ISAI 33 - Mara Bible RV (BSI)

Ngiachhie ahawna

¹ Nâ, a pahleipadiatuhpa y, Pahleipadiapa châ mâh vei hra la, Na hu a po na! Nâ, a paphasaituhpa y, A paphasaipa châ mâh vei hra la, Na hu a po na! Chyhsa na pahleipadiapa tawhta nâ chalih tita, Pahleipadiapa châ hra aw chi ta; Nâ paphasaipa na patlô tita, Ama châ paphasai hra aw.

² Hy Abeipa, eima cha hâ thlâh haw, Miah ngiachhie mah y. My tato ta eima bâh châ la, Nôpona daihti liata eima pachhana châ mah y.

³ Tyhreihna pyu vâta phopizy a râ ei ta, Hy Abeipa, na thyu tita râhzy ama pai lymâ.

⁴ Hy phopizy saih u, nama hraona sôhzy cha, Chângyu chhohna pakhypa hawhta pakhypa châ aw ta, Khawsuzy a zawpa hawhta a zawhnaopa a châ aw.

⁵ Vâ chô sâhpa liata a pahrâpa a châpa vâta, Abeipa cha cheihchalopa ta y ta, Zaio cha adona nata siana ta a pabie aw.

⁶ Ano cha na hro chhôh ta nâ ichana a châ aw; Na pachhana sôhpa châ aw ta, Na sona nata na pahnona a châ aw; Abeipa china cha Zaio ryusôhpa a châ.

⁷ Nathlie tua u, ama pasaiphazy khôtho liata awh ei ta, Adyhna lyuhchâpazy thata ama cha.

⁸ Lâlaizy pathaih parohpa ta y ta, Khitlyhpa y khao veih ei. Biehrai parao ei ta, Khihpizy khâpasaw ta reih leipa ei ta, Chyhsa hrona chhao pachâ khao veih ei.

⁹ Râh cha mâchhiesapa ta panao ta, Lebanaw cha nohzaopa ta a uah lymâ. Saraw bypi cha râhchawhpa lyu ta, Bâsanâ nata Kâmel chhao ama hnazy a zô khai haw.

¹⁰ Abeipa ta hetana heta a tah: “Tahmâ cha thyu aw na ta, Tahmâ cha keimasasyh a chalo aw na ta, Tahmâ cha cheihchalopa ta ei y ha aw.

¹¹ Saviah saw phaoh ei chi ta, Sawphao saw nama sa; Nama hu cha nâmo châ kâ awpa mei a châ.

¹² Chinaih lô raopa hawhta, Phopizy cha mei ta raopa châ aw ei ta; Ahlohzy chhawh ta mei ta raopa hawhta, Âmo chhao taopa ama châ aw.

¹³ Nâmo, lâhlapi liata a ypazy saih u, Ei hmo taopa thâtih thei u la; Nâmo, lâhnia liata a ypazy saih u, Ei hmotaotheizie pahno teh u.”

¹⁴ Zaio liata moleipazy cha chipa ta y ei ta, Khazohpa a pachâ leipazy amâ chalyu; “Eima hry liata ahy ma Mei kâ haipa hnohta a pahrâ thei aw? Eima hry liata ahy ma Tlyzaw ta a kâpa hnohta a pahrâ thei aw?” ama tah.

¹⁵ Siana ta chareipa ta bie dopa a reihpa, Avyuhna taopa ta athôhna hmôpa a dythapa, Panaopapana la lei awpa ta a ku a phaihpa, Thisaih palona bie a thei lei nawpa ta a nah a chahupa, Moleina lâ mo lei awpa ta a mo a pasopa,

¹⁶ Cha chyhsa tlai cha su sâhpa liata a pahrâ aw. Â chhaina su cha lôpanô thokhyzy châ aw ta, A nie awpa piepa a châ aw; Ti a do awpa chhao chie aw vei.

¹⁷ Na mozy ta abei angiana hmô aw ta, Râh kawh ngaitapa a sai aw.

¹⁸ Chichhihpa nâ tyhpa kha, Na palôh ta pachâ sualuah aw ta, “Maluh reihtuhpa kha khataih liata a y haw? Râhpaw pathliahtuhpa kha khataih liata a y haw? Riahvaina o sâhpazy a pakituhpa kha Khataih liata a y haw?” a tah aw.

¹⁹ Na thei leipa reih hropa a cheihpa phopi kha, Hmô khao leipa aw chi ta; A paleih a pahluapahlypa vâta, A bie reipa na no a vâh leipa Phopi a hrâh ngaitapa kha, Hmô khao aw va chi.

²⁰ Zaio cha moh tua u, Kyh eima chhi nawpa khihpi cha! Na mozy ta Zerusale khihpi cha a hmô aw. Cha khihpi cha nôpona y leina khihpi châ aw ta, Pasie thei leipa poh o a châ aw. A tôhzy phiapa châ beih leipa aw ta, Paraina ri kheihawhpa hmahta chhiepa châ aw vei.

²¹ Cha liata Abeipa cha a rônahna chhaota, Eima châta chavah kawhpa hawhta châ aw ta, Vahtiepazy hawhta a châ aw; Cha liata balyh hiana chhaopazy sie leipa aw ei ta, Balyh laipazy ta siepahlie aw veih ei.

²² Abeipa cha miah pachiatuhpa châ ta, Abeipa cha ryhpa miah pietuhpa a châ. Abeipa cha eima bei châ ta, Ano ta miah a pachha aw.

²³ Na chaorizy padaopa châ ta, Poh zawna tôh pa-i thei leipa ei ta, Balyh poh pakai thei vei. Hraona sôh hluhpizy raipa châ aw ta, Pheisypazy chhao ta amâ phao hra aw.

²⁴ Khihsaw ahy hmahta, “Tlâh va na,” tah khao leipa aw ei ta; Cha liata a pahrâpa phopi cha, Ama moleina a ngiahthaipa a châ aw.