ISAI 26 - Mara Bible RV (BSI)

Abeipa ngâna hla

¹ Cha noh liata, he hla he Zudâh râh liata ama sa aw: “Khihpi thatlôpa hnei pi ta, Cha khihpi pachha nawpa ta, Khazohpa ta khihpi cha, Thokhyzy nata diahsuazy ta a chhôh.

² Ngiapâna a vaopa phopi siapa a ngia nawpa ta, Thokhy chhikaozy pahy teh u.

³ Hy Abeipa, a palôh nâ liata a sohpa cha, Nâ a cha ngâpa vâta, Vaih chi ta thlalôhpa ta na paysa tyh.

⁴ “Abeipa cha chhâzaw ta ngâ teh u, Abeipa, Abeipa tlai he, Chhâzaw lôpanô cha a châ hih.

⁵ Su sâhpa liata a pahrâpazy pahnai ta, Khihpi â pasâhsa kawpa cha a panawh haw. Alei taih tlai ta khihpi cha panawh ta, Dohlei taih tlai ta a pahnai haw.

⁶ Phei ta khihpi cha tlypâ ta, Dyhchhiepazy phei ta tlypâpa ta y ta, Phahlapazy keih ta tlypâpa ta a y.”

⁷ Mosiapa lâpi cha a raih ta, Hy Khazoh Siapa, nâma tlai ta Mosiapa lâpi cha na patlâsa tyhpa a châ.

⁸ Hy Abeipa, na lâpi dopa liata cha hâ pi ta, Na moh nata na mohphana zy he, Eima hro ta a tlaichhaipazy cha a châ.

⁹ Ei hro ta zâ ta cha vâ ta, Ei chhôh liata ei thlahpa ta mydi ta a cha pado tyh. Na pachianazy alei chô liata a vaw tlôna maihta, Khizaw chyhsazy ta siana amâ chu tyh.

¹⁰ Moleipa cha khokheipa a châ khiahta cha, Siana a chu beih aw vei; Adona râh liata avyuhna tao pyly aw ta, Abeipa rônahna hmô hlei aw vei.

¹¹ Hy Abeipa, na ku hy chi ta, Châhrasala hmô veih ei. Na phopi tha na pasana he hmô ei sala, Nozapa ta y mawh ei sy. Na chariahpazy châta mei nâ sopa ta Âmo cha kâ patlô khai mawh ei sy.

¹² Hy Abeipa, thlalôhna miah pie mah y, Eima tao theipa zydua he, Nâ ta eima châta na taopa sai a châ.

¹³ Hy Abeipa eima Khazohpa, Nâ deita eima chô liata ryureih leipa chi ta, Bei hropazy chhao ta ryu ama reih tyh; Châhrasala nâma moh deita eimâ thei tyh.

¹⁴ Bei hropazy cha thi ha ei ta, Hroh heih khao aw veih ei; Nohpahlipa dei châ ei ta, Thyu heih khao aw veih ei. Âmo cha hriepa ta pahleipadia khai ha chi ta, A thei ngâ thlâh hapa châ khao veih ei.

¹⁵ Nâ ta he phopi he papôhsa chi ta, Hy Abeipa, he phopi he na papôhsa haw; A râh râhrizy pakawh chi ta, Chavâta palyupalihpa ta na y.

¹⁶ Hy Abeipa, ama nôpo nota cha pado ei ta, Na chhoreina ama chô liata a tla tita, Arulâta thlah ama chhâ tyh.

¹⁷ Chanô saw phaohpa nawh hnei chy ta, Sawzeih pasapa ta a taikalô ta, A awhsâhpa hawhta, Hy Abeipa, keimo chhao, Nâma vâta sawzeih pasa eima tao.

¹⁸ Saw phaoh pi ta, A taikalô pi ta, Châhrasala ziza saw dei eima sa. Alei chô liata pachhana tlôkhei leipa pi ta, Khizaw chyhsazy ta hrona hnei hlei veih ei.

¹⁹ Nâma liata a thipazy cha hroh aw ei ta, Ama pôhpa a thyu heih aw. Dohlei liata a ziapazy a hra aw ei ta, Thaphapa ta hla ama sa aw. Na diati cha my diati châ ta, Athipazy alei tawhta ama vaw hroh heih aw.

²⁰ Hy ei phopi, a vy u la, Nama chhôhpadâhpazy liata a ngia teh u; Nama ochhizy a khaw khâh u la, Ruchhôna a khô hlâlei cha, Bohpi leipa chhôh a nyu chy teh u.

²¹ Moh teh u, lei chyhsazy ama paraona vâta hrie awpa ta, Abeipa cha a yna tawhta vaw pua aw ta, Alei ta a chô liata thisaih palopazy palâhâh aw ta, Ano liata ama thiepazy nyu khao aw vei.