ISAI 40 - Mara Bible RV (BSI)

Zaio thlapalôhna bie

¹ Thlah palôh u la, ei phopi cha thlah palôh teh u, Nama Khazohpa ta a tah.

² Zerusale cha bie pha a chho u la, A hnohta, Â dyuhna chhâ ha ta, A paraona a ngiahthaipa a châ haw; A moleina zydua vyuhpa ta, Abeipa ku tawhta a lie no ta a hmô haw, Tahpa ta chho teh u.

³ Ao vaw paro ta, hetana heta a tah: “Râhchawhpa liata Abeipa lâpi a chhuahdy u la, Râh raohpa liata eima Khazohpa châta Lâlai patlâpa tao teh u.

⁴ Saikao to pasâhpa châ aw ta, Tlâhpi nata tlâhthlôh to pahnaipa a châ aw. Alei byuhpazy paraihpa châ aw ta, Pâdawhpazy pabypa a châ aw.

⁵ Chatawhcha Abeipa rônahna a vaw luah aw ta, Chyhsa zydua ta â raohpa ta ama hmô aw, Abeipa pakah ta a reih haw.”

Tlyzaw ta a duahpa Khazohpa Bie

⁶ Ao ta, “Phuah teh!” tah ta. Kei ta, “Khâpa ma ei phuah aw?” tah na ta. Chyhsa zydua sibiepa hawhta châ ei ta, Ama chhithaina zydua chhao, Lyurâh pawpi hawh dei a châ.

⁷ Abeipa hu ta a hmô ti ei ta, Sibiepazy cha uah ei ta, Pawpizy ama lo tyh; Chyhsapa la sibiepa tlai na ama vaw châ.

⁸ Sibiepa cha uah ta, Pawpi chhao a lo tyh; Eima Khazohpa bie deikua cha, Tlyzaw ta â duah aw.

⁹ Hy Zaio lâ thâtihpha a tlôkheituhpa y, Tlâh sâhpa lâ khi kiah mah y. Hy Zerusale lâ thâtihpha a tlôkheituhpa y, Hmotaotheina chhaota na ao papua mah y. Chi leipa ta na ao papua la, Zudâh khihpizy hnohta, “Nama Khazohpa he moh teh u!” tah mah y.

¹⁰ Moh teh u, Abeipa Zehôvâh cha, Hmotaotheina chhaota a vy ta, A bâh thatlôna hmâpa ta ryu a reih aw. Moh teh u, a lymâ a hnohta y ta, A viarithôna chhao a hmiakô liata a y.

¹¹ Mietaku vaituhpa hawhta, A mietaku zawzy a vaih aw; Mietakutawzy cha a bâh ta chalopa ta, A chachôhna liata a pyh aw ta; A taw a chhipazy cha, Dusawta ta a siekhei aw ei.

Pakhopâ thei leipa Izarei Khazohpa

¹² Ahy ma a kupazah ta tizy panua ta, A kha ta avâ khi a thlie beih tly? Ahy ma saikhua ta alei dohlei panua ta, Khopathliahna ta tlâhpizy pathliahpa ta, Khopathliahna ta tlâhthlôhzy a pathliah beih tly?

¹³ Ahy ma Abeipa palôh pahno ta, A ryhraokheituhpa hawhta, Ano cha cha pachâna a pie beih tly?

¹⁴ Ahy ma Abeipa ta a saohiah tyh ta, Ahy ma Abeipa a pachu beih tly? Ahy he Abeipa cha adona lâpi pachu ta, Pahnona pachupa ta, Novâhna lâpi a pahmô beih tly?

¹⁵ Pachâ tua u, phopizy cha tibyh liata ti di kha hawh dei châ ei ta, Khopathliahna liata doh chyhta a baipa hawh dei pachâpa ama châ. Pachâ tua u, Abeipa cha liahpahlôzy chhao, Hmo chyhpata hawhta a chalo thlâh hapa a châ.

