ISAI 23 - Mara Bible RV (BSI)

Tyre nata Sidaw kyh chhochhieliena

¹ He he Tyre kyh chhochhieliena bie a châ: Hy Tâsi balyhzy saih u, Thata cha teh u; Tyre cha paraopa châ ha ta, Olyu nata balyh apahâna zy chhao y khao vei. Cha cha Kiti râh tawhta ama vaw siena lâta Ama hnohta palâsapa a châ.

² Hy tilaipi kiah liata a pahrâpazy saih u, A thlih thlâh ha u la; Tilaipi balyhzy ta ama pahneirôhsapa, Nâmo, Sidaw sôhdaohpazy saih u, A thlih thlâh ha teh u.

³ Ti lai ngaitapazy chô liata Sihaw sâh vaw sie ta, Nile kôvei cha Tyre sôh hmôna châ ta, Tyre cha râhzy sôhpaliena supipa a châ tyh.

⁴ Hy Sidaw, nozapa ta y teh, Tilaipi ta bie reih ha ta, Tilaipi thokhy ta hetana heta a tah: “Saw a zeih beih leipa na ta, Saw sa beih hra va na; Satliazy mohôh beih leipa na ta, Laihsazy chhy beih hra va na.”

⁵ Bie pathâhpa cha Izi râh a tlô tita, Tyre kyh vâta thata ama palôh a pasa aw.

⁶ Hy tilaipi kiah liata a ypazy saih u, Tâsi lâ haosâ kiah u la thata cha teh u!

⁷ He he haosai a pha kaw tyhpa nama khihpi kha châ vei ma? Hlâno tawhta a vaw duahpa khihpi hlôpa, Lâhlapi lâ taihta a phei ta siepa ta, Pahrâna su a tao laihpa khihpi kha châ vei ma?

⁸ Ahy ma beilakhozy a pakhosatuhpa Tyre chô liata He hmo he tao a chhuah tly? Tyre sôdaohpazy cha beimachâzy châ ei ta, Cha liata sôhpalietuhpazy chhao, Lei chyhsa zachhihpazy mah ama châ tâh.

⁹ He hmo he Pheisaihzy Abeipa hmochhuahpa a châ. Amâ palaikheipa rônahna zydua papuapalei ta, Lei chyhsa zachhihpazy noh pazao nawpa ta, Pheisaihzy Abeipa ta tao â chhuahpa hmo a châ.

¹⁰ Hy Tâsi zuah y, Nile chavah kiahzy liata ama taopa hawhta, Na râh liata leipalie bâ mah y; Balyh apahâna hnei khao va chi hih.

¹¹ Abeipa ta tilaipi chô liata a ku pazawhpa ta, Abeinarâhzy chalyu ta; Kâna thokhyzy parao awpa ta, Bie a pie haw.

¹² “Hy Sidaw laihsa kôpa y, Tlybaipa ta y ha chi ta, Na haosai pha khao aw vei; Thyu la, Kiti lâ haosâ kei zoh teh, Cha liata chhao apahâna hnei hlei aw va chi,” Abeipa ta a tah.

¹³ Moh tua u, Kaldia mo râh hih! Phopi a lei hapa râh châ ta, Asuria ta râhsazy pahrâ nawpa ta a tao haw. Khihpi dôhna o sâhpazy padua thlupa ta, thokhyzy parao ei ta, khih rypa ta ama tao haw.

¹⁴ Hy Tâsi balyhzy saih u, Thata cha teh u, Nama thokhy a rao ha hih.

¹⁵ Chatawhcha cha noh liata hetana heta a vaw châ aw: Tyre cha bei pakha hro chhôh kô ziepa tlu ta, kô sysari chhôh mypa ta y aw ta, kô sysari a lei tita, âzuahnô hla ta a reipa hawhta, Tyre chô liata a vaw tlô aw:

¹⁶ “Hy âzuahnô my hapa y, A thei thlâhpa na châ heih thei nawpa ta, Totâ la la, khihpi chahlô mah y! Ao ngiapa papua la, Hla hluhpi sa mah y!”

¹⁷ Kô sysari a chhâ nahta, Abeipa ta Tyre cha vaw tly aw ta, a hria hlao rai parohpa lâ kha kua heih aw ta, alei chô liata khinarâh zydua liata â zuah heih aw.

¹⁸ Châhrasala sôhpaliena tawhta â thôhna nata a hlaozy cha Abeipa châta hmo pathaihpa a châ aw. Cha sôhzy cha pachôpa tlyma, pasopa tlyma châ aw vei. A sôhzy cha ABEI­PA hmiakô liata a pahrâpazy ta lôhrâtlôpa ta ama niedo thei nawpa nata chyhsa phapazy amâ tobi thei nawpa châta hmâpa a châ aw.