ISAI 49 - Mara Bible RV (BSI)

Abeipa chakaotuhpa

¹ Hy tilaipi kiah râhzy saih u, Na nathlie u la; Nâmo, lâhlapi liata phopizy saih u, Nama nah pachôh teh u. Abeipa ta chhi tawhta na aw ta, Ei nô py chhôh tawhta ei moh eina bi.

² Ei pakah he zaozi tiahpa hawhta tao ta, A ku nohpahli ry liata eina nyu; Châtai patliepa ta na tao ta, A châtai byh liata eina khô.

³ Ei hnohta, “Hy Izarei, nâ cha nâ chakaotuhpa châ chi ta, Palyupalihpa ta ei y nawpa na châ,” tah ta.

⁴ Châhrasala kei ta hetana heta ei chhy: “Hraoleipa ta hriapasapa ta, Khâpa hmah a châ leipa liata ei tha pahryuh na ta, Aruapa liata ei tha ei pahryuh; Chatahrasala ei dona cha Abeipa liata y ta, Ei lymâ chhao ei Khazohpa liata a y.”

⁵ Abeipa mohmô liata palyupalihpa ta y na ta, Ei Khazohpa cha ei thatlôna a vaw châ hapa vâta, Ano lâta Zakaw a chhi pakhua heih ta, A hnohta Izarei pahmaoh heihna raihria liata A chakaotuhpa châ awpa ta, Chhi tawhta nâ paduatuhpa, Abeipa ta hetana heta a tah:

⁶ “Zakaw chizy paduapathi ta, Izarei saw pahlôhpazy a vaw chhi pakhua awpa ta, Nâ chakaotuhpa na châ awpa cha, Hmo chyhpata mah a châ tâh. Râhzy pakhaihsatuhpa ta cha tao aw na ta, Ei pachhana cha, Khizaw kaokih taihta patlôsapa a châ aw.”

⁷ Mohnao ngaitapa nata Babylaw râh ta a pasi kawpa, Ryureituhpazy chakaotuhpa Izarei phopi hnohta, Abeipa, Izarei Chatlaituhpa ta hetana heta tah ta, Izarei Mo Pathaihpa ta hetana heta a tah: “Abeipa ngâchhihpa vâta, Châ tlyhtuhpa Izarei Mo Pathaihpa vâta, Beizy ta a cha hmô ti ei ta a duah aw ei ta, Beimachâzy na hmiakô liata amâ bôh aw.”

Zaio paduapathina

⁸ Abeipa ta hetana heta a tah: “Khokheina daihti liata châ chhy na ta, Pachhana noh liata ei cha bao. Râh paduapathi ta, Roryhrapa ta a y hapa ryuto râhzy rai awpa ta, Biehrai phopi châta cha tao na ta, ei cha rao.

⁹ Chatanachata atâhpazy hnohta, ‘Pua teh u,’ tah aw ei chi ta, Zohna liata a ypazy hnohta, ‘A vaw luah teh u,’ nama tah aw. Lâpizy liata ama lao bâ aw ei ta, Aw tlâhzy cha ama tlaihna a châ aw.

¹⁰ Ama nodi leipa aw ta, Ama dâh phi aw vei; Thlih lalôhpa ta âmo cha pathli thlu leipa aw ta, Noh lopa ta âmo vawh aw vei. Âmo ngiachhietuhpa ta chhihtha aw ei ta, Tihnawh kiapâh liata â chhi laih aw ei.

¹¹ “Ei tlâhpi zydua cha lâpi ta tao aw na ta, Ei lâlaizy pasâhpa a châ aw.

¹² Moh teh u, lâhlapi tawhta ei phopi amâ vy huh; Maw lâ tawhta a vy ei ta, Notla lâ tawhta a vy ei ta, Sini mo râh tawhta amâ vy.”

¹³ Hy avâzy saih u, thaphapa ta hla sa u la, Hy leilô y, a lypa ta y mah y. Hy tlâhpizy saih u, Lyna hla paryh teh u! Abeipa ta a phopi thlah palôh ha ta, A chyhsa pasa a taopazy a ngiachhie aw ei.

