ISAI 19 - Mara Bible RV (BSI)

Izi kyh chhochhieliena

¹ He he Izi kyh chhochhieliena bie a châ: Moh tua u, Abeipa cha meihdo chatliepa kiah ta, Izi râh lâ â vy hai. Izi râh khazoh nothlahpazy a hmiakô liata a chalyu awh ei ta, Izi mo palôh cha ama chhôh liata a zao khai aw.

² Izi mo a dyuh awpa ta Izi mo lilaw pathyu aw ei na ta, Âmo nata âmo amâ dyuh aw; Pakha nata pakha a dyuh aw ei ta, Opa nata opa amâ dyuh aw; Khihpi nata khihpi a dyuh aw ei ta, Khinarâh nata khinarâh amâ dyuh aw.

³ Izi mo cha ama palôh pachhâsapa châ aw ta, Ama ryhraona ei patypamâ aw. Khazoh nothlahpazy nata dyuthaipazy a saohiah aw ei ta, Peihthaipazy nata pachaothaipazy amâ saohiah aw.

⁴ Izi mo cha zibeipa nôchhiepa ku liata pie aw na ta, Bei a hrâhpa ta ama chô liata ryu a reih aw, Pheisaihzy Abeipa Zehôvâh ta a tah.

⁵ Tilaipi tizy kua aw ta, Chavah chhao kuapa ta a chawhkarai aw.

⁶ Ti lâpizy ama roh chhie kaw aw ta, Izi Nile chavah vahtiepazy a sypa ta kua aw ei ta, Lohthi nata saitôh phaozy ama uah khai aw.

⁷ Nile chavah kiah zydua cha, Nile chavah tlana taihta su tlyhpa châ aw ta, Nile chavah kiah liata chicheipa zydua cha a chawh khai aw; Thlih ta phaoh pathlah aw ta, Y khao aw vei.

⁸ Nga patutuhpazy chaphôhtu aw ei ta, Nile liata keipa a chôh tyhpa zydua mâchhiesapa ta ama y aw. Ti liata sao a parai tyhpazy chhao, Thachhâ panaopa ta ama y aw.

⁹ Pu pala rai hriatuhpazy ama palôh chhâ aw ta, Pala râhpa thai a sapazy ama hnabei a dy aw.

¹⁰ Izi aduana tôhtlâhzy cha paraopa châ aw ta, Hria hlaopa zydua vâsâhpa ta ama y aw.

¹¹ Zônâ beimachâzy cha ahrupazy châ ei ta, Phiraoh ryhraokheituhpa so chaipazy ta ryhraona hrupa ama pie. Kheihta ma Phiraoh hnohta, “Asopa saw châ na ta, Bei hlôpa sawchapawpa ei châ,” Nama tah thei tly?

¹² Cha hawhpa khiah, Khataih liata ma na chyhsa sopazy cha ama y haw? Pheisaihzy Abeipa ta Izi chô liata tao â chhuahpa cha, Cha chho ei sala cha pahnosa bao ei sa.

¹³ Zônâ beimachâzy hru ha ei ta, Mephi beimachâzy dôveipa ta ama y. Izi chizy châta a ki liata alôzy ta Izi cha paochheichhâpa ta ama paysa haw.

¹⁴ Abeipa ta Izi mo hry liata tymâna thlahpa pahlaosa ta, Sahma paripa ta a palipa a paochheichhâ thlupa hawhta, Beimachâzy ta Izi mo cha ama hmotaopa to liata Paochheichhâpa ta ama paysa haw.

¹⁵ Izi cha tao thei awpa hnei khao vei; A luh nata a chaolahmei zy ta, Tao thei awpa hnei leipa ei ta; Thiahrâ chiah nata lohthi chhao ta, Tao thei awpa hnei veih ei.

¹⁶ Cha noh liata, Izi mo cha chanô lyu aw ei ta, Pheisaihzy Abeipa ta ama chô liata a ku a chatho thlupa hmiakô liata chipa ta amâ chalyu aw.

¹⁷ Zudâh râh cha Izi mo châta chichhihpa a châ aw. Pheisaihzy Abeipa ta Izi chô liata hmo a tlô awpa a pachhuahpanoh hapa vâta, Zudâh moh ama reipa a theipa Izi chyhsa maihta ama chi ngaita aw.

¹⁸ Cha noh liata, Kâna reih cheih ta, Pheisaihzy Abeipa pazi awpa ta bie â taih hapa khihpi miapangawh Izi râh liata y aw ta, chazy hry liata khihpi miakha cha Raona Khihpi bipa a châ aw.

¹⁹ Cha noh liata, Izi râh liah khophie liata Abeipa châta maisâh y aw ta, a râhri liata Abeipa châta lôbô a y aw.

²⁰ Cha cha Izi râh liata Pheisaihzy Abeipa pahnona nata atheithlâhna châta a châ aw. Chatanachata Izi mo ta tlybaituhpazy vâta Abeipa ama awsao tita, Abeipa ta pachhatuhpa nata pabohsatuhpa vaw tuah aw ta, âmo cha a pachha aw ei.

²¹ Cha noh liata, Abeipa ta Izi mo cha a pahnosa aw ta, Izi mo ta Abeipa cha ama pahno aw. Atheihna nata hmohlâpa ta Abeipa cha a chhypa ta, Abeipa liata bie a taih aw ei ta, ama bietaizy ama patlô aw.

²² Abeipa ta Izi cha tu aw ta, tupa ta patlâh aw ta, Abeipa lâ kua aw ei ta, zawngiah awpa ta amâ hawpazy cha Abeipa ta nathlie aw ta, a patlâh aw ei.

²³ Cha noh liata, Izi râh tawhta Asuria taihta lâlai y aw ta, Asuria mo ta Izi râh lâ zu aw ei ta, Izi mo chhao ta Asuria râh lâ khy aw ei ta, Izi mo cha Asuria mo nata hmaohkha ta Abeipa ama chakao aw.

²⁴ Cha noh liata, Izarei cha Izi mo nata Asuria mo akaona liata a pathôhna châ aw ta, khizaw châta byhnâ a châ aw.

²⁵ Cha râh thôhzy cha Pheisaihzy Abeipa ta byhnâ awpa aw ta, “Ei phopi Izi, ei kuzô Asuria nata ei ryuto Izarei zy cha thlaochhipa ta y mawh ei sy,” a tah aw.