ISAI 4 - Mara Bible RV (BSI)

¹ Cha noh liata, chanô pasari ta chapaw pakha patu aw ei ta, “Keimo pati nie aw pi ta, keimo chysiazy eimâ tao aw, na moh deita miah paphaosa la, eima nozana miah chhiehruhpa mah y,” ama tah aw.

Zerusale paduapathina

² Cha noh liata, Abeipa chiah cha a ngia ngaitapa ta rônah ngaita aw ta, râh theizy cha Izarei laibâhpazy châta amâ palaikheipa nata ama rônahna a châ aw.

³ Zaio liata siesaipa nata Zerusale liata a nguapa, Zerusale liata a hrohpa moh ropazy cha pathaihpa tahpa ama châ aw.

⁴ Abeipa ta Zaio sawchanôzy thuhnyna cha pathai aw ta, Zerusale liata thisaih a kiahpazy cha pachiana thlahpa nata mei thlahpa ta a pasi aw.

⁵ Chatawhcha Abeipa ta Zaio Tlâh liata pahrâna su zydua chô liata nata pakhypi a hmâhpa zydua chô liata, nohchhô ta meihdo, zâ ta meikhuh nata meipaleih khaihna a paysa aw. Cha hmo rônahpa zydua chô lâta khuna y aw ta,

⁶ cha cha nohchhô noh lo nota nohdi a chhai nawpa byureih châ aw ta, thlihpipa nata vâsua tawhta a boh nawpa ta a chhaina byureih a châ aw.