ISAI 47 - Mara Bible RV (BSI)

Babylaw panawhna

¹ Hy Babylaw zuah kônô y, Za chô la dohlei liata a zâ tyuh teh; Hy Kaldia zuahnô y, Beidyuchhai leipa ta alei liata a tyuh teh! Nônai nôtlyhnô cha tah khao aw veih ei.

² Sâh chariehna lôzy lapa ta sâh charieh la, Na hmiakhu soh la, Na poh typa ta na phei palâ la, Chavahzy chaka teh.

³ Na thluahruana palâpa châ aw ta, Na nozana hmôpa a châ aw. Phuh la aw na ta, Ahy hmahta pahlôh aw va na.

⁴ Miah Chatlaituhpa cha, A moh Pheisaihzy Abeipa châ ta; Izarei Mo Pathaihpa a châ.

⁵ Hy Kaldia zuahnô y, A chalihpa ta a tyuh la, Zohna liata a ngia teh; Abeinarâhzy abeinô cha tah khao aw veih ei.

⁶ Ei phopi chô liata ei hiehâh ta, Ei ryuto râh cha papuapaleipa ta, Âmo cha na ku liata ei cha pie. Zawngiahna rai ama chô liata palâsa leipa chi ta, Machâpazy taihta phaohri a hri ngaitapa na paphaosa ei.

⁷ “Abeinô ei châ kôzaw aw,” tah chi ta, Cha hmozy cha na palôh liata soh beih leipa chi ta, Ama chhâ nawpazie chhao pachâ va chi.

⁸ Chavâta nâ haosai sai tlaichhai chi ta, Â bohpa ta a tyuhpa ta na palôh liata, “Keima tlai he na ei châ, Keima leipa ta mohropa y veih ei; Nôhmei châ beih leipa aw na ta, Sawzy pahlei beih aw va na,” a tahtuhpa y, He he thei teh:

⁹ He hmo mianopazy heta, Movi hlâta cha vaw tlô thlu aw ta, Noh kha chhôh ta a cha vaw tlô thlu aw: Dyu hluhpi hmâpa ta, Pachaona hmotaothei ngaitapazy ta pachao hra la, Sawzy pahleina nata nôhmeina zy ta Rarôh ypa ta a cha vaw tlô thlu aw.

¹⁰ Na moleina liata a bohpa hawhta a pachâ chi ta, “Ahy hmahta na hmô veih ei,” na tah. Na sona nata na pahnona ta châ chhi chhei ta, Na palôh liata, “Kei tlai he na ei châ, Keima leipa ta mohropa y veih vei,” na tah tyh.

¹¹ Châhrasala na chô liata hmo pha leipa vaw tlô aw ta, Pachaona hmâpa ta papai nawpazie pahno aw va chi; Chhiena cha tla thlu aw ta, A chatlai thei aw va chi; Eikhapi ta raona cha vaw tlô thlu aw ta, Pahno chhielie aw va chi.

¹² Na hawtita tawhta na hriapasa tyhpa, Na pachaonazy liana cha a duah la, Na dyu hluhpi liana cha a duah tua rai; Na hlao a tloh thlâh ha thei ngyu aw mâh tâh, Chichhihpa hmo na paysa thei thlâh ha ngyu aw mâh tâh.

¹³ Ryhraona tao awpa na hnei hluhpa vâta, Na rie a thei kaw khawh; Avâ liata hmozy a pahrua thaipazy cha a vaw duah ei sala, Awhsi a moh thaipazy a vaw duah hra ei sala, Thlâpâ diehpa moh ta, Na chô liata hmo a tlô awpa châ chho tyhpazy chhao, A vaw duah ei sala, Cha pachha mawh ei sy.

¹⁴ Moh teh, sawphao hawh dei ama châ; Mei ta âmo cha kâ ta, Meipaleih hmotaotheina tawhta Âmosasyh a pachha thei veih ei. Cha mei cha a palalôh nawpa meihei rakhapa châ leipa ta, A aih awpa mei rakhapa châ vei.

¹⁵ Na rie nâ vaw pathei tyhna hmozy cha, Cha hawhna chata na châta châ aw ei ta, Na hawtita tawhta sôh na palie lâhpazy chhao, Cha hawhna chata na châta ama châ hra aw. Âmo lâpi chyu liata viavi ei ta, Châ pachha thei awpa ahy hmahta y veih ei.