ISAI 20 - Mara Bible RV (BSI)

Asuria ta Izi nata Kusi a pahnie nawpa ngiana

¹ Asuria bei Sâkô tuapa pheisaih hyutuh chaipa Asadô khihpi lâ a vy ta, a dyuh ta, khihpi cha a la kô ta,

² Abeipa ta Amôza sawchapawpa Isai hnohta, “Sie la, na chai liata latho poh nâ saipa kha pathlâ la, na phei liata pheikyzy kha pahluh teh,” tah ta. Cha hawhna chata tao ta, Isai cha thluahruapa nata pheiky a ky leipa ta a hlaihlâ ta.

³ Chatawhcha Abeipa ta, “Nâ chakaotuhpa Isai ta Izi nata Kusi chô liata a tlô awpa ngiana nata biesakâvawna châta kô thôh chhôh thluahruapa nata pheiky a ky leipa ta a sievawhpa hawhta,

⁴ Asuria bei ta Izi nata Kusi cha sei ta â chhi aw ei. Hawti machâ ta thluahruapa nata pheiky a ky leipa ta, chaotô palâ khai hapa ta siekheipa châ aw ta, Izi cha noza ngaitapa ta paysapa a châ aw.

⁵ Ama hnabeiseihna Kusi nawhna nata amâ palaikheipa Izi nawhna vâta nôpopa nata nozapa ta ama y aw.

⁶ Cha noh liata, he tilaipi kiah liata a pahrâpazy heta, ‘Moh tua u, eima hnabeiseihna nata Asuria bei tawhta miah pachha awpa ta eimâ râna cha, he hawhta tlâ a châ hih! Kheihta ma eimâ boh thei aw?’ ama tah awh,” tah ta.