ISAI 17 - Mara Bible RV (BSI)

Dâmaskâ kyh chhochhieliena

¹ He he Dâmaskâ kyh chhochhieliena bie a châ: Pachâ teh u, Dâmaskâ cha khihpi châ khao leipa aw ta, Raona a pathluna su a châ aw.

² Arôerâ khihpizy cha chhâzaw ta siesaipa châ ha ta, Mietaku zawzy tlaihna châ aw ta, Cha liata mietakuzy a byu aw ei ta, Ahy ta hmah pachisa aw veih ei.

³ Epharai thokhy khihpi leipa ta, Dâmaskâ khinarâh leih aw ta, Aramia laibâhpazy cha Rônahna a pahlei hapa Izarei sawzy hawhta ama châ aw, Pheisaihzy Abeipa ta a tah.

Izarei pachiana

⁴ Cha noh liata, Zakaw rônahna cha panawhpa châ aw ta, A pôhpa thawhpa chhao a zaoh aw.

⁵ Sâh hriatuhpa ta sapiahzy pahmaoh ta, A ku ta sâh suhzy a thliepa hawhta châ aw ta, Chyhsa ta Rephai Saikao liata Sâh suhzy kâmo a thohpa hawhta a châ aw.

⁶ Ôli kô chakhyh nota, A kithlao a sâh chaipa liata a thei miano miathôh â nguapa hawhta, Theilâpa lyu khai tawhta, A chiah liata a thei miapalih miapangawh â nguapa hawhta, Cha liata kâmo thoh awpa a y aw, Abeipa Izarei Khazohpa ta a tah.

⁷ Cha noh liata, chyhsa ta ano a Taotuhpa lâ moh aw ta, a mo ta Izarei Mo Pathaihpa cha a hmô aw.

⁸ A ku ta a taopa maisâh lâ moh khao leipa aw ta, a kuparozy ta a taopa Aseri tôh tlyma ropahâhpa raona maisâhzy tlyma moh khao aw vei.

⁹ Cha noh liata, ama khihpi a ipazy cha, Izarei sawzy vâta tho thih nata tlâh laki zy liata su amâ râsaipa hawhta châ aw ei ta, cha suzy cha roryhrapa ta a y aw.

¹⁰ Na pachhana Khazohpa my ha chi ta, Nâ chhaina Lôpanô nâ thei khao leipa vâta, Tho pha chaipazy bôpa ta, Râh hro lâ tawhta kre chiah loh chi ta,

¹¹ Na bô noh ta palaiseihsapa ta, Na lo my ta a paw na papawsapa chhao ta, Pachârôhna nata tlâh thei khao lei awpa ta pasana noh liata, Kôveizy a leidia khai aw.

¹² Tilaipi a chatlaopa hawhta a chatlaopa Phopi hluhpizy cha ama hu a po na! Tisaih a aohpa hawhta a aohpa Râhzy cha ama hu a po na!

¹³ Râhzy ta tisaih hawhta a aoh hra ei sala, Abeipa ta âmo cha ra aw ta, Lâhlapi lâ a râ aw ei ta, Tlâh liata saviah thlih ta a phaopa hawhta, Chadai paipa châ aw ei ta; Khisô ta dohlei a phaopa hawhta, Chadai paipa ama châ aw.

¹⁴ Moh tua u, zâlâ ta chichhihpa eikhapi ta vaw y ta, Khihdei hlâta a lei ha tyh. Cha hawhpa cha miah hraotuhpazy tovyuh châ ta, Eima hmo a parutuhpazy hmô awpa cha a châ.