ISAI 30 - Mara Bible RV (BSI)

Izi a ngâchhâ lei awpa ta zikyurâna

¹ “Saw chhorupazy ama hu a po na,” Abeipa ta a tah. “Ryhraona tao ei ta, Châhrasala keima ryhraopa châ vei; Azaona tao ei ta, Châhrasala ei Thlahpa ta taopa châ vei. Chavâta moleina ama baichha via lymâ.

² Phiraoh thatlôna a chhaipa ta, Izi nohpahlipa liata a nyu awpa ta, Kei nâ saohiah tua leipa ei ta, Izi râh lâ zu awpa ta amâ thao.

³ Chavâta Phiraoh thatlôna cha, Nama nozana châ aw ta; Namâ nyuna Izi nohpahlipa cha, Nama nohzaona a châ aw.

⁴ Phiraoh beimachâzy Zônâ khihpi liata y ei ta, A lyuhchâpazy Hâne khihpi ama tlô hapa chhao ta,

⁵ Chyhsa to nozapa ta ama y. Izarei sawzy châta phahnaina hnei leipa phopi châ ei ta, Baona tlôkhei veih ei; Athôhna tlôkhei hra leipa ei ta, Nozana nata nozaohna a tlôkheituhpa deita ama châ,” Abeipa ta a tah.

⁶ He he Neke râhsazy kyh chhochhieliena bie a châ: Neke cha nôpona nata thlazohna râh a châ; Chakeibarôhneipa panô puana râh châ ta, Chakeibarôhneipa tôhpa puana râh a châ; Vâzi puana râh châ ta, Parih a zaw theipa puana râh a châ. Cha râh tawhna chata, Ama châta phahnaina a hnei leipa phopi pie awpa ta, Ama hneirônazy cha, Alâzy paphaosa ei ta; Ama ryusôhpazy cha, Râraoseihpazy ky byuhpa liata ama paphaosa.

⁷ Izi baona cha phahnai leipa châ ta, Aruapa a châ; Chavâta Izi cha, “Rahâbi a tyuh molopa,” Tahpa ta a moh ei bi.

Reingiah leipa phopi

⁸ Tahmâ he sie la, cha biezy cha, Ama hmiakô liata lôphiapa liata roh la, Châbu liata chhao roh teh; Chatanachata daihti vaw y awpazy liata, Chhâzaw nata tlyzaw ta pahnokheituhpa a châ aw.

⁹ Phopi chhorupa châ ei ta, Saw haihthaipa, Abeipa pachuna bie a thei khoh leipa sawzy ama châ.

¹⁰ Hmôtheituhpazy hnohta, “Aluahna hmô khao khah u,” tah ei ta, Hrohsopazy hnohta, “Hmo dopa aluahna miah pahnosa khao leipa u la, Bie khochhihpazy tlao miah chhopa ta, Phichhyhpa hrohsona biezy tlao phuah teh u.

¹¹ Lâpi siesai u la, Lâthlôh tleisai teh u; Izarei Mo Pathaihpa thâtih chhao, Miah chho khao khah u,” ama tah.

¹² Chavâta Izarei Mo Pathaihpa ta hetana heta a tah: “Ei bie dythapa ta, Tlybaina tlao ngâ ei chi ta, Dôveina liata namâ pahniehpa vâta,

¹³ Cha moleina cha, Nama châta thokhy a sâhpa liata a pyupa hawhta châ aw ta, A kei laih lymâpa hawhta a châ aw; Eikhapi ta pao ta, Movi hlâta a pao hapa hawhta a châ aw.

¹⁴ Alei beih a dizao khai hana taihta taichheih ei ta, A keina hry liata chakoh mei la nawpa Beihkaopa dâhdei y khao leipa ta, Tikhaoh ti thai nawpa chhao a y khao leipa hawhta, Moleina liata a paopazy cha ama châ aw.”

¹⁵ Abeipa Zehôvâh, Izarei Mo Pathaihpa ta hetana heta a tah: “Rona nata apahâna liata nama pachhana y ta, A thlih thlâh hana nata ngâna liata nama thatlôna a y.” Châhrasala khoh leipa ei chi ta,

¹⁶ “Châ vei! Arâ kiah aw pi ta, Eimâ râ ha aw,” tah ei chi ta, Chavâta namâ râ tlai aw; “Arâ chahrapa eima kiah aw,” tah ei chi ta, Chavâta châ chadaituhpazy chhao, Chahra ngaitapa ama châ aw.

