ISAI 44 - Mara Bible RV (BSI)

Abeipa a tlypa Izarei Phopi

¹ “Tahmâ deikua cha, Hy nâ chakaotuhpa Zakaw y, nathlie la, Ei tlyhpa Izarei y, thei mah y!

² Cha tao ta, nô chhi chhôh tawhta cha padua ta, Châ bao lymâ awpa Abeipa ta hetana heta a tah: Hy nâ chakaotuhpa Zakaw y, chi leipa la, Hy ei tlyhpa Zesuruh y, chi khah y.

³ Râh dâhphipa liata ti bao aw na ta, Alei hipa liata vahtie tizy ei palosa aw. Na chipathla chô liata ei Thlahpa hry aw na ta, Na pathlazy chô liata ei byhnâ ei hry aw.

⁴ Sibiepa hawhta ama chhyh paka aw ei ta, Vahtie tizy kiah liata thozy hawhta ama buh a rôh aw.

⁵ Chyhsa pakha ta, ‘Abeipa eih ei châ,’ tah aw ta, Chyhsa hropa ta Zakaw moh a bi aw ta, Mohropa ta a ku liata ‘Abeipa eih,’ tahpa ropa ta, Anosasyh ta Izarei moh â bi aw.”

Keima leipa ta Khazoh hropa y vei

⁶ Abeipa, Izarei Beipa ta hetana heta tah ta, Izarei Chatlaituhpa Pheisaihzy Abeipa ta hetana heta a tah: “Kei he hmiatuachaipa nata hnôhchaipa cha ei châ, Keima leipa ta Khazoh hropa rai y veih ei.

⁷ Keima hawhpa he ahy ma a y? A y khiah cha a phuah mawh sy. Hlâno chyhsazy kha kei ta ei raopazy châ ei ta, Chavâta keima hawhpa he a y tlai khiahta cha, Ei hmiakô liata a vaw phuah mawh sy. Hmo a vaw y awpazy phuah ei sala, A vaw tlô awpazy phuah mawh ei sy.

⁸ Chi leipa u la, a chalyu hra khuh vy. Hlâno tawhta nama hnohta phuah na ta, Vaw reih chhielie ha va na ma? Nâ pahnokheituhpazy mah nama châ tâh! Keima leipa ta Khazoh hropa rai a y ma? Y vei, Lôpanô rai y vei; Pakha hmah a ypa pahno va na.”

Nothlahpa a chhypa phahnai leina

⁹ Khazoh nothlahpa a taotuhpa zydua cha, Khâpa hmah châ leipa ei ta; Ama pasôpa hmozy chhao, Phahnaina hnei veih ei. Âmo tlai ta ama pahno; Châhrasala a phapa ta moh leipa ei ta, Pachâ hra veih ei; Chavâta maophyuhpa ta sopa ama châ aw.

¹⁰ Phahnaina a hnei leipa khazoh nothlahpa cha, Ahy ta ma zua padua ta, a leih hra bao tly?

¹¹ Pachâ teh u, ano zituhpa zydua cha, Maophyuhpa ta ama y aw; Zôthaipazy cha chyhsapa deita ama châ. Ama zydua ta a vy ei sala, Ama thâtih a vaw duakhei tua ei sa. Chipa ta paysapa châ aw ei ta, Maophyuhpa ta taopa ama châ aw.

¹² Thua khazoh nothlahpa tao awpa ta, Syudaihpa ta chhaichhi a chabapa ta, Meihei chô liata rai a hria; Khazoh nothlahpazy cha syulô ta daih ta, A bâh thatlôpa hmâpa ta nothlahpa cha a tao. A nodipa ta a thachhâ ta, Ti do leipa ta a panao.

¹³ Tho khazoh nothlahpa tao awpa ta, Tho zôthaipa ta chaori parai ta, Châsôh ta ngiana a tao; Tho pamihna ta pamih ta, Âhlôpa taona chhaichhi ta ngiana a tao. Tho khazoh nothlahpa cha, Chyhsapa pizie hawhta tao ta; O liata pahrâ awpa ta, Chyhsapa hmiphanazie hawhta a tao.

¹⁴ Khazoh nothlahpa tao nawpa ta, Sidy thozy thlu ta; Meisah vyhpa nata ôkâ zy a tlyh ta, Râhmâhpa thozy hry liata a palaiseihsa tyh. Meisah vyhpa tho loh ta, Vâsua ti ta a palaiseihsa tyh.

¹⁵ Chatanachata cha thozy cha, Chyhsa châta meithu a vaw châ tyh. Zôthaipa ta tho cha patlaw ta, Thokha mei liata tipa ta a aih ta; Thokha cha viahchhâ tao nawpa ta Mei patina châta a hmâh tyh. Cha tho tawh pyly ta, Khazoh taopa ta a chhy ta; Khazoh nothlahpa tao ta, A hmiakô liata â bôh tyh.

