ISAI 43 - Mara Bible RV (BSI)

Izarei pachhatuhpa Zehôvah

¹ Tahmâ deikua cha, Hy Zakaw, châ paysatuhpa Abeipa ta hetana heta tah ta; Hy Izarei, châ paduatuhpa Abeipa ta hetana heta a tah: “Chi khah y, ei cha chatlai haw; Na moh ta cha aw na ta, Keima eih mah na châ tâh.

² Tizy na chaka nota, Na hnohta y awh na ta; Chavahzy na chaka nota, Cha vao aw veih ei. Mei hry liata na sie nota, Cha kâ leipa aw ta, Meipaleih ta cha palâ aw vei.

³ Kei he Abeipa na Khazohpa châ na ta, Izarei Mo Pathaihpa ei châ; Châ pachhatuhpa châ na ta, Izi cha nâma chatlaina sôh ta ei pie; Kusi nata Sibâ chhao, Nâma vyuhpa ta ei pie.

⁴ Ei mohmô liata sôh ngaita chi ta, Zachhihpa châ chi ta, Kyh ei cha pachâpa vâta, Nâma vyuhpa ta chyhsazy pie na ta, Na hrona vyuhpa ta phopizy ei pie.

⁵ Chi khah y, na hnohta ei y mâh tâh. Nochhi lâ tawhta na chipathla a vaw chhi aw na ta, Notla lâ tawhta ei cha pakhy aw.

⁶ Maw lâ hnohta, ‘Pathlie teh,’ tah aw na ta, Chho lâ hnohta, ‘Hraih kha,’ ei tah aw. Ei sawchapawzy lâhlapi tawhta a vaw chhi la, Ei sawchanôzy alei chhâna tawhta a vaw chhi mah y.

⁷ Ei rônahna châta paysa na ta, Kei ta padua na ta, kei ta ei taopa, Ei moh a phaohpa maih a vaw chhi khai mah y.”

⁸ Mo hnei thlâh ha taraw ta, Châhrasala mochaopa phopi cha a vaw chhi la, Nakhaoh hnei thlâh ha taraw ta, Châhrasala nahpâpazy cha a vaw chhi mah y!

⁹ Râh zydua a hmaoh ei ta, Phopizy amâ pakhy. Ama hry liata ahy ma he he reih thei aw ta, Hmo parohpazy miah a pahmô thei aw? Amâ dona a duakhei awpa ta, Pahnokheituhpazy a vaw chhi ei sala; Nathlie ei sala, “Â do na,” tah mawh ei sy.

¹⁰ “Nâmo tlai he nâ pahnokheituhpa châ ei chi ta, Nâ chakaotuhpa ei tlyhpazy nama châ. Chatanachata keima tlai he, Khazohpa cha ei châ tahpa nama novâh aw ta, Pahno aw ei chi ta, Einâ ngiapâ aw ei chi. Kei ei y hlâta cha, Khazoh hropa rai y leipa ta; Keima khai tawhta chhao, Khazoh hropa y khao aw vei,” Abeipa ta a tah.

¹¹ “Kei, kei tlai he, Abeipa cha châ na ta, Keima leipa ta pachhatuh hropa rai y veih ei.

¹² Keima tlai he bie a reih tyhpa kha châ na ta, A pachhapa nata bie a chho tyhpa kha ei châ; Nama hry liata khazoh hropa rai vaw y beih veih ei. Chavâta nâmo cha nâ pahnokheituhpazy châ ei chi ta, Kei he Khazohpa cha ei châ,” Abeipa ta a tah.

¹³ “Tlyzaw tawhta Khazohpa vaw châ ha na ta, Ei ku tawhta a pachha thei awpa ahy hmah y veih ei. Hmo ei tao hapa cha, Ahy ma a panano thei aw?” Abeipa ta a tah.

¹⁴ Abeipa, nâmo châ Chatlaituhpa ta hetana heta tah ta, Izarei Mo Pathaihpa ta hetana heta a tah: “Nâmo vâta Babylaw lâ pheisaih tuah aw na ta, Arâpazy hawhta ei zâ chhi khai aw ei; Amâ ly kaw tyhpa balyhzy cheingei hmâpa ta, Kaldia mo chhao ei za siekhei aw ei.

¹⁵ Kei he Abeipa nama Mo Pathaihpa cha châ na ta, Izarei a paysatuhpa nama Beipa cha ei châ.”

¹⁶ Tilaipi liata lâpi tao ta, Tisaihzy liata lâthlôh a taopa;

¹⁷ Talailih nata arâzy parao ta, Pheisaih nata pasaiphazy paraopa ta, Pao ei ta thyu thei khao leipa ta a paysatuhpa, Mei pachhaipa hawhta âmo cha pachhai ta, Meiôh pala mei thiepa hawhta âmo a thiepa Abeipa ta hetana heta a tah:

¹⁸ “Hmo parohpazy a thei khao leipa u la, Hlâno ta hmozy pachâ khao khah u.

¹⁹ Moh teh u, hmo thiehpa tao aw na ta, Tahmâ tlai chhao he y ha ta, Hmô veih ei chi ma? Râhchawhpa liata lâpi tao aw na ta, Râh raohpa liata chavahzy ei tao aw.

²⁰ Ei phopi atlyhpa hnohta ti do awpa pie awpa ta, Râhchawhpa liata ti paysa na ta, Râh raohpa liata chavahzy ei paysa; Chavâta râhsazy ta na palyupalih aw ei ta, Savai nata pavawpizy ta eina palyupalih aw ei.

²¹ Chatanachata ei châta ei paduapa phopi ta, Keima reithaina ama phuah aw.

²² “Châhrasala Hy Zakaw, Na pado khoh leipa chi ta; Hy Izarei, noai tlao eina tah chi!

²³ Raopa hlânazy châta, Mietakuzy na vaw cheipa leipa chi ta; Atheihna hlâpa ta, Na palyupalih hra va chi. Hmohlâpazy hneibeiseihpa ta, Na phao cha pahri beih leipa na ta; Ropahâhpa hnabeiseihpa ta, Na rie cha pathei beih hra va na.

²⁴ Tâkâ ta basuh thlôhpa na chaleipa beih leipa chi ta, Atheihnazy na hlâna thawzy ta Lôhrâ na patlô beih hra va chi. Na moleinazy ta phaohri tlao na pavi chi ta, Na paraonazy ta ei rie tlao eina pathei chi.

²⁵ “Kei, keima tlai he, Ei moh vâta na paraonazy a phietuhpa châ na ta, Na moleinazy a thei khao aw va na.

²⁶ Nâ thei khei la, Pachâ khoh tua ei si; Nâ dozie pasiapa a châ thei nawpa ta, Na thaichâna bie cha reih tua.

²⁷ Châ pathlatuhpa hmiatuachaipa khata molei ta, Na lyuhchâpazy ta hmo eina parao thlu ei.

²⁸ Chavâta supathaihpa chhituhpazy cha, Nohzaopa ta ei tao aw ei; Zakaw cha tlokhuh parao awpa ta hlâ na ta, Izarei cha thata reipachhie awpa ta ei tao haw.”