ISAI 45 - Mara Bible RV (BSI)

Khazohpa chhaichhi Kôresâ

¹ Abeipa ta Kôresâ hnohta hetana heta a tah: “Na hmiakô liata phopizy panawhpa ta ypa ta, Beizy chaisaih pathlâpa ta y sala, Chhikaozy khawpa a châ lei nawpa ta, Na hmiakô liata ochhizy pahy awpa ta, Na ku chachâh lâ cha patu na ta, Sathaw ei cha thupa na châ.

² Na hmia lâta sie aw na ta, Tlâh byuhpazy ei paraih aw; Dawh ochhizy pakeichheih aw na ta, Ochhi hraina thuatlaizy ei tai pachhô khai aw.

³ Kei Abeipa, Izarei Khazohpa heta, Na moh tlai ta ei cha aw tahpa na pahno thei nawpa ta, Zohna ryusôhpazy cha pie aw na ta, Su a nyupazy liata sôh nyupazy ei cha pie aw.

⁴ Nâ chakaotuhpa Zakaw vâta, Na moh ta cha aw na ta; Eina vaw pahno beih leipa chhao chi ta, Ei tlyhpa Izarei vâta, Na moh ta ei châ tlyhpa na châ.

⁵ Kei he Abeipa cha châ na ta, Abeipa hropa y leipa ei ta, Keima leipa ta Khazohpa hropa y veih ei. Eina vaw pahno leipa chhao chi ta, Kei ta na chai ei cha saih.

⁶ Chatanachata kei he Abeipa châ na ta, Keima leipa ta Abeipa hropa y leipa ei ta, Abeipa hropa rai y veih ei tahpa cha, Noh chhina su tawhta noh tlana su taihta Chyhsazy ta ama pahno khai aw.

⁷ Khaihna tao na ta, Zohna chhao ei paysa; Sivâphana patlôsa na ta, Chhiena chhao ei paysa; Kei he Abeipa, cha hmo zydua taotuhpa cha ei châ.

⁸ “Avâzy saih u, chô lâ tawhta vâkatlâ patlasa u la, Meihdozy tawhta siana avâ za suah mawh sy. Alei a pahy sala, Pachhana chhyh kaw thao mawh sy; Siana chhao a chhyh kaw thao sala, Pachhana nata pyuh khoh mawh sy; Kei Abeipa heta chazy cha ei paysapa a châ.

⁹ “Ano a Taotuhpa a chakhiapa cha a hu a po na! Alei beihzy hry liata alei beih pachaipa a châ. Beihlei ta beihvituhpa hnohta, ‘Khâpa ma na tao? Na hmotaopa cha, A patuna ku hnei vei dua?’ a tah thei ma?

¹⁰ A paw hnohta, ‘Khâpa saw ma na sa?’ A tahtuhpa cha a hu a po na! A nô hnohta, ‘Khâpa nawh ma nâ zeih?’ A tahtuhpa chhao a hu a po na!”

¹¹ Abeipa, Izarei Mo Pathaihpa ta hetana heta tah ta, Izarei a paduatuhpa ta hetana heta a tah: “Hmo vaw tlô awpa kyh na hiahri teh u; Ei sawzy kyh liata na eilawpa ta, Ei ku raihria kyh liata bie eina pie aw ei chi ma?

¹² Alei he kei ta tao na ta, A chô liata chyhsapa ei paysa. Avâ a paraipa kha keima ku he châ ta, Vâ pheisaih zydua bie a pietuhpa chhao, Keima tlai he ei châ.

¹³ Kôresâ cha siana ta pahra na ta, A lâpi zydua ei patlâsa lymâ aw. Ei khihpi paduapathi aw ta, Sei ta amâ chhipa ei chyhsazy a papua aw ei; A ty hmô awpa vâta châ leipa aw ta, Lymâ hmô awpa vâta châ hra aw vei,” Pheisaihzy Abeipa ta a tah.

¹⁴ Abeipa ta hetana heta a tah: “Izi hneirôna nata Kusi sôdaohna zy nâ lâ a vy aw ei ta, Sâbia doh seihpazy nâ lâ amâ vy aw; Na eih châ aw ei ta, Nâ ama cha pazi aw. Bâlia chhaota nâ lâ a vy aw ei ta, Na hmiakô liata amâ bôh aw. ‘Khazohpa cha na hnohta y tlai ta, Khazoh hropa y veih ei, Nâ leipa ta Khazohpa hropa rai y veih ei,’ Tah aw ei ta, Ngiachhiena ama châ haw aw.”

¹⁵ Hy Izarei Khazohpa, Pachhatuhpa y, Khazohpa â nyupa tlai na na vaw châ.

¹⁶ Khazoh nothlâhpa a chhytuhpa zydua cha, Nozapa nata nohzaopa ta y aw ei ta; Khazoh nothlahpa a taotuhpazy chhao, Tymâpa ta ama y aw.

¹⁷ Izarei deikua cha Abeipa ta pachha ta, Tlyzaw pachhana ta a pachha haw. Nozapa ta y khao leipa aw ei chi ta, Tlyzaw taihta nohzaopa ta y khao aw veih ei chi.

¹⁸ Abeipa cha avâzy a paysatuhpa châ ta, Ano deita cha Khazohpa a châ. Alei he yzie hneipa ta taopa ta pa-i ta, Aruapa ta paysa leipa ta, Pahrâ nawpa ta a padua. Cha Abeipa chata hetana heta a tah: “Kei he Abeipa châ na ta, Abeipa hropa y veih ei.

¹⁹ Lei zohpa liana heta, Arulâta bie reih beih leipa na ta; Zakaw chipathla hnohta chhao, ‘Hraoleipa ta na tlua teh,’ Tah beih va na. Kei, Abeipa he siana bie reih na ta, Biedopa a phuahpa ei châ.”

Abeipa nata Babylaw khazoh nothlahpazy

²⁰ “A pahmaohpa ta a vy u la, Nâmo, phopi laibâhpazy saih u, Hmaohkha ta a vaw hnia teh u! Ama tho khazoh nothlahpa a phaoh laihpa phopizy ta Pahnona rai hnei leipa ei ta, A pachha thei leipa khazoh lâ thlah khâ ama chhâ tyh.

²¹ Reih u la, nama bie cha a vaw duakhei teh u; A saohiah tua tlai ei sa! Khahlâ tawhta ahy ma a chhochhielie tyh? Hlâno tawhta ahy ma a phuah tyh? Kei, Abeipa he châ va na ma? Keima leipa ta khazoh hropa y veih ei; Kei he Khazohpa siapa nata Pachhatuhpa cha châ na ta, Keima leipa ta ahropa y veih ei.

²² “Khizaw kaokih liata a ypa zydua saih u, Kei lâ a vaw heih u la, Pachhapa ta y teh u! Kei he Khazohpa cha châ na ta, Khazoh hropa y veih ei.

²³ Ei moh a reipa ta keimasasyh ta bie a taih na ta, Ei pakah tawhta siana ta bie pua ha ta, Vaw kua khao aw vei. Pakhu to ei hmiakô liata paneih aw ei ta, Paleih to ta na pazi awpa ta bie amâ taih aw.

²⁴ Hetana heta ei thâtih ama reih aw: ‘Abeipa lia deita ta pahniena y ta, Ano lia deita ta thatlôna a y; Chyhsazy ano lâ a vy aw ei ta, A chô liata a ru a chhôpa zydua cha, Maophyuhpa ta ama y aw.

²⁵ Izarei chipathla zydua deikua cha, Abeipa liata thai pachâsapa châ aw ei ta, Rônahpa ta ama y aw.’”