ISAI 28 - Mara Bible RV (BSI)

Epharai hnohta zikyurâna

¹ Epharai sahma paripazy apalaina lakho cha, A hu a po na! Ama rônahna nata angiana cha, Pawpi a lo haipa hawhta châ ta; Kresawhti iah zaipa, Saikao lei phapa luh liata lakho hawhta a châ.

² Moh tua u, Abeipa ta chyhsa thatlôpa hnei ta, Hmotaotheipa a hnei; Ano cha pareih thlihpipa hawhta pathli ta, Chothyu hawhta a chanaohpa a châ; Vâkatlâ hawhta suah ta, Tisaih hawhta a lohpa a châ; A ku ta alei lâ a za pazaw aw.

³ Epharai sahma paripazy apalaina lakho cha, Phei ry liata tlypâpa châ aw ta;

⁴ Saikao lei phapa luh liata lakho a ypa, A rônahna nata angiana a lo haipa cha, Nopi daihti hlâta theiku hmoh tua chaipa hawhta a châ aw. Chyhsa ta a hmôpa nahta, Lyu ta thlai a nie tyh.

⁵ Cha noh liata, Pheisaihzy Abeipa cha, Rônahna lakho châ aw ta; A phopi laibâhpa châta, Beilakho a ngiapa a châ aw.

⁶ Ryureina liata a tyuhpazy châta, Adona thlahpa châ aw ta; Thokhy chhikao liata chariah toh ta, A pakuasa awpazy châta thatlôna a châ aw.

Zerusale hnohta zikyurâna nata biehraina

⁷ Theihthaipa nata hrohsopa zy chhao ta, Kresawhti vâta a chavia chavô ei ta, Sahma vâta paochheichhâpa ta ama y. Sahma vâta a chavia chavô ei ta, Kresawhti ta âmo cha palâ ta, Sahma vâta paochheichhâpa ta ama y. Aluahna kyh liata pavia pavô ei ta, Bietluna tao nawpa kyh liata ama paochheichhâ tyh.

⁸ Tlâhkhai zydua ama pali ta bie ta, Apuapa y leina su rai y vei.

⁹ Sahma a paripa theihthaipa nata hrohsopa kyh liata, “Ahy hnohta ma pahnona a pachu bao hra aw tly? Ahy hnohta ma bietapa a chhopasia bao hra aw tly? Sâhpi ti a pathleih dyupazy ma a pachu aw ei? Sâhpi a ngieh khao leipazy ma a chhopasia aw ei?

¹⁰ Biepiepa chô liata biepiepa hropa baichhapa ta, Biepiepa nata biepiepa patho ta; Bieraopa chô liata bieraopa hropa baichhapa ta, Bieraopa nata bieraopa ta a pabie; He liata a chyhta pachu ta, Hao liata a chyhta a pachu,” ama tah.

¹¹ Abeipa ta hmao hropa hmâpa ta, Cha phopi hnohta bie reih aw ta, Reih hropa hmâpa ta bie a reih aw.

¹² Ama hnohta, “He he apahâna châ ta, Thachhâpazy cha pahâsa teh u; He he tha a padâh nawpa su a châ hih,” tah ta, Châhrasala nathlie khoh veih ei.

¹³ Chavâta Abeipa bie cha âmo châta, Biepiepa chô liata biepiepa hropa baichhapa ta, Biepiepa nata biepiepa sai ta a pathopa dei châ aw ta; Bieraopa chô liata bieraopa hropa baichhapa ta, Bieraopa nata bieraopa sai ta a biepa dei châ aw ta, He liata a chyhta pachu ta, Hao liata a chyhta a pachupa rakhapa dei a châ aw. Chatanachata ama sie tita â die lâta pao aw ei ta, Hmah phaohpa ta khoheih liata a ao aw ei ta, Patupa ama châ aw.

¹⁴ Chavâta he phopi chô liata Zerusale liata ryureih ei chi ta, Chyhsa a pahneisao thaipazy saih u, Abeipa bie thei teh u!

¹⁵ “Thina nata bie hraih ha pi ta, Athihkhih nata bie eimâ taih hawh; Eima boh nawpa ta haipa bie reih pi ta, Bie doleipa liata eimâ chhai hapa vâta, Tisaih a tlô tita chhao miah pha aw vei,” Nama tahpa vâta,

¹⁶ Abeipa Zehôvâh ta hetana heta a tah: “Moh teh u, Zaio liata alô bô na ta, Alô pasia chiehpa a châ; A ki liata alô sôhpa châ ta, Abôna a ipa a châ: ‘A ngiapâpa maih a chalyu aw veih ei.’

¹⁷ Adona cha thliena ri ta hmâh aw na ta, Siana cha thua bangiehpa padona ri ta ei hmâh aw. Pareih ta haipa bie achhaina cha phi pathlah aw ta, Tizy ta anyuna su a vao khai aw.”

¹⁸ Thina nata biehrai nama taopa phiepa châ aw ta, Athihkhih nata bie namâ taihpa chhao a duah aw vei. Tisaih rarôh ypa a tlô tita, A cha la ha aw.

¹⁹ Tisaih tlôna maihta cha la aw ta, My chareih ta tisaih vaw tlôpa ta, Chhô nah zâ ta vaw tlô aw ta, A bietapa yzie pahnopa a châ tita la, Chi â chhih ngaita aw.

²⁰ Rakhô cha a patlâ nawpa ta chyu tu aw ta, Poh chhao a bu awpa ta a chyh tu aw.

²¹ Abeipa cha a rai hria awpa ta, Rai nano kawpa hria awpa ta; A hmo tao awpa ta, Hmo a y tu leipa tao awpa ta; Perazi Tlâh liata vaw thyu aw ta, Kibiô Saikao liatapa hawhna khata â vaw hra aw.

²² Chavâta chyhsa pahneisao khao khuh vy, Chataleipatala nama bâliazy pa-ipa a châ pathlei aw na; Pheisaihzy Abeipa Zehôvâh tawhta, Râh pôhpalôhpa parao nawpa biepiepa ei thei haw.

²³ Nah pachôh u la, Ei ao thei teh u; Nathlie u la, Ei bie thei teh u.

²⁴ Chi chei nawpa ta alei a palietuhpa ta, Alei cha khâ a palie ngâ thlâh ha ma? Alei tlo pakeipa ta khâ a padi ngâ thlâh ha ma?

²⁵ Alei a paraih khai tawhta cha, Âhiah chi pariepa ta, Sykathu chi zy hie vei ma? Âtâ sâh a tlâh tlâh ta tu ta, Bâli sâh a tu nawpa liata tupa ta, Sapo chhao lyuri châta chhei vei ma?

²⁶ Leipalietuhpa cha a Khazohpa ta a phapa ta pachu ta, A taozie dopa a chho khai hapa a châ.

²⁷ Âhiah cha sâh tlyna hâh chhaopa ta tlypa chi châ leipa ta, Sykathu chô liata talailih phei pahluah thlu hra veih ei. Âhiah cha chôchahrei ta chheipa châ ta, Sykathu chhao sômasi ta chheipa a châ.

²⁸ Viahchhâ tao awpa ta sâh daih awpa byuh ta, Chavâta sâh cha chakhyh ngâ thlâh veih ei. Sâh chakhyna talailih tiaki cha, Sapiah chô liata pasiesapa châ ta; Sâh daih awpa châta deikua cha, Arâzy hmâpa châ veih ei.

²⁹ Cha pahnona chhao cha, Pheisaihzy Abeipa tawhta a vypa a châ; Ano cha ryhraotuh noâchhihpa châ ta, Sona kipa a hneipa a châ.