ISAI 3 - Mara Bible RV (BSI)

Zudâh nata Zerusale pachiana

¹ Moh tua u, Pheisaihzy Abeipa Zehôvâh ta Zerusale nata Zudâh apahniehnazy a la khai ha hih; Niedo zydua la khai ha ta, Ti zydua a la khai haw.

² Pasaiphazy nata pheisaihzy, Ryureituhpazy nata hrohsopazy, Pachaothaipazy nata machâzy,

³ Pheisaih sypangawh hyutuhpazy nata chyhsa molaipazy, Ryhraotuhpazy nata moliethaipazy la ta, Peihthaipazy a la khai ha ei.

⁴ Thyudyupazy cha ama beimachâzy ta tao aw na ta, Hawtizy ta ama chô liata ryu ama reih aw.

⁵ Chyhsazy amâ tlybai raihrie aw: Ama chyhsa châ lâhpazy tlybai aw ei ta, Ama vaihzy ama tlybai aw. Thyutliapa ta machâpa chô liata sâlâ kaw aw ta, Chyhsa nawhpa chhao zachhihpa chô liata a sâlâ kaw aw.

⁶ Chyhsa ta a unawhpa cha a paw o liata patu aw ta, “Nâ cha chysia hnei chi ta, Chavâta eima chhituhpa ta y mah y; He raona â pathlupa he, Na ryureina ry liata a y aw,” tah aw ta,

⁷ Châhrasala cha noh liata a unawhpa ta, “Kei la hmah chahrytuhpa châ aw va na, Ei o liata viahchhâ nata chysia y hra vei, Phopi chhituhpa ta na tao aw veih ei chi,” Tahpa ta â chhy aw.

⁸ Ama bie nata ama hmotaopazy ta Abeipa chakhia ta, A rônahna hmia chhao thlah ama sa leipa vâta, Zerusale cha a chapia ta, Zudâh a pao haw.

⁹ Ama hmia phao ta ama châna palâsa ta, Ama moleina Sawdawmâ hawhta ama phuah; Nyu veih ei. Ama hu a po na! Âmosasyh ta raona amâ taopa a châ.

¹⁰ Mosiapazy cha ama châta a pha aw tahpa chho mah y, Ama hmotaopa theilâpa ama nie aw.

¹¹ Moleipa cha a hu a po na! Chhiena a tyh aw ta, A hmotaopazy viarithôpa a châ aw.

¹² Hawsaihzy ta ei phopi chhihtha ei ta, Chanôzy ta ama chô liata ryu ama reih. Hy ei phopi, châ chhituhpazy ta cha chhihtha chhei ei ta, Nama sie nawpa kyh liata noraihpa ta ama cha tao haw.

¹³ Abeipa cha a ryureina dyuchhai liata a tyuh ta, Phopizy pachia awpa ta â vaw duah.

¹⁴ Abeipa ta a phopi machâzy pachia ta, A chhituhpazy a pachia; “Kre sadô a nie khaipa cha, Nâmo tlai he châ ei chi ta; Nama ozy liata, Dyhchhiepazy hraona sôh a y.

¹⁵ Kheihta ma dyhchhiepazy hmia chariehpa ta, Ei phopi cha nama chanaoh ngâ tly?” Pheisaihzy Abeipa Zehôvâh ta a tah.

Zaio sawchanôzy pachiana

¹⁶ Abeipa ta hetana heta a tah: “Zaio sawchanôzy cha a khotlâh kawpa ta, Ama rao pachhuapa ta a hlaihlâ ei ta, Ama mozy ta sydie ei ta, Ama chao chamieh chamâpa ta, Ama phei lâkyuzy ama parosa laihpa vâta,

¹⁷ Zaio sawchanôzy cha, Abeipa ta ama luh hmah paysa aw ta, Zehôvâh ta luh pôlôpa ta a tao aw ei.”

¹⁸ Cha noh liata, Abeipa ta amâ tobina zydua, ama phei lâkyuzy, luh chazaina pohzy, thlâpâ diehpa lyupa ta taopa pachhihzy;

¹⁹ rahyzy, lâkyuzy, raoao pohzy;

²⁰ luh khunazy, phei kalyzy, chaisaihnazy, ropahâhpa byhzy, chhiena a tyh lei nawpa ta a kypazy;

²¹ kusadizy nata hnapasu rahyzy,

²² kyhchhi chysiazy, ngiatlâh baipa pohzy, viahkao pasipazy, sahriazy;

²³ thlalâzy, poh rih dipazy, khuthozy nata hmiakhunazy a pahluhpa khai aw ei.

²⁴ Ropahâhpa vyuhpa ta hmo thupa vaw y aw ta, Chaisaihna vyuhpa ta chaori a y aw. Sâ mihpa vyuhpa ta luh pôlôna y aw ta, Poh ngiapa vyuhpa ta latho hnorâh y aw ta, Chhithaina vyuhpa ta nozana a y aw.

²⁵ Na chapawzy zaozi ta pao aw ei ta, Na pasaiphazy adyuhna liata ama pao aw.

²⁶ A thokhy chhikaozy cha, Chaphôhtupa ta mâchhiesa aw ei ta; Ziahzirohpa ta alei liata â tyuh aw.