ISAI 41 - Mara Bible RV (BSI)

Khazohpa ypâna bietai

¹ Hy tilaipi kiah râhzy saih u, Ei hmiakô liata sidiapa ta y u la, Phopizy ta ama thatlôna pathieh mawh ei sy. Ryureina su lâ vaw puapa ta, Ama thâtih a vaw reih ei sala, Ryureina su liata a tyh suh vy.

² A siena maihta pahniena a to lymâpa Nochhi chyhsa siapa cha, Ahy ma Abeipa rai hria awpa ta a pahra tly? Abeipa ta râhzy a ku liata pie ta, A hmiakô liata abeizy a panawh haw. A zaozi ta âmo cha dohlei hawhta pazao ta, A libaw ta sâh sihpa hawhta â zawkhei ha ei.

³ A sie beih leipa lâpi liata âmo cha a chadai ta, Â bohpa ta a sie lymâ.

⁴ Âthaona tawhta chhâzy ahy ta aw ta, He rai he ahy ta hria ta, Ahy ta ma a patlô tly? Kei, Abeipa he hmiatua chaipa hnohta y na ta, Hnôhchaipa hnohta chhao a ypa ei châ; Keima tlai he na ei châ.

⁵ Tilaipi kiah râhzy ta hmô ei ta, Ama chi ngaita; Khizaw kaokih a chalyu ei ta, A vaw hnia ei ta amâ vy.

⁶ Chyhsa to ta ama viasazy bao ei ta, Ama unawhzy hnohta, “Riahphapa ta y teh!” ama tah.

⁷ Zôthaipa ta ngôh daihtuhpa pasyu ta, Syulô ta pamihtuhpa ta Syuphaw lô liata a daihtuhpa a pasyu; A baipâna kyh liata, “A pha kaw,” tah ta, Â chalyu lei nawpa ta, Thuakhaizy ta ama khaipâ.

⁸ Nâ deikua cha, Hy Izarei, Nâ chakaotuhpa na châ; Hy Zakaw, ei tlyhpa châ chi ta, Ei viasapa Abarahâ chipathla na châ.

⁹ Alei chhâna tawhta cha la na ta, Alei ki chhâna tawhta ei cha aw; Na hnohta, “Nâ chakaotuhpa châ chi ta, Châ tlyh ha na ta, Cha thy pathlah aw va na,” Ei tahpa na châ.

¹⁰ Chavâta chi khah y, Na hnohta ei y mâh tâh; Ngiarohpa ta y hra khah y, Na Khazohpa ei châ hih. Tha cha patlôpa ta cha bao aw na ta, Ei siana ku chachâh lâta khâchâ ei cha patu aw.

¹¹ Pachâ teh, na chô liata a hie a hâhpa zydua cha, Nozapa nata maophyuhpa ta soh aw ei na ta, Châ dyuhpa zydua chhao, Khâpa hmah a châ leipa hawhta châ aw ei ta, Ama leidia aw.

¹² Châ teituhpazy tlua aw chi ta, Hmô aw va chi; Châ dyuhtuhpazy chhao, Khâpa hmah châ aw veih ei.

¹³ Kei, Abeipa na Khazohpa heta, Na ku chachâh lâ cha patu na ta; “Chi khah y, ei cha bao aw,” Châ tahtuhpa chhao, Keima tlai he ei châ.

¹⁴ Nâ, Zakaw châkariepa y, Chi khah y; Nâmo, Izarei chyhsazy saih u, Chi khuh vy! Ei cha bao aw ei, Abeipa ta a tah. Châ chatlaituhpa cha, Izarei Mo Pathaihpa a châ.

¹⁵ Pachâ teh, sâh tlyna chhaichhi ta ei cha tao aw; Sâh tlyna thiehpa nata tiahpa ta cha tao aw na ta, Sâ tlyna hâh hneipa ta ei cha tao aw. Tlâhpizy tlypa ta pazao aw chi ta, Tlâhthlôhzy sâh sihpa hawhta na tao aw ei.