¹⁶ Maisâh meithu châta Lebanaw thozy ta a khi leipa aw ta, A râhsazy chhao raopa hlâna châta a daih aw vei.

¹⁷ Ano hmiakô liata la, Râh zydua he khâpa hmah a châ leipa hawhta châ ei ta, Ano pachâ ta la, Khâpa hmah a châ leipa hlâ chhao ta, Chyh viapa nata aruapa hawhta pachâpa ama châ.

¹⁸ Cha hawhpa khiahta cha, Khazohpa cha ahy nata ma pakho aw ei chi ta, Khâpa nata ma nama pakho aw tly?

¹⁹ Khazoh nothlahpa nata ma nama pakho aw? Thua daihtuhpa ta khazoh nothlahpa daih ta, Ngôh daihtuhpa ta ngôh ta pahu ta, Tâkâ bâliazy ta a tobipa nata ma nama pakho aw?

²⁰ Dyhchhie tupa vâta hmo hlâ awpa a hnei leipa chyhsa ta Tho phapa a tlyh ta, Khazoh nothlahpa a piepâ thai leipa pataosa awpa ta, Zôthaipa a tluapa nata ma nama pakho aw?

²¹ Pahno beih veih ei chi ma? Thei beih veih ei chi ma? Âthaona tawhta cha chho ha veih ei ma? Leilô bô tua no tawhna khata nama novâh ha vei ma?

²² Ano cha alei vâphuh pahlôpa chô liata a tyuhpa châ ta, A mohmô liata cha, Lei liata a pahrâpazy cha khawsu hawh deita ama châ. Ano cha avâ khi pohraipa hawhta a pakaituhpa châ ta, Pahrâ nawpa poh o hawhta a paraituhpa a châ.

²³ Ano cha beimachâzy khâpa hmah châ leipa ta a taotuhpa châ ta, Lei liata ryureituhpazy aruapa ta a sohtuhpa a châ.

²⁴ Lopa nata tupa châ ei ta, Alei liata thari ama thla pathaopa nahta, Âmo cha a hu ta hmô ta, Ama uah ha tyh; Chatanachata sâh sihpa hawhta, Chothyu ta a phaoh pathlah ha tyh ei.

²⁵ “Ahy nata ma na pakho aw ei chi ta, Ahy tlu ta ma eina rao aw ei chi?” Mo Pathaihpa ta a tah.

²⁶ Avâ lâ nama mo khaih u la moh tua u, Khizy khi ahy taopa ma a châ tly? Ano cha avâ liata a ypazy khi miakha miakha ta paysa ta, Ama moh chyu ta a awtuhpa a châ. A thatlôna rônahpa nata a hmotaotheina thatlôna vâta, Miakha hmah a ki leipa y veih ei.

²⁷ Hy Zakaw, khazia hetana heta tah chi ta, He Izarei, khazia hetana heta na reih? Khazia, “Ei lâpi cha Abeipa tawhta nyupa châ ta, Ei Khazohpa ta ei thâtih pachâ khoh vei,” na tah thai?

²⁸ Pahno beih va chi ma? Thei beih va chi ma? Abeipa cha tlyzaw Khazohpa châ ta, Khizaw kaokih a Taotuhpa mah a châ tâh. Panao beih leipa ta, A thachhâ beih vei; A novâhzie chhao, A laichadai thei awpa rimâ châ vei.

²⁹ Panaopa hnohta hmotaotheina pie ta, Chiehleipa châta thatlôna a papôh tyh.

³⁰ Thyutliazy ta panaopa ta ama tha chhâ aw ta, Satliazy rietheipa ta ama pao aw.

³¹ Abeipa a hâtuhpazy deikua cha, Ama thatlôna pathieh aw ei ta, Pahmôhpi hawhta mathlaw ta amâ zaw aw; A râ aw ei ta, Ama tha chhâ leipa aw ta; Sie aw ei ta, Panao aw veih ei.