ISAI 36 - Mara Bible RV (BSI)

Senâkeri hraona

¹ Bei Hezekia kô hrawh hleipalih â bei kô ta, Asuria bei Senâkeri ta Zudâh râh liata thokhy hneipa khihpi zydua khyhnao ta, la khai ha ta.

² Asuria bei ta Râbâsake cha pheisaih hluhpi chhaota Lakhi khihpi tawhta Zerusale liata Bei Hezekia lâ tuah ta. Machhua tipo ti lâpi kiapâh liata Apasuna Lyu lâ siena lâlai liata a duah ta.

³ Abei o hyutuhpa Eliakima, Hikia sawchapawpa nata chârohtuhpa Sebanâ nata thâtih rohtuhpa Zôah, Asâpha sawchapawpa zy ano lâ a zu ei ta.

⁴ Râbâsake ta ama hnohta, “Hezekia cha kei chho teh u: ‘Bei rônahpa Asuria bei ta hetana heta a tah: Khâpa ma nâ ngâchhâ?

⁵ Bie thlâhthlipazy cha a dyuhzie thaina nata hmotaotheina hawhta ma na pachâ? Ahy a ngâchhâ chi ta ma, tahmâ einâ dyuh chi?

⁶ Pachâ teh, Izi a ngâchhâ chi ta, Izi cha lohthi tliepa-ipa chôchahrei châ ta, a pachyuna châta ano a chhôtuhpa kupazah a chhô tyhpa a châ. Izi bei Phiraoh cha ano a ngâchhâpazy chô liata cha hawhta a tao tyhpa a châ.

⁷ “Keimo la Abeipa eima Khazohpa na eimâ ngâchhâ,” nama tahpa chhao ta, ano cha Hezekia ta Zudâh râhsawzy nata Zerusale khihsawzy hnohta, “He maisâh hmiakô lia deita ta namâ chhy awpa a cha,” tah ta, a su sâhpazy nata a maisâhzy a parao khai hapa kha châ vei ma?

⁸ Tahmâ a vy la, ei zibeipa Asuria bei hnohta sôhkâ pie awpa ta bie a taih teh. Keima lâ tawhta cha, arâ pheisaih sâh no na hnei khiahta cha, arâ sâh no ei cha pie aw.

⁹ Talailih nata arâ pheisaih zy kyh liata Izi nâ ngâchhâ chhôh zydua cha, kheihta ma ei zibeipa chakaotuhpa chyh chaipazy hry liata pheisaih hyutuhpa pakha chhao he na pakhâ thei aw?

¹⁰ Cha dei châ vei, he râh parao awpa heta, Abeipa a hlao leipa ta a khypa ma ei châ? Abeipa ta ei hnohta, “Cha râh cha khyhnao la kaw parao teh,” eina tahpa vâta â khypa mah a châ tâh,’” tah ta.

¹¹ Eliakima, Sebanâ nata Zôah zy ta Râbâsake hnohta, “Ngiachhiepa ta châ chakaotuhpazy he Aramia reih ta bie miah chho teh. Aramia reih eima thei thlâh haw. Thokhy chô liata chyhsazy nah theina liata Zudâh reih ta rie miah chho khah y,” tah ei ta.

¹² Châhrasala Râbâsake ta, “Ei zibeipa ta he biezy he na zibeipa hnohta nata nâma hnoh dei ta reih awpa ta ma eina kaw tuah? Thokhy chô liata a tyuhpa, nama hnohta ama ie nie ta, ama pazô a doh awpazy hnohna chhao heta reih awpa ta eina kaw tuahpa châ vei ma?” tah ta.

¹³ Râbâsake cha a duah ta, Zudâh reih ta ao paro ngaitapa ta awh ta, “Bei rônahpa Asuria bei biezy he nathlie teh u!

¹⁴ Abei ta hetana heta a tah: ‘Hezekia a padôveisa khuh vy, ano ta cha pachha thei aw veih ei.

¹⁵ Hezekia ta, “Abeipa ta miah pachha tlai aw ta, he khihpi he Asuria bei ku liata piepa châ aw vei,” tahpa ta, Abeipa a ngâchhâ chhei awpa ta cha tao khah ei sy.

¹⁶ Hezekia bie nathlie khuh vy. Asuria bei ta hetana heta a tah: Nâ ryh u la, kei lâta vaw pua teh u. Chatanachata nama kre zôh chyu tawhta nie pazao aw ei chi ta, nama theiku kô chyu tawhta niepa ta, nama tikhaoh chyu tawhta tizy nama doh pazao thei aw.

¹⁷ A vy aw na ta, nâmo râh hawhta sâh nata kresawhti puana râh, viahchhâ nata kre sadôzy yna râh lâ ei châ chhi hlâlei ei cha, cha hawhta nama râh liata nama y lymâ aw.

¹⁸ Hezekia ta, “Abeipa ta miah a pachha aw,” tahpa ta a châ chhi chhei lei nawpa ei ta a vaih teh u. Râh hropazy khazohzy hry liata, Asuria bei ku tawhta a râh a pachha theipa khazoh a y beih ma?

¹⁹ Hâmathi khihpi nata Apâ khihpi khazohzy kha khataih liata ama y haw? Sephavai khazohzy khataih liata ama y haw? Samâri khihpi kha ei ku tawhta ama pachha rai ma?

²⁰ Ahy râh khazohzy kha ma ei ku tawhta ama râh a vaw pachha ha ei? Abeipa chata Zerusale he ei ku tawhta zua a pachha aw ma?’ a tah,” tah ta.

²¹ Bei biepiepa ta, “A chhy khuh vy,” a tah hapa vâta, zawpizy cha a chalih thlâh ha ei ta, kawh kha hmah a chhy veih ei.

²² Chatawhcha Hikia sawchapawpa abei o hyutuhpa Eliakima, chârohtuhpa Sebanâ nata Asâpha sawchapawpa thâtih rohtuhpa Zôah zy cha ama chysiazy hriepa ta Hezekia lâ vawh ei ta, Râbâsake bie reipazy cha kei chho ei ta.