ISAI 5 - Mara Bible RV (BSI)

Abeipa kre sadô

¹ Ei kyhpachâpa châta hla sa aw na ta, Ei kyhpachâpa kre sadô hla ei sa aw: Tlâhthlôh lei pha kawpa liata, Ei kyhpachâpa ta kre sadô hnei ta.

² Alei chhiah ta, alôzy thypa ta, Kre zôh pha chaipa loh ta; A liah liata vaina o sâhpa sa ta, Cha liata kre saohna khaoh a chao. Kre thei pha pathei awpa ta mokhâh ta, Châhrasala kre sihpa tlao a pathei.

³ Hy Zerusale khihsawzy nata Zudâh chyhsazy saih u, Tahmâ kei nata ei kre sadô likah miah pachia teh u.

⁴ Ei tao hapazy hleikhô ta, Ei kre sadô châta tao via awpa a y khao ma? Kre thei phapa pathei awpa ei mokhâh hai nota, Khazia ma kre sihpa a pathei thlâh ha tly i?

⁵ Chavâta ei kre sadô chô liata ei tao awpa Tahmâ ei cha chho aw ei. A diahpai phie aw na ta, Nie khaipa ta a y aw. A diahsua parao aw na ta, Tlypâpa ta a y aw.

⁶ Sadô rypa ta tao aw na ta, A chiahzy taipa châ khao leipa aw ta, A lyu thlyupa châ khao hra leipa aw ta, Diahsai nata ahlohzy tlao a pyu awh. Sadô chô liata avâ suah lei awpa ta, Meihdozy chhao bie ei pie ha aw ei.

⁷ Pheisaihzy Abeipa kre sadô cha, Izarei pathlazy he châ ta; Zudâh chyhsazy he, A chichei khochhihpazy cha ama châ. Adona mokhâh ta, Châhrasala moh teh u, thisaih palona tlao a hmô. Siana mokhâh ta, Châhrasala moh teh u, chana pyu tlao a thei.

Moleipazy hupona

⁸ Râh ruapa y khao leina taihta, O nata o pazao ta, Râh nata râh a pazaopazy cha Ama hu a po na! Râh liah khophie liata Âmo dei ta ama pahrâ.

⁹ Pheisaihzy Abeipa ta ei nah theina liata hetana heta a tah: “O rônahpazy cha roryhrapa ta y tlai aw ei ta, O laipa nata o ngiapazy chhao pahrâtuhpa hnei khao aw vei.

¹⁰ Kre sadô bai hrawh lyu liata beihrai kha ngâlâh veih aw ta, Sâh chi bai kha tu liata kachu kha ngâlâh a veih aw.”

¹¹ Mydi kari ta thyupa ta sahma do awpa ta a râ ei ta, Zâcho taihta kresawhti paripa ta a ypazy cha Ama hu a po na!

¹² Ama kyhchhizy liata kresawhti doh ei ta, Totâ, tlaipih, paotlâ nata siaramo zy tôpa ta a ly ei ta, Abeipa hmotaopazy deikua cha pachâ veih ei, A ku raihriazy chhao hmô veih ei.

¹³ Chavâta ei phopi cha pahnona amâ phahlapa vâta sei ta a chhipa ta y ei ta, Ama chyhsa zachhihpazy nodipa ta thi ei ta, Ama zawpizy dâhphipa ta ama thi.

¹⁴ Chavâta Athihkhih ta a laopalâna pakawhpa ta, A pakah kawhna zie thlie thei lei awpa ta a pakah a â. Zerusale beimachâzy nata zawpizy Athihkhih lâ zu aw ei ta, Sahma sâtlâh paziahpa ta, Khihpi liata a ly kaw tyhpazy chhao, Athihkhih lâ ama zu aw.

¹⁵ Chyhsapa cha panawhpa ta y tyh ta, Chyhsa to pahnaipa ama châ tyh; Ama mo a sâhpazy cha, Pahnaipa ama châ tyh.

