ISAI 22 - Mara Bible RV (BSI)

Zerusale kyh chhochhieliena

¹ He he aluahna saikao kyh chhochhieliena bie a châ: Khâpa ma châ patypamâ ei tly, Vâphuh lâ dia nama kia khai haw?

² Awhsâhpa nata palopasahpa pyu ta a bie tyhpa khihpi châ chi ta, Haosai phapa khih châ tyh va chi ma? Na khihsaw ama thiepazy cha zaozi ta thiepa châ leipa ei ta, Adyuhna liata a thipa châ hra veih ei.

³ Na ryureituhpa zydua hmaohkha ta pua ei ta, Lâhlapi lâ amâ râ khai haw; Na chhôh liata laibâhpa a ypa zydua cha patu ei ta, Libaw rai hmâ leipa ta ama patu khai haw.

⁴ Chavâta hetana heta ei tah: “Ahro lâ nâ heihsai teh u, Raithlih palopa ta thata ei cha aw; Ei phopi zuah raona kyh liata, Thlah na palôh khoh hlei khuh vy.”

⁵ Pheisaih Abeipa Zehôvâh noh cha, Aluahna saikao liata vaw tlô aw ta; Cha noh cha tymâna noh châ aw ta, Tlypâna nata nôpona noh a châ aw; Thokhy paraona noh châ aw ta, Tlâhpizy awsaona noh a châ aw.

⁶ Elâmi talailih pheisaihzy nata arâ pheisaihzy cha, Châtai byh a aopa ta a vy ei ta, Kiri mo chhao vyhphao chabapa ta amâ vy.

⁷ Na saikao pha chaipazy cha talailihzy ta bie ta, Thokhy chhikaozy liata arâ pheisaihzy amâ paziah.

⁸ Abeipa ta Zudâh khuna poh cha hlai ha ta. Cha noh liata, Râhmâhpa O liata chariah chhaichhizy lâ na mo padeih chi ta,

⁹ Dâvi khihpi thokhy raona suzy cha a hluh ngaitazie nama hmô. Â hnai lâta tipo liata ti pachô ei chi ta,

¹⁰ Zerusale ozy reih ei chi ta, thokhy pa-i nawpa ta ozy nama phie.

¹¹ Tipo parohpa liata ti pa-o nawpa ta, thokhy miano likawh liata tipâh nama tao. Châhrasala chazy a taotuhpa lâ moh tlôh leipa ei chi ta, hlâno tawhta a vaw pachhuapanoh hapa pachâ hra veih ei chi.

¹² Cha noh liata, Pheisaihzy Abeipa Zehôvâh ta, Cha awpa nata mâchhiesa awpa ta aw ta, Luh a papôlô awpa nata latho poh a bu awpa ta a aw.

¹³ Châhrasala moh teh u, Alyna nata thaphana daihti ta tlao hmâh ei ta, Viahchao nata mietaku zy thiepa ta, Sa niepa ta kresawhti doh ei ta, “Nie sih la, doh suh u, Mylâ a thi awpa tlâ eima châ hih,” ama tah.

¹⁴ Pheisaihzy Abeipa ta ei nakhaoh liata a vaw phualuah ta, “Nama thi hlâlei cha, He moleina he chatlaipa châ aw vei,” Pheisaihzy Abeipa Zehôvâh ta a tah.

¹⁵ Pheisaihzy Abeipa Zehôvâh ta hetana heta a tah: “Sie la, ochhôh a vaotuhpa, sôh mohôhtuhpa Sebanâ lâ vawh la, a hnohta hetana heta kei chho teh:

¹⁶ Nâ, su sâhpa liata thlâ khaoh khiepa ta, lôpanô liata na châta yna khaoh a reipa chi cha, khâpa vâta ma he liata na châta thlâ khaoh na khie tly? He liata tao awpa khâpa ma na hnei tly? He liata na chyhsa ahy ma a y tly?

¹⁷ Hy chyhsa thatlôpa, moh teh, Abeipa ta thapi ta a cha chalyu aw. Â ipa ta cha patu aw ta,

¹⁸ cha pahieh, cha pahieh aw ta, bawhlô hawhta râh kawhpa liata a cha thy aw. Cha liata thi aw chi ta, cha liata, nâ, na zibeipa ochhôh liata maophyuhna a tlôkheituhpa châta na rônahna talailihzy a y aw.

¹⁹ Na raihriana tawhta cha papua aw na ta, na châna tawhta pathlapa na châ aw.

²⁰ “Cha noh liata, Hikia sawchapawpa, nâ chakaotuhpa Eliakima aw aw na ta,

²¹ na viahkao pasipa ano pakysapa ta, na chaisaih pasaih aw na ta, na biehneina a ku liata ei pie aw. Chatanachata Zerusale liata a pahrâpazy nata Zudâh pathlazy châta paw a châ aw.

²² Dâvi pathlazy châhbi a ngiatlâh liata soh aw na ta, pahy aw ta, ahy hmahta khaw leipa aw ei ta; khaw aw ta, ahy hmahta pahy aw veih ei.

²³ Su a ipa liata khaipa siahkhai hawhta, ano cha pa-i aw na ta, a phopi châta beidyuchhai zachhihpa a châ aw.

²⁴ A phopi zachhihna zydua ano liata a baih aw ta, a chipathlazy nata a hrihruahzy, hmobaoh chyhpa to, biebuh tawhta beihrai taihta ano liata amâ baih khai aw.

²⁵ “Pheisaihzy Abeipa ta hetana heta a tah: Cha noh liata, su a ipa liata â ipa ta khaipa siahkhai cha pahnie khao leipa aw ta, chhawh pathlahpa a châ aw. Za tla aw ta, a chô liata phaohri a ypa cha pahleipadiapa a châ aw. Abeipa ta cha bie cha a reih haw.”