¹⁷ Chyhsa pakha pachhiparypa ta, Sâh kha a râ aw ei ta; Chyhsa papangawh pachhiparypa ta, Namâ râ khai aw. Achhâna lâta cha, Tlâhpi laki liata pohraipa tôh hawhta, Siesaipa châ aw ei chi ta; Tlâhthlôh liata ngiana poh hawhta, Siesaipa nama châ aw.

Ngiachhietuh Abeipa

¹⁸ Chatahrasala Abeipa cha, Cha ngiachhie awpa ei ta cha hâ thlâh ha ei ta; Nama chô liata zawngiahna palâsa awpa ta, Anosasyh ta â cheihchalo aw. Abeipa cha adona Khazohpa châ ta, Ano a hâtuhpazy cha vânoh ama to aw.

¹⁹ Hy Zerusale liata a pahrâpa Zaio phopi y, cha khao aw va chi. Na awna ao vâta Abeipa ta cha ngiachhie tlai aw ta, a theipa nahta, a cha chyh-ei aw.

²⁰ Abeipa ta nôpona viahchhâ nata pasataona ti cha vaw pie ha hra sala, châ Pachutuhpa cha a nyu khao leipa aw ta, na mo ta châ Pachutuhpa cha a hmô aw.

²¹ Chachâh lâ tlyma, chavei lâ tlyma, namâ heih nahta, nama nahzy ta, “He he lâpi a châ hih, he lâpi he a chhih teh u,” tahpa ta, nama hnôh lâ tawhta bie a vaw puapa nama thei aw.

²² Chatawhcha tho khazoh nothlahpa nama khiepa, tâkâ ta nama pahupa nata thua khazoh nothlahpa nama leihpa, ngôh ta nama pahupa zy cha nama papuapalei aw. Hmo pathaih leipazy thy aw ei chi ta, ama hnohta, “Sie syulyu ha teh u!” nama tah aw.

²³ Chhaohlei liata na tupa chizy châta Abeipa ta vâsua cha pie aw ta, chhaohlei tawhta niedo phapa hluhpi a pua aw. Cha noh liata, nama sahrohzy cha sibiepa su kawhpazy liata ama lao bâ aw ei ta,

²⁴ lei a paliepa viahchao tôhpazy nata alâzy cha, tuphia nata thuaku zy ta pasia chiehpa sahroh laozy ama nie aw.

²⁵ Riahvaina o sâhpazy pao ha ta, thata athietuna noh liata, tlâh sâhpa to nata tlâh byuhpa to liata vahtiezy ama loh zaolao aw.

²⁶ Cha dei châ vei, Abeipa ta a phopi hmahphaopa chahry ta, âmo a tuna hmah a patlâh noh liata, thlâpâ cha noh tlu ta khaih aw ta, noh chhao a lie sari ta khaih aw ta, noh sari chhôh a khaihpa zie a khaih aw.

Asuria hriena

²⁷ Moh teh u, Abeipa moh cha lâhlapi tawhta â vy huh; A hiehâhna mei hawhta ia ta, Meikhuh chhakaluhpa liata a kiah; A hmaozy ruchhôna ta bie ta, A paleih chhao lyurâh a charôhpa meipaleih a lyu.

²⁸ A hu cha vahtie a kao a khôpa lyu ta, Rao taihta a khôpa a lyu; Paraona sohhri ta phopizy cha ri ta, Phopizy pakah liata chhâri pabaw ta, Â chhi chhei tyh ei.

²⁹ Zâ kyhchhi pathaihpa hnei no hawhta hla sa aw ei chi ta, ramo tôna chôta Abeipa tlâh lâ khy ei ta, Izarei Lôpanô lâ ama khy no hawhta palôh thaphapa ta nama y aw.

³⁰ Chatawhcha hiehâhna ru ngaitapa nata meipaleih a kâ ngâpa hry liata nata, thlihpi nata vâsua nata pareih hry liata, Abeipa ta a ao rônahpa cha thei thei awpa ta papua aw ta, a ku pathlapa cha hmô thei awpa ta a tao aw.

³¹ Abeipa ta a chôchahrei ta a tu tita, Asuria mo cha Abeipa ao vâta china ta a patu aw ei.

³² Abeipa ta chôchahrei rao chiehpa hmâpa ta âmo a tuna maih liata, paotlâ nata totâ zy ta patla panô tyh aw ei ta, a chôchahrei hmâpa ta âmo cha â dyuh aw ei.

³³ Hlâno tawhta mei raona su a chhuanoh hapa a châ. Abei châta chhao a chhuahdy hapa châ ta, tho ti nawpa â thu ngaitapa nata a kawh ngaitapa ta taopa châ ta, mei nata tho hluhpi pahmaohpa a châ. Cha cha kaih vahtiepa hawhta a lohpa Abeipa hu ta a pakâsa.