ISAI 46 - Mara Bible RV (BSI)

Khazoh dopa nata Babylaw khazoh nothlahpazy

¹ Bel a bôh ta, Nebô â pahnai; Ama khazoh nothlahpazy cha, Râhsazy nata sahrohzy chô liata ama khaih. He hmozy nama phaopa he, Sahroh thachhâpazy chô liata Phaohri hawh deita a châ.

² A zâ pahnaipa ta a zâ bôh khoh ei ta, Phaohri deikua chapawh thei hlei veih ei; Âmo tlai chhao sei châna lâ ama sie.

³ “Hy Zakaw pathlazy saih u, Na nathlie u la; Hy Izarei pathla laibâhpazy saih u, Na nathlie teh u; Py chhôh tawhta ei pyhpazy châ ei chi ta, Chhi tawhta ei pipazy nama châ.

⁴ Nama machâna taih chhao ta, Ano cha châ aw na ta; Nama sâ pawhna taih chhao ta, Ei cha pi lymâ aw ei. Nâmo châ taotuhpa châ na ta, Nâmo châ pyhtuhpa ei châ aw; Cha pi aw ei na ta, Ei cha pachha aw ei.

⁵ “Ahy ma na palyusa aw ei chi ta, Ahy nata ma eina pakho aw ei chi tly? Ahy na palyusa chi ta, Ahy nata ma eina pakhopâ aw ei chi tly?

⁶ Sahria tawhta ngôh bôpa ta, Khopathliahna ta tâkâ pathliah ei ta, Ngôh daihtuhpa pahriahlaosapa ta, Ngôh nata tâkâ hmâpa ta khazoh pataosa ei ta, A bôh ei ta amâ chhy.

⁷ Khazoh nothlahpa cha, Ama ngiatlâh liata khaipa ta a pia ei ta; A su awpa liata soh ei ta, Cha liata â duah ngâ thlâh haw; A su tawhta ano kho ta a pasie thei vei. Chyhsa ta a aw khiahta cha, A chhy leipa ta; A nôpona tawhta pachha thei hra vei.

⁸ “Nâmo moleipazy saih u, He hmo he my leipa u la, Pachâ u la, a thei thlâh ha muh vy.

⁹ Hlâno ta hmo parohpazy kha, A thei thlâh ha teh u; Kei he Khazohpa châ na ta, Khazoh hropa rai y veih ei; Kei he Khazohpa châ na ta, Kei hawhpa rai y veih ei.

¹⁰ Âthaona tawhta chhâna kyh reih ha na ta, Hmo tao mâh leipazy chhao, Hlâno tawhta hetana heta ei reih haw: ‘Ei ryhraopa a duah aw ta, Ei chhuahpa zydua ei tao khai aw.’

¹¹ Nochhi lâta sahei a niepa pavaw aw aw na ta, Râh hlapi liata ei chyhsa ryhraotuhpa ei aw aw. Reih ha na ta, Ei vaw patlôsa aw; A chhuah ha na ta, Ei tao aw.

¹² “Nâmo, palôh kuhchhapazy saih u, Na nathlie u la; Nâmo, pahniena tawhta a hla kawpazy saih u, Na nathlie teh u:

¹³ Ei siana vaw pahniasa hai na ta, A hla khao vei; Ei pachhana chhao, Bohpi châ khao aw vei. Zaio liata pachhana patlôsa aw na ta, Izarei liata ei rônahna ei paysa aw.”