ISAI 39 - Mara Bible RV (BSI)

Babylaw tawhta lyuhchâpazy

¹ Cha daihti liata, Bâladâ sawchapawpa Babylaw bei Merôdâ Bâladâ ta Hezekia tlâhleipa thâtih vaw thei ta. Hezekia lâta vyuhtuapazy tuah ta, châ nata kuhria zy paphao ta.

² Hezekia ta âmo cha a ly kawpa ta a vaw ly ta. A ryusôhpa sona o zydua pamosa ta. Tâkâzy, ngôhzy, ia-ôzy, sathaw sôhpazy nata a chariah chhaichhizy â kipa ta pamosapa ta, ryusôhpa sopakhyna ozy liata a ypazy pahmô khai ta. A o liata hmo a ypa nata a râh chhôh liata hmo a ypa zydua Hezekia ta âmo a pahmô leipa y vei.

³ Chatawhcha hrohsopa Isai cha Bei Hezekia lâ vawh ta, a hnohta, “Kha chyhsazy kha khâpa bie ma ama reih? Khataih tawhta nâ lâ a vypa ma ama châ?” tah ta. Hezekia ta, “Râh hla ngaitapa, Babylaw râh tawhta kei lâ a vypa ama châ,” tah ta.

⁴ Isai ta, “Na o liata khâpa ma ama hmô?” tah ta. Heze­kia ta a chhy ta, “Ei o liata a ypa zydua ama hmô khai. Ei hmo sopakhyna ozy liata hmozy âmo ei pahmô leipa ei y vei,” tah ta.

⁵ Isai ta Hezekia hnoh­ta, “Pheisaihzy Abeipa bie nathlie teh:

⁶ Pachâ teh, na o liata a ypa zydua nata châ pathlatuhpazy ta tanoh taihta ama vaw pachôpakhypa hmo zydua Babylaw lâ ama siekhei nawpa nohzy a vaw tlô hai. Khâpa hmah pahlôhpa châ aw vei, Abeipa ta a tah.

⁷ Na sawchapawpa, na chhôh tawhta a pua awpa, nâ ta na sa awpazy tlai chhao siekheipa châ aw ei ta, Babylaw abei o liata hrilyupa ta ama y aw, a tah,” tah ta.

⁸ Hezekia ta Isai hnohta, “Abeipa bie na reipa cha a pha na,” tah ta. “Ei hro chhôh ta cha thlalôhna nata abohna a y aw,” tahpa ta a pachâpa vâta, cha bie cha a reipa a châ.