ISAI 32 - Mara Bible RV (BSI)

Bei siapa

¹ Pachâ teh u, siana ta ryu a reih awpa bei vaw pua aw ta, Beimachâzy ta adona ta ryu ama reih aw.

² Thlih tawhta anyuna su châ chyu aw ei ta, Chothyu tawhta anyuna su ama châ aw. Su chawhpa liata vahtie tizy hawhta châ aw ei ta, Râh rietheipa liata lôpanô nohpahli hawhta ama châ aw.

³ Mo pavâpazy mo cha paso khao leipa aw ta, Nah theipazy nah ta a nathlie bâ aw.

⁴ Palôh charâpa palôh cha, Novâhpa ta pahno thai bâ aw ta; Reih chaawpa paleih chhao, A siapa ta bie a reih thei bâ aw.

⁵ Ahrupa cha zachhihpa tah khao leipa aw ei ta, Moleipa chhao ngâchhihpa tah khao aw veih ei.

⁶ Ahrupa cha hruna bie reih ta, Hmo moleipa tao awpa sai a pachâ tyh. Khazohpa kho leipa hmozy tao ta, Abeipa kyh liata bie doleipa a reih tyh. Nodipazy nie paky ta, Dâhphipazy ti pado vei.

⁷ Moleipa châta la, A hmobaohzy taihta pathaih leipa a châ. Haipa biezy hmâpa ta dyhchhiepazy parao a chhuah ta, Amâ do thlâh hana chôta phahlapazy parao a chhuahpa ta, Hmo pha leipazy a pachhuapanoh tyh.

⁸ Zachhihpa deikua cha, Zachhihpa hmozy pachhuahpanoh ta, Zachhihpa hmozy liata â duah tyh.

Chanô chhôhmohpazy zikyurâna

⁹ Nâmo, pachâ pha kawpa ta a ypa chanôzy saih u, Thyu u la, ei ao nathlie teh u; Nâmo, chhôhmoh kawpa ta a ypa sawchanôzy saih u, Ei bie lâ nama nah pachôh teh u.

¹⁰ Nâmo, chhôhmoh kawpa ta a ypazy saih u, Kô kha hleipata liata nama nô a po aw; Kre kô veih leipa aw ta, Theilâpa kô chhao veih aw vei.

¹¹ Nâmo, pachâ pha kawpa ta a ypa chanôzy saih u, A chalyu u la; Nâmo, chhôhmoh kawpa ta a ypazy saih u, Nôpopa ta y teh u. Nama chysia pahluhpa ta thluahruapa ta y u la, Nama chai liata latho poh a saih teh u.

¹² Lyu pha kawpazy ta Kôvei papua khao leipa ei ta; Kre zôh pathei pha kaw tyhpazy ta Ama pathei khao leipa vâta, Nama chachôhna a chô u la, Chaphôhtu teh u.

¹³ Ei phopi chhaohlei chô liata Ahloh nata diahsai zy pyuh ta; Khihpi haosai phapa liata a ly kaw tyhpazy o liata Alyna y khao vei; Chavâta nama chachôhna a chô u la, Chaphôhtu teh u.

¹⁴ Abei o cha siesaipa châ aw ta, Chyhsa hluhpi pahrâna khihpi chhao puasaipa a châ aw. Tlâhthlôh nata riahvaina o sâhpa zy chhao, Lôpuzy lâta chhâzaw ta amâ lie aw. Lyurâhpa alâzy alyna châ aw ei ta, Mietakuzy tlaihna ama châ aw.

¹⁵ Chô lâ tawhta Thlahpa hrypa eima châ tita, Râhchawhpa cha lei phapa lyu lâta a lie aw ta, Lei phapa lyu cha râhmâhpa a lyu hlâlei cha, Cha hawhta a châ aw.

¹⁶ Cha tina cha râhchawhpa liata adona charei aw ta, Lei phapa lyu cha siana ta a ypâ aw.

¹⁷ Siana ta thlalôhna sa aw ta, Siana theilâpa cha, Chhâzaw sidiana nata hnangâhna a châ aw.

¹⁸ Ei phopi cha, Thlalôhna râh liata pahrâ aw ei ta; Abohna su liata pahrâpa ta, Apahâna sidiapa zy liata ama pahrâ aw.

¹⁹ Pareih ta râhmâhpa chanaoh ta, Khihpi paby khai ha hra sala,

²⁰ Chavah kiah to liata chi cheih aw ei chi ta, Viahchao nata alâ zy kho ta patlaihsapa ta, Thaphapa ta nama y aw.