ISAI 38 - Mara Bible RV (BSI)

Hezekia pasana nata tlâhna

¹ Cha nohzy liata, Hezekia cha thi daihmâpa ta pasa ta. Amôza sawcha­pawpa hrohsopa Isai ano lâ a vy ta, a hnohta, “Abeipa ta hetana heta a tah: ‘Na chhôhkha khihsatôhtuzie awpa paryh teh, na thi aw, hroh aw va chi,’” tah ta.

² Hezekia cha a hmia pâhchhô la paheipa ta Abeipa lâta thlahchhâ ta,

³ “Hy Abeipa, na hmiakô liata ngâchhihpa nata palôh phao phapakipa ei hnei tyhzie nata na mohmô liata hmo phapa ei tao tyhzie zy kha ngiachhiepa ta a thei thlâh ha mah y,” tah ta. Hezekia cha thata cha ta.

⁴ Chatawhcha Abeipa bie Isai hnohta vaw tlô ta,

⁵ “Vawh la, Hezekia hnohta, Abeipa châ pathlatuhpa Dâvi Khazohpa ta hetana heta a tah: ‘Na thlahchhâna thei na ta, na mothlihzy ei hmô haw. Nathlie teh, kô hrawh hleipangawh ta na hro ei pasisa aw.

⁶ Nâ nata khihpi he Asuria bei tawhta cha pachha aw ei na ta, khihpi he ei pabohsa aw.

⁷ He he Abeipa ta bie â taih hapa cha a tao tlai aw tahpa na châta Abeipa tawhta ngiana a châ aw:

⁸ Moh teh, Ahâza Sanâh liata zâlâ nohpahlipa hao keih hrawh ei pakuasa aw,’ a tah,” tah ta. Chatanachata Ahâza Sanâh liata nohpahlipa cha keih hrawh kua ha ta.

⁹ He he Zudâh bei Hezekia ta a pasana tawhta a tlâhna hla a phipa a châ:

¹⁰ Ei locho nota ma sie aw na ta, Ei chhâ ei palo hmâ leina kôzy cha, Athihkhih liata ei hmâh aw? Tahpa ta ei vaw pachâ hmâ haw.

¹¹ Abeipa hmô thei khao ngyu leipa aw na ta, Ahrohpazy râh liana heta, Abeipa hmô thei khao ngyu aw va na; Khizaw chyhsazy hry liana heta, Chyhsapa moh heih thei khao ngyu aw va na, Tahpa ta ei vaw pachâ hmâ haw.

¹² Mietaku vaituhpa poh o hawhta, Ei pahrâna phiapa ta kei tawhta pasiepa châ ta; Thaisatuhpa thai lopa hawhta, Ei hrona cha loh na ta, Thai tawhta eina tai pachhô haw. Chhô tawhta zâ lâ pangaipa ta, Chhâna lâ einâ chhi chi.

¹³ Khihdeina taihta ei tiama hualua; Chakeibarôhneipa taozie hawhta, Ei ru zydua na thlie khai ha ta, Chhô tawhta zâ lâ pangaipa ta, Chhâna lâ einâ chhi chi.

¹⁴ Siviah nata vawpô zy hawhta sâh na ta, Vachhuh hawhta ei rôh. Chô lâ saipa ta ei mozy a bâ khai haw. Hy Abeipa, tlybaipa ta ei y hih, Ei bohna châta sôhkâ na châpa mah y!

¹⁵ Khâpa ma ei reih khao aw? Abeipa ta ei hnohta bie reih ha ta, Ano tlai ta a tao ha he zaw. Ei hro vâsâhnazy vâna heta, Ei hro chhôh kô zydua cha, A chado kawpa ta ei hmâh bâ aw.

¹⁶ Hy Abeipa, cha hawhta taopa vâta, Chyhsazy hroh tyh ei ta, Ei thlahpa chhao, Chazy liana chata hrona a hmô. Na patlâh la, Hrona na pie mah y.

¹⁷ Pachâ tua, nôpona thata ei tyhpa kha, Keima pha nawpa châta tlao a vaw châ. Châhrasala kyhpachâna ta ei hrona na pachha chi ta, Raona khaohtlô tawhta eina pachha ha chi; Ei moleina zydua kha, Na hnohky lâ na thy khai haw.

¹⁸ Chavâta Athihkhih ta cha reithai thei leipa ta, Thina ta cha palyupalih thei vei. Khaohtlô lâ a zupazy ta cha, Na ngâchhihna hnabeiseih thei veih ei.

¹⁹ Tanoh ta ei taopa hawhna heta, Ahrohpa, a châ na, ahrohpa deita ta Alyna bie cha hlâ thei aw ta; Paw ta sawzy hnohta Na ngâchhihna a pahnosa aw ei.

²⁰ Abeipa ta na pachha aw ta, Chavâta ei hro chhôh zydua ta Pyungiapa ri chhaopa tôpa ta, Abeipa o liata hla ei sa aw.

²¹ Isai ta, “Theiku viahchhâ la ei sala, abei kheihluh liata bai ei sala, a tlâh aw,” a tah nota,

²² Hezekia ta, “Abeipa o lâ ei khy heih awpa ngiana cha khâpa ma a châ aw,” tahpa ta a vaw hiahripa kha a châ.