¹⁶ Tho khophie mei liata ti ta, Tho khophie cha sa niena châta a hmâh tyh; Cha liata sazy rao ta, Lôhrâtlôpa ta a y tyh. Mei a aih nawpa châta chhao hmâh ta, “Âh, a lalôh dâh cha, Mei a pha dâh cha!” a tah tyh.

¹⁷ Tho laibâhpazy hmâpa ta khazoh tao ta, Ano châta khazoh nothlahpa â tao; Nothlahpa hmiakô liana cha a bôh ta, Nothlahpa cha â chhy tyh. Nothlahpa lâ cha thlahchhâ ta, “Ei khazoh na châ hih, Na pachha teh,” a tah tyh.

¹⁸ Pahno leipa ei ta, Pachâ hra vei ei; Ama hmô thei lei nawpa ta, Ama mo pachawhkhâh hapa châ ta; Ama pahno thai lei nawpa ta, Ama palôh khaw hapa a châ.

¹⁹ Pachâna a hmâhpa y leipa ei ta, “Â khophie mei liata ti na ta, A meihei liata viahchhâ pakâhpa ta, Sazy raopa ta ei nie. Cha hawhpa khiahta cha, Tho laibâhpazy cha, Pasichhihpa ta ei tao hapa châ aw vei ma? Tho tô hmiakô liata ei bôh aw ma?” Tahpa ta a pahno thaipa y leipa ei ta, A hmô thaipa y veih ei.

²⁰ Cha hawhpa chyhsa cha, Buchâh a niepa châ ta; Palôh sie chheipa chyhsa ta A pasiechheisa hapa a châ. Anosasyh ta a pachha thei leipa ta, “Ei ku chachâh lâta haipa bie a y ma?” A tah thei awpa duahmo liata a duah hra vei.

Abeipa ta Izarei a chatlai

²¹ Hy Zakaw y, he hmozy he a thei thlâh ha la, Hy Izarei, nâ chakaotuhpa na châpa vâta, He hmozy he a thei thlâh ha mah y. Kei ta ei cha paduapa châ chi ta, Nâ chakaotuhpa na châ; Hy Izarei, cha my beih aw va na.

²² Na paraonazy meihdo hawhta papai ha na ta, Na moleinazy ameih hawhta ei papai haw. Cha chatlai ha na ta, Chavâta kei lâ vaw kua ha mah y.

²³ Abeipa ta chatlaina tao ha ta, Chavâta, Hy avâzy saih u, hla sa u la, Hy alei su a thupazy saih u, awh teh u. Hy tlâhpizy saih u, hla paryh u la, Hy râhmâhpa nata a chhôh liata tho to saih u, hla paryh teh u! Abeipa ta Zakaw cha chatlai ha ta, A rônahna Izarei liata a paluahsa haw.

²⁴ Abeipa, châ chatlaituhpa ta hetana heta tah ta, Chhi tawhta châ paduatuhpa ta hetana heta a tah: “Kei he Abeipa, ato zydua taotuhpa ei châ; Avâzy a paraituhpa a y chhôhpa châ na ta, Alei a pazawhtuhpa a y chhôhpa ei châ.

²⁵ Hrohso pakheipazy maoh paphyuhpa ta, Ama chhochhieliena biezy â do leizie a palâsatuhpa châ na ta, Peihthaipazy ahrupa ta a taotuhpa ei châ. Asopazy hnôh lâ paheihsa na ta, Ama pahnona hruna lâta a paliesatuhpa ei châ.

²⁶ Nâ chakaotuhpazy bie pa-i na ta, Ei lyuhchâpazy ryhraopa a patlôsatuhpa ei châ. Zerusale kyh liata, ‘Cha liata chyhsa ama pahrâ heih aw,’ tah na ta, Zudâh khihpizy kyh liata, ‘Paduapathipa châ aw ei ta, Roryhrapa khihpizy ei paduapathi aw ei,’ A tahtuhpa ei châ.

²⁷ Ti a thupa hnohta, ‘Kua teh, na chavahzy ei pakua khai aw,’ A tahtuhpa ei châ.

²⁸ Kôresâ kyh liata, ‘Ano cha ei mietaku vaituhpa châ ta, Ano ta ei chhuahna zydua pi a patloh aw,’ A tahtuhpa ei châ. Zerusale kyh liata, ‘Paduapathipa a châ aw,’ tah na ta, Achhyna o kyh liata, ‘Nâ bôna lôbô bôpa a châ aw,’ A tahtuhpa ei châ.”