ISAI 29 - Mara Bible RV (BSI)

Zerusale dôhna

¹ Hy Zerusale, Zerusale, Dâvi pahrâna khihpi, Na hu a po na! Kô chareih ta baichha lymâ la, Na kyhchhizy a zao a hmia thlâh mawh sy.

² Zerusale cha a nô papo aw na ta, Mâchhiesana nata chaphôhtuna y aw ta, Ei châta chakoh maisâh hawhta a châ aw.

³ Khihpi padôpa ta riehmozy cha paryh thlu aw na ta, Thokhy a sâhpazy ta cha dôhkhâh aw na ta, Dôhna diahsuazy ei cha chhôh khâh aw.

⁴ Panawhpa ta y aw chi ta, Alei ry tawhta bie reih aw chi ta, Dohlei hry tawhta na reipasipasua aw. Thlahmihpa ao hawhta, Alei tawhta na ao vaw pua aw ta; Dohlei hry tawhta, Huthâpa ta bie na reih aw.

⁵ Châhrasala chihropa na chariahpa hluhpizy cha, Dohlei dipa hawhta châ aw ei ta; Nôchhiepa manôh hluhpizy chhao, Saviah a zawpa hawhta ama châ aw. Movi hlâta, eikhapi ta,

⁶ Pheisaihzy Abeipa ta cha vaw tly aw ta, Tôkalôhpa nata alosihpa chhaota cha vaw tly aw ta, Pyu paro ngaitapa chhaota a cha vaw tly aw; Khisô nata chothyu chhaota cha vaw tly aw ta, Meipaleih charôh ngâpazy chhaota a cha vaw tly aw.

⁷ Zerusale a dyuhpa râhzy liata zawpi zydua cha, Ramâ hawhta châ aw ei ta, Zâ ta aluahna hawhta ama châ aw; Zerusale khihpi nata a thokhy a dyuh ta, Zerusale nô a papotuhpa zydua chhao, Ramâ hawhta châ aw ei ta, Zâ ta aluahna hawhta ama châ aw.

⁸ Zaio Tlâh a dyuhtuhpa râhzy liata zawpizy cha, Nodipa ta a mâ lâta pati nie ta, Châhrasala a kaw hra ta, A nodipa a pai hlei leipa hawhta châ aw ei ta; Dâhphipa ta a mâ lâta ti doh ta, Châhrasala a kaw hra ta, A dâhphi pai hlei leipa ta, A panaopa hawhta ama châ aw.

Izarei mochaona nata haiphiana

⁹ Nama no a pamaoh u la, Nomaohpa ta y teh u; Nama mo a pachao u la, Mochaopa ta y teh u! Pari ei ta, Châhrasala kresawhti vâta cha vei; Paochheichhâ ei ta, Châhrasala sahma vâta châ vei!

¹⁰ Abeipa ta nama chô liata Mokuna thlahpa cha hry ha ei ta, Hrohsopazy ta nama mo cha pasosapa ta, Hmôtheituhpazy ta nama luh ama cha khu haw.

¹¹ Chavâta aluahna cha nâmo châta châbu pakuhpa pachawh khâh hapa hawhta a châ haw. Cha cha chyhsazy ta châ a reih thaipa pie ei ta, a hnohta, “He châbu he reih teh,” tah ei ta, ano ta, “Reih thei va na, pakuhpa ta pachawh khâh hapa châbu a châ hih,” tah ta.

¹² Châbu cha châ a reih thai leipa chyhsa ku liata pie ei ta, a hnohta, “He châbu he reih teh,” tah ei ta, ano ta, “Châ reih thai va na,” tah ta.

¹³ Chatawhcha Abeipa ta, “He phopi heta ama pakah ta nâ vaw hnia ei ta, Ama hmao ta eina palyupalih ei; Ama palôh deikua cha nâ hla kaw ta, Eina china chhao ei cha, Chyhsapa pachuna biepiepa deita a châ.

¹⁴ Chavâta moh teh u, He phopi hry liata hmonoâhpa tao heih aw na ta, Hmonoâhpazy ei tao patho aw. Ama chyhsa sopazy sona lei aw ta, Hmo pahno thaipazy pahno thaina chhao, Nyupa a châ aw.”

¹⁵ Ama ryhraopa Abeipa tawhta nyu awpa ta, Su a thu ngaitapa lâ a pangaipazy cha, Ama hu a po na! Zohna ry liata hmo tao ei ta, “Ahy ma miah a hmô aw? Ahy ma miah a pahno aw?” Ama tah tyh.

¹⁶ Hmo dia nama palie patheih khai haw! Beihvituhpa cha beihlei hawhta pachâpa ta, Hmotaopa ta a taotuhpa hnohta, “Ano ta na tao vei,” a tah thei ma? Hmo paysapa chhao ta a paysatuhpa cha, “Novâhna rai hnei vei,” a tah thei ma?

¹⁷ Bohpi leipa ta Lebanaw cha, Lei phapa lyu ta pachâsapa châ aw ta; Lei phapa lyu cha, Râhmâhpa ta pachâ­pa a châ aw?

¹⁸ Cha noh liata, nahpâpazy ta châbu biezy thei aw ei ta, Mochaopa mozy chhao, A zoh kaluhna tawhta hmô thei aw ta, A zohna tawhta a hmô thei ha aw.

¹⁹ Areisipazy cha, Abeipa liata alyna thiehpa hmô aw ei ta, Chyhsapa hry liata dyhchhiepazy chhao, Izarei Mo Pathaihpa liata thaphapa ta ama y aw.

²⁰ Nôchhiepa leidia aw ta, Pahneisaotuhpa â chalih aw; Hmo pha leipa lâta a mo a padeihpa zydua cha, Chhawh pathlahpa ama châ aw.

²¹ Chazy chata bie ta chyhsa thailei pachâ tyh ei ta, Thokhy chhikao liata chhoreituhpa cha, Ano paao nawpa ta khoheih chôh ei ta; Pahnokheina doleipa hmâpa ta, Mosiapa thailei ama pachâsa tyh.

²² Chavâta Zakaw pathlazy kyh liata, Abeipa, Abarahâ chatlaituhpa ta hetana heta a tah: “Zakaw cha nozapa ta y khao leipa aw ta, A hmia hlâh khao aw vei.

²³ Keima ku ta ei taopa a sawzy a hmô nahta, Ama hry liata ei moh pathaihsa aw ei ta; Zakaw Mo Pathaihpa cha pathaihsa aw ei ta, Izarei Khazohpa cha ama chi aw.

²⁴ Thlahpa kyh liata a paviapazy ta Vaw pahno thai aw ei ta; Reipasipasua thaipazy chhao ta, Pachuna amâ pyh ha aw.”