ISAI 21 - Mara Bible RV (BSI)

Tilaipi kiah râhchawhpa kyh chhochhieliena

¹ He he tilaipi kiah râhchawhpa kyh chhochhieliena bie a châ: Khisô ta Neke a chanaohpa hawhta, Chariahpa cha râhchawhpa tawhta a vy ta, Râh chichhihpa tawhta â vy.

² Aluahna rarôh ypa ei hnohta phuahpa a châ; Paphasaituhpa ta a paphasai ta, Paraotuhpa ta a parao. Hy Elâmi, khy la, Hy Media, dôh teh. Chyhsa a pahrôsa tyhpa zydua kha Ei pachhâsa haw.

³ Chavâta ei chai nata ei zôhzy pasana ta bie ta, Chanô sawzeihpa pasana hawhpa Pasa­na ta eina patu haw. Pasa ei tao tupa vâta, Ei nah ta thei thei khao leipa ta; Ei pachârôh tupa vâta, Ei mo ta hmô thei khao vei.

⁴ Ei palôh a tymâ ta, Chichhihna ta eina pahlaw. Zâ vaw tlô awpa ei ngiatiah tyh leipa kha, Kei châta achalyuna lâta a tao haw.

⁵ Tlâhkhai a chhuahdypa ta, Vaituhpazy soh ei ta, Niepa ta, doh ei ta. Hy beimachâzy saih u, thyu u la, Vyhphao kha sathaw thu teh u!

⁶ Abeipa ta ei hnohta hetana heta a tah: “Sie la, riahvaituhpa kei soh la, A hmôpa phuah mawh sy.

⁷ Arâ a kiahpazy hmô aw ta, Arâ pheisaihzy a bao bao ta a hmô aw; Alâ a kiahpazy hmô aw ta, Râraoseihpa a kiahpazy a hmô aw; Ama bie reipazy pakhâta ta nathlie sala, A pha ngaitapa ta nathlie mawh sy.”

⁸ Riahvaituhpa cha chakeibarôhneipa hawhta awh ta, “Hy Abeipa, riahvaina o sâhpa liata, Noh y ta a duah na ta; Ei vaina su liata, Zâ khihdei ta ei y.

⁹ Pachâ teh, arâ a kiahpazy a vy ei ta, Arâ pheisaihzy a bao bao ta amâ vy,” tah ta. Riahvaituhpa lilaw chata, “A pao haw, Babylaw cha a pao haw, A khazoh nothlahpa zydua cha, Alei liata a taichheih khai haw,” Tahpa ta a chhy ta.

¹⁰ Hy sawhri sâh, ei sâh chakhy chiehpa y, Pheisaihzy Abeipa tawhta ei theipa cha chho na ta, Izarei Khazohpa tawhta ei theipa ei cha chho.

Dumâ kyh chhochhieliena

¹¹ He he Dumâ kyh chhochhieliena bie a châ: Chyhsa ta Seirâ tlâh tawhta na vaw aw ta, “Riahvaituhpa y, zâ he khati ta a chhâ aw? Riahvaituhpa y, zâ he khati ta a chhâ aw?” tah ta.

¹² Riahvaituhpa ta, “My vaw châ daihmâ ta, Zâ a vaw châ heih aw. Nama hiahri khoh khiahta cha, Hiahri u la; A vy u la, Hiahri heih teh u,” tah ta.

Arabia kyh chhochhieliena

¹³ He he Arabia kyh chhochhieliena bie a châ: Hy Dedâ sôhpaliepa khitlyhpazy saih u, Arabia râhmâhpa liata a rie u la,

¹⁴ Nâmo, Temâ râh liata a pahrâpazy saih u, Dâhphipazy cha ti ta dy u la; Arâpazy viahchhâ ta dy muh vy.

¹⁵ Zaozizy tawhta a râpazy châ ei ta, Zaozi phia hapa tawhta a râpazy ama châ khawh. Libaw a kei chiehpa tawhta a râpazy châ ei ta, Adyuhna rupa tawhta a râpazy ama châ khawh.

¹⁶ Abeipa ta ei hnohta hetana heta a tah: “Hria hlaopa kô reizie ta reipa ta, kô kha chhôh ta, Kedâ mo rônahna zydua cha a chhâ khai aw.

¹⁷ Kedâ pathlazy hry liata likathaipa pasaipha laibâhpazy cha a chyhta ama châ aw. Abeipa, Izarei Khazohpa ta, cha cha a reih haw.”