¹⁶ Pheisaih Abeipa deikua cha, A ryureina dopa vâta cheihchalopa ta y aw ta; Khazohpa Pathaihpa cha, A siana hmotaopazy liata a pathaihna pasiapa a châ aw.

¹⁷ Mietakutawzy ta khihpi rypazy cha ama lao bâna su châta hmâh aw ei ta, Chihropazy ta hneirôhpazy siesaipa ama nie aw.

¹⁸ Adoleina khawhhrizy ta paraona a daophi laih ei ta, Talailih chaorizy a daophipa hawhta moleina a daophipazy cha, Ama hu a po na!

¹⁹ “Eima hmô thei nawpa ta, A para sala, A tao awpa cha a chatliepa ta tao mawh sy. Eima pahno thei nawpa ta, Izarei Pathaihpa ryhraona cha a vaw hnia sala vaw tlô mawh sy!” A tahtuhpazy cha ama hu a po na!

²⁰ Hmo chhiepa cha hmo phapa tah ta, Hmo phapa cha hmo chhiepa a tahpa zy; Khaihna cha zohna ta rao ta, Zohna cha khaihna ta a raopa zy; Akhapa cha athlôhpa ta rao ta, Athlôhpa cha akhapa ta a raopazy cha, Ama hu a po na!

²¹ Âmo mo liata â pasosa kaw ei ta, Âmo mohmô liata thai â tah kawpazy cha, Ama hu a po na!

²² Kresawhti dona liata ama riahpha kaw ta, Sahma thatlôpa pahlaona liata pasaipha kawpazy cha, Ama hu a po na!

²³ Panaopapana lapa ta, Thailei a châpa thai pachâ ei ta, Thai a châpa cha thailei ama pachâsa tyh.

²⁴ Chavâta mei ta sâhkô chuahmi charôh ta, Meipaleih vâta sibie raohpa â chahkaopa hawhta, Ama thari hmy aw ta, Ama paw chhao doh hawhta â zaw aw; Pheisaihzy Abeipa ryhpa dytha ei ta, Izarei Mo Pathaihpa bie ama mohnaopa vâta.

²⁵ Chavâta Abeipa pathi cha a phopi chô liata ia ta, Ama chô liata a ku hy ta a tu ha ei. Tlâhpizy a chalyu ta, Ama rizy cha hnaihny hawhta Lâlaizy liata amâ thy hôlô. Cha zydua cha a tao hapa chhao ta, A hiehâhna pai to leipa ta, A ku a hy ngâ thlâh ha chy.

²⁶ Râh hlapazy lâta ngiana poh chaluahpa ta, Khizaw kaokih zydua a pahipa ta aw aw ta; Moh teh u, a para aw ei ta, A chatliepa ta amâ vy aw.

²⁷ Thachhâpa y leipa aw ei ta, Achapiapa y aw veih ei. Tla-uahpa y leipa aw ei ta, Amôpa y aw veih ei. Ama chaisaih a hua tlâ leipa aw ta, Ama pheiky ri chie tlâ aw vei.

²⁸ Ama châtaizy tiah kaw ta, Ama libaw zydua a kei chiehpa ta y ta, Ama arâ chakiezy cha pachielô lyu ta, Ama talailih tiakizy cha khisô a lyu.

²⁹ Amâ rôhpa pyu chakeibarôhneipa a rôhpa pyu lyu ta, Chakeibarôhneipa lochopazy hawhta amâ rôh. Siechahnuapa ta sa tai aw ei ta, Siekhei aw ei ta, a pachha thei awpa y veih ei.

³⁰ Cha noh liata, tilaipi a rôhpa hawhta, Izarei chô liata amâ rôh aw. Chyhsa ta râh a sai khiahta cha, Zohna nata nôpona sai hmô aw ta, Khaihna cha meihdozy vâta a zoh ha aw.