatlaipa nama châ aw.”

⁴ Abeipa Zehôvâh ta hetana heta a tah: “Ei phopi cha Izi râh liata pahrâ awpa ta zu tua ei ta, Châhrasala hnôhlâ ta Asuria mo ta âmo cha tlybai ei ta, A ty pie leipa ta ama sôhzy ama chhu khai haw.

⁵ Chavâta tahmâ Babylaw liana he khâpa ei hnei khao tly?” Abeipa ta a tah. “Ei phopi cha a ty leipa ta siekheipa châ ei ta, Ama chô liata ryureituhpazy ta amâ hrâhhnao tyh,” Abeipa ta a tah. “Noh y ta ei moh reipachhie ei ta, Â zaopa ta ei moh ama reipachhie.

⁶ Chavâta ei phopi ta ei moh pahno aw ei ta, Bie a reihtuhpa kha keima ei châzie Cha noh liata ama pahno aw. Keima tlai he ei châ,” Abeipa ta a tah.

⁷ Thlalôhna bie phuahpa ta, Lôtlâhna bie vaw tlôkhei ta, Zaio pachhana phuahpa ta, Zaio hnohta, “Na Khazohpa ta ryu a reih,” a tahtuhpa, Tlâhzy liata thâtihpha a vaw tlôkheituhpa phei cha, Â ngia ngaita kaw dia!

⁸ Na riahvaituhpazy ama ao papua ei ta, Â raohpa ta alyna hla ama sa. Zaio lâ Abeipa a vaw kua tita, Hmiachhy ta ama hmô aw.

⁹ Hy Zerusale su rypazy saih u, Hmaohkha ta ly hla paryh teh u, Abeipa ta a phopi thlapalôh ha ta, Zerusale a chatlai haw.

¹⁰ Abeipa ta râh zydua mohmô liata A bâh pathaihpa chaluah ha ta, Khizaw kaokih zydua ta Eima Khazohpa pachhana cha ama hmô aw.

¹¹ Pua teh u, pua teh u, Sei ta namâ tâhna su tawhta pua u la, Hmo pathaih leipa rai hria khah u. Nâmo, Abeipa hmobaoh a chabatuhpazy saih u, Babylaw tawhta pua u la, a pathai teh u.

¹² Abeipa ta hmia châ sahpa aw ei ta, Izarei Khazohpa ta nama hnôh lâ a cha vaih awpa vâ ei ta, A para kawpa ta pua awpa byuh leipa ta, A râ awpa byuh aw vei.

Abeipa chakaotuhpa pasataona

¹³ Pachâ teh u, nâ chakaotuhpa cha, So kawpa ta hmo a tao aw; Palyupalihpa nata pasâhsapa ta y aw ta, Cheihchalopa ta a y aw.

¹⁴ Ano ama hmô nahta, Chyhsa hluhpi ta noâh ama tahpa hawh tlai ta, A hmisâ rao khai ha ta, Chyhsapa hmi chhao lyu khao vei; A pizie chhao, Chyhsa sawzy pizie lyu khao vei.

¹⁵ Râh hluhpizy cha, A thisaih thiapa ta pathaisa aw ta; Ano vâta beizy hmaomopa ta ama y aw. Rei beih leipa hmozy hmô aw ei ta, Thei beih leipa hmozy ama pahno thai aw.