ISAI 25 - Mara Bible RV (BSI)

Abeipa khokheina reithaina hla

¹ Hy Abeipa, nâ cha ei Khazohpa na châ; Cha cheihchalo aw na ta, Na moh ei reithai aw. Hmonoâhpazy a tao chi ta, Hlâno tawhta na pachhuapanohpazy cha, Ngâ a chhih ei ta amâ do.

² Khihpi cha alô pathluna ta tao chi ta, Thokhy khihpi cha khih rypa ta na tao haw; Chihropazy thokhy khihpi chhao, Khihpi châ khao leipa ta, Khatita hmah paduapathipa châ khao aw vei.

³ Chavâta phopi thatlôpazy ta cha parônahsa aw ei ta, Râh chichhihpa khihpizy ta ama cha chi aw.

⁴ Sipasapa châta thokhy châ chi ta, Dyhchhiepa nôpo daihti liata a thokhy na châ; Thlihpipa tawhta abohna châ chi ta, Noh lopa châta nohdi na châ. Nôchhiepa hu deikua cha, Thlihpipa ta pâhchhô a vawhpa hawhta châ ta;

⁵ Râh raohpa liata noh lopa hawhta a châ. Chihropazy palopasahna pyu padia chi ta, Meihdo nohpahli ta noh lopa a padiapa hawhta, Nôchhiepa hla cha chalihsapa a châ.

⁶ He tlâh liana heta, Pheisaihzy Abeipa ta phopi zydua châta kyhchhi a tao aw; Pati pahâhpa to niena kyhchhi châ aw ta, Kresawhti hlôpa dona kyhchhi a châ aw; Sa rupa lathli bawna kyhchhi châ aw ta, Kresawhti suapa dona kyhchhi a châ aw.

⁷ He tlâh liana heta, Phopi zydua hmiakhuna parao aw ta, Râh zydua khuna poh a parao aw.

⁸ Thina cha tlyzaw ta pahlei aw ta, Abeipa Zehôvâh ta Chyhsa zydua hmia tawhta mothlihzy hru khai aw ta; A phopi nohzaona chhao, Khizaw zydua liata a pachhâsa aw; Cha bie a reihpa cha Abeipa a châ.

⁹ Cha noh liata hetana heta ama tah aw: “Moh teh u, he he eima Khazohpa cha châ ta, Miah pachha awpa ta eima hâpa Khazohpa cha a châ hih. He he Abeipa cha châ ta, Ano tlai he eima hâpa a châ hih. A pachhana liata a ly ei sih la, Thaphapa ta y ei suh u.”

¹⁰ He tlâhpi liata Abeipa ku a pahâ aw ta, Viahchao ie liata sawphao tlypâpa hawhta, Môabâ cha ano su liata tlypâpa a châ aw.

¹¹ Tithaipa ta ti a zaw awpa ta a ku a pazawhpa hawhta, Môabâ cha a râh liata a ku pazawh aw ta, Châhrasala Abeipa ta â palaina cha panawh aw ta, A kuzôthaina a panawh aw.

¹² A thokhy a sâhpazy pacho aw ta, Pahnai aw ta alei dohlei liata a papao aw.