ISAI 35 - Mara Bible RV (BSI)

Khazohpa chyhsa kua heihna

¹ Râhchawhpa nata râh raohpa zy a ly aw ei ta, Sadi su chhao thaphapa ta y aw ta, Rôspaw hawhta a pawh aw.

² Râhchawhpa ta a paw pakai aw ta, Thaphapa nata hla sapa ta â ly aw. Lebanaw rônahna a hnohta piepa châ aw ta, Kâmel nata Saraw angiana chhao, A hnohta piepa a châ aw. Abeipa rônahna hmô aw ei ta, Eima Khazohpa angiana ama hmô aw.

³ Ku chiehleipazy cha thapatlô u la, Pakhu chalyupazy pa-i teh u.

⁴ Palôh duapazy hnohta hetana heta tah teh u: “Chi leipa u la, thatlôpa ta y teh u! Pachâ teh u, nama Khazohpa cha, Phuh lana chhaota a vy aw ta, Khazohpa viarithôna chhaota â vy aw. A vy aw ta a cha pachha aw ei.”

⁵ Cha tita cha, mochaopazy mo pavâsapa châ aw ta, Nahpâpazy nah pavâsapa a châ aw.

⁶ Pheisypa sakhih hawhta a chapie aw ta, Reih pathlie thai leipa paleih chhao, Thaphapa ta hla a sa aw. Râhchawhpa liata tizy pua aw ei ta, Sadi bypizy liata vahtie tizy ama loh aw.

⁷ Sadi sahpa su cha tipo lâta a lie awh ta, Chhaohlei chawhkaraipa su chhao, Tihnawhzy yna lâta â lie aw. Savaizy tlaihna liata amâ byu tyhna suzy liata, Sibiepa nata lohthi zy pyuh aw ei ta, Maitanô zy ama pyuh aw.

⁸ Cha liata lâlai y aw ta, Pathaihna Lâpi tahpa a châ aw; Pathaihna lâpi a chhihtuhpazy châta châ aw ta, Pathaih leipazy ta a chhih aw veih ei; Moleipa ahrupazy chhao, Cha liata sie aw veih ei.

⁹ Cha lâpi liata cha, Chakeibarôhneipa y leipa aw ta, Sahrâhpa a vy aw vei; Chazy cha, cha liata hmô awpa y leipa aw ta, Chatlaipazy ta, cha lâpi cha amâ chhih aw.

¹⁰ Abeipa chatlaipazy cha kua heih aw ei ta, Hla sana chôta Zaio ama pangai aw. Chhâzaw alyna ama luh chô liata y aw ta, Thaphana nata alyna hmô aw ei ta, Pachârôhna nata ahrôna y khao aw vei.