¹⁶ Âmo cha zie aw chi ta, Thlih ta phaoh aw ta; Chothyu ta a hiepatla khai aw ei. Chatawhcha Abeipa liata a ly aw chi ta, Izarei Mo Pathaihpa cha nâ palaikhei aw.

¹⁷ Dyhchhiepa nata phahlapazy ta ti tlua ei ta, Châhrasala ti y leipa ta, Ama paleih dâhphipa ta a hi tyh. Kei, Abeipa heta âmo cha a chhy aw na ta, Kei, Izarei Khazohpa heta siesai aw veih ei na.

¹⁸ Awphy tlâh sâhpazy liata chavahzy palosa aw na ta, Saikao liah khophiezy liata tihnawhzy ei paysa aw. Râhchawhpa cha tipo ta tao aw na ta, Râh raohpa chhao tikhaohzy ta ei tao aw.

¹⁹ Râhchawhpa liata sidy tho loh aw na ta, Akeisia, mytlia nata ôli thozy ei loh aw. Râh raohpa liata meisah vyhpa bô aw na ta, Tho hna phiapa nata meisah thozy ei bô aw.

²⁰ Chatanachata Abeipa ku ta chazy cha tao ta, Izarei Mo Pathaihpa ta a paysapa a châzie, Hmô aw ei ta ama pahno aw; Pachâ khoh aw ei ta, Ama no â vâh aw.

Khazoh nothlahpazy hraoleina

²¹ Nama khazoh nothlahpazy cha a vaw duakhei teh u, Abeipa ta a tah; Namâ dona cha vaw palâsa teh u, Zakaw pathlazy Beipa ta a tah.

²² Nâmo, khazoh nothlahpazy saih u, Hmo vaw y awpa cha miah chho teh u. Pachâ sih la eima pasia thei nawpa ta, Hlâno hmozy miah chho u la, Hmo vaw tlô awpazy miah chho teh u.

²³ Khazohzy nama châ tlai na tahpa eima pahno thei nawpa ta, He khai tawhta hmo vaw tlô awpazy miah chho teh u. Eima nôpo sala eima chi thei nawpa ta, Hmo phapa tlyma, hmo chhiepa tlyma tao teh u.

²⁴ Pachâ teh u, khâpa hmah châ veih ei chi; Nama raihria chhao, Khâpa hmah a châ leipa hlâta a châ lei via; Nâmo châ tlyhtuhpa cha pasichhihpa a châ.

²⁵ Maw lâ tawhta chyhsa pakha pathyu na ta, A vaw tlô haw; Nochhi lâ tawhta ei moh na vaw pado aw ta, Ryureituhpazy cha chiatlao hawhta tlypâ aw ta, Beihvituhpa ta beihlei a tlypa hawhta a tly aw ei.

²⁶ Eima pahno thei nawpa ta, Ahy ma âthaona tawhta vaw reih ta, “Ano cha adopa a châ,” eima tah thei nawpa ta, Khahlâ tawhta a vaw reih beih tly? Cha bie cha a phuahpa y leipa ei ta, A chhopa y veih ei; Chavâta nama biezy a theipa y veih ei.

²⁷ Keima tlai he Zaio hnohta, “Moh teh, he liata ama y,” A tah tua chaipa châ na ta, Zerusale hnohta thâtih phapa a phuah tua chaipa ei châ.

²⁸ Châhrasala moh nahta, Chyhsa rai y leipa ei ta; Hiahri ei na ta, Achhyna a pie theipa Ryhraokheituhpa ama hry liata y veih ei.

²⁹ Moh tua u, apakheipa sai châ ei ta, Ama raihria chhao hraoleipa sai a châ; Ama nothlahpa leihpazy chhao, Ziza ruapa dei a châ.