¹⁴ Châhrasala Zaio ta, “Abeipa ta na siesai ha ta, Ei Khazohpa ta eina my haw,” a tah.

¹⁵ “Chanô ta a saw sâhpi a ngiehpa a my thei aw ma? A chhi tawhta a puapa ngiachhie leipa ta a y aw ma? Chanôzy ta la ama sawzy ama my ngyu na, Kei deikua ta la cha my aw va na.

¹⁶ Nathlie teh, ei kupazahzy liata cha roh ha na ta, Na thokhyzy ei hmiakô liata khâ ama y.

¹⁷ Na sawzy ama vaw tlô hai; Châ paraotuhpazy ta cha puasai aw ei ta, Khih rypa ta châ taotuhpazy ama cha puasai aw.

¹⁸ A heih la, na chheipâh zydua moh tua, Na saw zydua a pahmaoh ei ta, Ama cha vaw pangai hih. Ei hrona reipa ta ei reih,” Abeipa ta a tah. “Sôh nata thih hawhta, Âmo cha nâ tobina ta hmâh aw chi ta, Myuh thieh chysia hawhta nâ tobi aw ei.

¹⁹ “Khih rypa nata roryhrapa ta cha tao ei ta, Râh raopa ta cha tao ha hra ei sala, Tahmâ cha na khihsawzy châta Na buah tuna lâ châ aw ta, Châ palâtuhpazy kha, Lâhlapi lâta ama y khai aw.

²⁰ Mâchhie na sa chhôh ta saw a pihpazy ta na nah liata, ‘A su he keimo châta a buah tu haw, Eima pahrâ nawpa su miah pie teh,’ tah aw ei ta,

²¹ Na palôh ta pachâ aw chi ta, ‘He sahlao he ahy ma nâ sapa tly i? Kei cha mâchhiesapa ta choh ha na ta, Sei ta nâ chhipa ta na papua ha ei ta, Ahy ma âmo he a vaw mohôh tly i? Pachâ tua u, keima dei ta siesaipa châ tlôh na ta, He sahlao he khataih tawhta a vypa ma ama châ tly?’ na tah aw.”

²² Abeipa Zehôvâh ta hetana heta a tah: “Pachâ teh u, râhzy lâta ei ku pazawh aw na ta, Phopizy lâta keima ngiana poh ei chaluah aw. Na sawchapawzy ama kalachhôh liata a pyhpa ta, Nâ lâ a vaw chhi aw ei ta; Na sawchanôzy chhao ama ngiatlâh liata vaw khaihpa ta, Nâ lâ amâ vaw chhi aw.

²³ Beizy cha châ mohôhtuhpa na pawzy châ aw ei ta, Beinôzy chhao sâhpi ta châ chhytuhpa na nôzy ama châ aw. Ama hmia alei lâ a khupa ta, Na hmiakô liata a bôh aw ei ta; Na phei dohlei ama cha paliepa aw. Chatanachata kei he Abeipa ei châ tahpa pahno aw chi ta, Keima nâ hâtuhpazy cha ama hnabeidy aw vei.”

²⁴ Pasaipha ku tawhta hraona sôh chhu theipa a châ ma? Pahnietuhpa seizy pachha theipa a châ ma?

²⁵ Abeipa ta hetana heta a tah: “Pasaipha seizy chhupa châ aw ei ta, Pahnietuhpa hraona sôhzy la pakhuapa a châ aw. Châ dyuhtuhpazy a dyuh aw ei na ta, Na sawzy ei pachha aw ei.

²⁶ Châ tlybaituhpazy cha âmo sa paniesa aw ei na ta, Kresawhti thlôhpa paripa hawhta âmo thisaih ama pari aw. Chatanachata chyhsa zydua ta, Kei, Abeipa he châ Pachhatuhpa châ na ta, Châ Chatlaituhpa, Zakaw Mo Pathaihpa ei châ tahpa ama pahno aw.”