ISAI 48 - Mara Bible RV (BSI)

Izarei paduapathina

¹ Hy Izarei moh bipa Zakaw pathlazy, Zudâh tizy tawhta vaw pua ei chi ta, Ngâchhihna nata adona ta châ tlôh leipa ta, Abeipa moh ta bie a taihpa ta, Izarei Khazohpa a padotuhpazy saih u, He bie he thei u la;

² Namôsasyh ta khihpi pathaihpa â tah ei chi ta, Pheisaihzy Abeipa moh bipa Izarei Khazohpa a ngâchhâpazy saih u, He bie he thei teh u.

³ “Hmo parohpazy kha, Hlâno tawhta reih ha ei na ta; Ei pakah tawhta a puapa, Ei phuah hapazy ama châ. Thlai ta tao ei na ta, Ama vaw tlô pâ lymâ.

⁴ Chhorupa châ ei chi ta, Nama rao cha thua thari châ ta, Nama khizy cha dawh a châpa ei pahnopa vâta,

⁵ Hlâno tawhta nama hnohta reih na ta, A vaw tlô hlâta nama hnohta ei phuah haw. Chataleipatala, ‘Eima khazoh nothlahpa ta a taopazy châ ei ta, Eima tho nothlâhpa khiepa ta biepie ta, Eima thua nothlahpa leihpa ta bie a piepa a châ,’ Nama tah pathlei aw na.

⁶ Thei ha ei chi ta, Cha zydua cha tahmâ moh teh u. Phuah aw veih ei chi ma? Tahmâ tawhta cha, Hmo thiehpazy cha pahnosa aw ei na ta, Hmo â nyupa nama pahno beih leipazy Ei cha pahnosa aw ei.

⁷ Hlâno ta taopazy châ leipa ei ta, Tahmâ ta taopazy ama châ. Tanoh a vaw chhi hlâ heta la, Chazy cha thei beih veih ei chi. Chataleipatala, ‘Moh teh u, chazy cha ei pahno mâh tâh,’ Nama tah pathlei aw na.

⁸ Thei beih leipa ei chi ta, Pahno beih hra leipa ei chi ta, Hlâno tawhta nama nah pachôh beih veih ei chi. Haiphiahpa ta hmo nama tao aw tahpa pahno na ta, Nô chhi tawhta chakhiatuhpa ama cha tahpa na châ.

⁹ Ei cha chhawh pathlah leina awpa ei ta, Ei moh vâta ei hiehâhna pahawhsa na ta, Keima reithaina vâta nama châta maoh ei oh.

¹⁰ Pachâ teh u, cha pasia ha ei na ta, Tâkâ pasiapa hawhta deikua châ vei; Meihô liata pasataona ta ei cha pasia ei.

¹¹ Keima châta, keima châ tlai ta, Cha hmo cha a taopa ei châ; Khazia reipachhiepa ta ei y aw? Ei rônahna he mohropa hnohta pie aw va na.

Abeipa ta Izarei a aw

¹² Hy Zakaw, Na nathlie la; Hy ei awpa Izarei, Na nathlie teh! Kei he Ano cha ei châ; A hmiatuachaipa châ na ta, A hnôhchaipa ei châ.

¹³ Ei ku ta leilô abôna lôbô bô ta, Ei ku chachâh lâta avâzy khi parai ta, Ei awpa nah ei ta thlai amâ duah tyh.

¹⁴ Nama zydua ta a hmaoh u la, Nathlie teh u! Ama hry liata ahy kha ma He hmozy he a reih beih tly? Abeipa ta Kôresâ cha kyhpachâ ta, A khopa cha Babylaw chô liata tao aw ta, Kaldia mo chô liata a bâh a hy aw.

¹⁵ Kei, keima tlai ta bie reih na ta, Ano cha ei awpa a châ; Kei ta ei chhipa a châpa vâta, A lâpi patlâ aw ta, A hlaotloh lymâ aw.

¹⁶ Nâ vaw hnia u la, He bie he thei teh u; Hmo vaw y awpa kyh liata, Âthaona tawhta arulâta bie reih beih leipa na ta, A vaw y daihti lia chhao ta ei y.” Tahmâ he Abeipa Zehôvâh ta na tuah ta, A Thlahpa ta eina tuah.

¹⁷ Abeipa ta hetana heta reih ta, Nâmo châ Chatlaituhpa, Izarei Mo Pathaihpa ta hetana heta a tah: “Kei he Abeipa na Khazohpa châ na ta, Na pha nawpa ta cha pachu na ta, Na sie nawpa lâpi liata châ chhihthatuhpa ei châ.

¹⁸ Ei biepiepazy na vaw nathlie ha mawh sala, Na thlalôhna chavah hawhta châ aw ta, Na siana tilaipi chatlaopa hawhta a châ awpa tlai!

¹⁹ Na chipathlazy sadi hawhta hluh aw ei ta, Na chhi theizy sadi dipa hawhta hluhpa ta, Ama moh phiepa ta y beih leipa aw ta, Ei hmiakô tawhta pahleipadiapa ama châ beih lei awpa tlai!”

²⁰ Babylaw tawhta pua u la, Kaldia tawhta a râ teh u; He kyh he hla ta awh u la, A lypa ta phuah teh u; Khizaw kaokih taihta pathâhsa u la, “Abeipa ta a chakaotuhpa Zakaw cha a chatlai haw!” Tahpa ta phuah teh u.

²¹ Râh raohpa su liata â chhi no ei khata, Ama dâhphi leipa ta; Âmo châta lôpanô tawhta ti palosa ta, Lôpanô pakei ta ti a kaw pali.

²² “Moleipazy châta thlalôhna rai y vei,” Abeipa ta a tah.