ISAI 42 - Mara Bible RV (BSI)

Abeipa ta â tlyhpa chakaotuhpa

¹ Nâ chakaotuhpa nata ei duakheipa he moh u la, Ei tlyhpa nata ei hro ta â ly ngaitapa he moh teh u. A chô liata ei Thlahpa soh na ta, Râhzy liata adona a tlôkhei aw.

² Ao paropa ta awh leipa aw ta, A ao ki pasâh hra leipa aw ta, Khiliah awhsâh châ aw vei.

³ Lohthi tlie pa-ipa thlie pathlah leipa aw ta, Meiôh thi daihmâpa chhao pachhai leipa aw ta, Ngâchhih ngaitapa ta adona a tlôkhei aw.

⁴ Alei chô liata adona a chareisa hlâlei cha, A thachhâ leipa aw ta, A hnabeidy aw vei; A ryhpa bie cha, Tilaipi kiah râhzy ta ama hâ thlâh ha aw.

⁵ Avâzy taopa ta parai ta, Alei nata a chhôh tawhta a puapazy pakawh ta, Alei chô liata a ypa chyhsazy hnohta husona piepa ta, A chô liata a chareipa chyhsazy hnohta thlahpa a pietuhpa, Khazohpa, Abeipa ta hetana heta a tah:

⁶ “Kei he Abeipa ei châ; Siana ta cha aw na ta, Na ku cha patu aw na ta ei cha hrôbieh aw; Izarei phopi châta biehrai ta cha tao aw na ta, Râhzy châta khaihna ta ei cha tao aw.

⁷ Mochaopazy mo pavâsa aw chi ta, Atâhpazy na papua aw ei; Âmo cha lei ry patâhna o tawhta papua aw chi ta, Patâhna o zohpa tawhta na papua aw ei.

⁸ Kei he Zehôvâh châ na ta, Cha cha ei moh a châ; Ahy hnohta hmah ei rônahna pie leipa na ta, Nothlahpazy hnohta chhao, Keima reithaina pie veih ei na.

⁹ Moh teh u, hmo parohpazy lei ei ta, Tahmâ he hmo thiehpazy ei phuah; Ama vaw tlô hlâ chhao ta, Ei cha chho hapa ei kha a châ.”

Abeipa reithaina hla thiehpa

¹⁰ Nâmo, tilaipi lâ zu ei chi ta, Cha liata a ypa zydua saih u, Nâmo, tilaipi kiah râhzy nata a chyhsazy saih u, Abeipa lâ hla thiehpa sa u la, A reithaina hla alei chhâna tawhta sa teh u.

¹¹ Râhchawhpa nata a khihpizy ta ama ao papua ei sala, Kedâ mo pahrâna khihzy ta ama ao papua mawh ei sy; Selâ khihsawzy thaphapa ta hla sa ei sala, Tlâh lakizy tawhta awh mawh ei sy.

¹² Abeipa cha parônahsa ei sala, Ano reithaina cha, Tilaipi kiah râhzy liata phuah mawh ei sy.

¹³ Abeipa cha pasaipha hawhta pua aw ta, Pheisaih hawhta a phahnai ngiahna a pathyu aw. Paro ngaitapa ta awhpa ta a pahôpahâh aw ta, A khakhaipazy chô liata a thatlôna a palâsa aw.

¹⁴ Bohpi a vaw chalih ha na ta, A thlih thlâh hapa ta maoh ei oh lylia. Tahmâ deikua cha, Chanô sawzeihpa hawhta awh aw na ta, Huchahâpa nata huhiahpa ta ei y bâ aw.

¹⁵ Tlâhpizy nata tlâhthlôhzy roryhrapa ta tao aw na ta, Ama thoti ramawh zydua ei paraoh khai ha aw. Chavahzy cha liahpahlôzy ta tao aw ei na ta, Tipozy ei pakua ha aw ei.

¹⁶ Mochaopazy cha, Ama pahno beih leipa lâthlôh liata a chhi aw ei na ta, Ama pahno beih leipa lâpi liata ei chhihtha aw ei. Ama hmiakô liata zohna cha khaihna ta tao aw na ta, Su byuhpazy ei paraih khai aw. Cha hmozy cha tao aw na ta, Âmo siesai aw veih ei na.

¹⁷ Tho nothlahpazy ngâ ei ta, Thua nothlahpazy hnohta, “Eima khazohzy nama châ,” A tahtuhpazy cha, Pakuasapa châ aw ei ta, Thata maopaphyuhpa ama châ aw.

Pachu thei leipa Izarei

¹⁸ Nahpâpa saih u, thei u la, Mochaopa saih u, moh u la, hmô teh u!

¹⁹ Nâ chakaotuhpa tah leipa ta cha, Ahy ma a mo a chao tly? Ei lyuhchâpa ei tuapa hawhta Nahpâpa ahy ma a y tly? Ahy ma ei tlyhpa hawhta a mo chao ta, Abeipa chakaotuhpa hawhta a mo a chao tly?

²⁰ Hmo hluhpi hmô ta, Châhrasala a phapa ta ngia vei; A nah pha thlâh ha ta, Châhrasala thei vei.

²¹ Abeipa cha asiapa a châpa vâta, A ryhpa bie cheihchalo ta parônahsapa cha, Â lyna a châ tyh.

²² He phopi deikua he cha, Hrao hapa phopi châ ei ta; Ama hmo ama la hapa phopi ama châ. Ama zydua ta khaohtlô liata pathla ei ta, Patâhna o liata ama nyu. Pachhatuh a hnei leipa hraona sôh lâta a lie ei ta, “Pie pakhua ha teh u,” a tah awpa a hnei leipa Parupa sôh lâta amâ lie haw.

²³ Nama hry liata ahy ma, Cha bie lâta a nah pachôh aw ta; Daihti a vaw tlô awpa châta, A palôh hmâhpa ta a nathlie aw?

²⁴ Ahy ma Zakaw cha parutuhpa liata hlâ ta, Izarei cha hraotuhpazy liata a hlâ ha tly? A chô liata eima vaw molei hapa, Abeipa ta a hlâpa châ vei ma? A lâpizy a chhih khoh leipa ei ta, A ryhpa ama zyh khoh leipa, Abeipa ta a hlâpa châ vei ma?

²⁵ Chavâta a pathiiana ru ngaitapa cha, A chô liata lei thlu ta; Adyuhna ru ngaitapa a lei thlu haw. Cha chata Izarei cha mei liata phôh ta, Châhrasala pahno vei; Mei chata kâ lymâ ta, Châhrasala a palôh liata soh hlei vei.