ISAI 16 - Mara Bible RV (BSI)

¹ Râh ryureituhpa châta mietakutaw paphao u la, Selâ tawhta râhchawhpa lâpi a chhihpa ta, Zaio sawchanô tlâh lâ paphao muh vy.

² Pavaw a bu tawhta phopa viavipa hawhta, Môabâ zuahzy cha Anaw chavah chakanazy liata viavipa ta ama y.

³ Môabâ ta Izarei hnohta hetana heta a tah: “Ryh miah raopa la, Ryu miah reipa teh; Nohchhô locho no chhao ta zâ hawhta na nohdi paysa la, Râh tawhta papuapazy cha nyu la, A râpazy patusa khah y.

⁴ Môabâ tawhta papuapazy na hnohta pahrâ ei sala, Paraotuhpa tawhta amâ chhaina châ mah y. Tlybaituhpa y khao leipa ta, Paraona chhâ ta, Phei ry liata tlypâtuhpa a leidia tita,

⁵ Dâvi poh o liata kyhpachâna ta beidyuchhai paduapa châ aw ta, Cha liata ryureituhpa a tyuhpa cha, Adona ta ryu a reihpa châ aw ta, A chatliepa ta siana hmo a taopa a châ aw.”

⁶ Môabâ apalaina thâtih thei pi ta, Â khotlâhna, â palaina, a sâlâna, Âh, â vaw palai kaw tlai na! Châhrasala â reithainazy cha aruapa a châ.

⁷ Chavâta Môabâ cha Môabâ châta cha sala, Mo to ta cha mawh ei sy. Kiaherese kre chawhpa viahchhâzy châta, Mâchhiesapa ta y u la, Pachârôh ngaitapa ta y muh vy.

⁸ Hesbaw lyuzy cha pachih khai ha ei ta, Sibmâ kre a lo haw; Râh beizy ta a chiahzy thlâ ei ta, Zaze khihpi taihta a zawh hôlô ta, Râhchawhpa taihta â zawh. A chhyhzy hiepatlapa ta y ta, Tilaipi khô lâ taihta hiepatlapa ta a y.

⁹ Chavâta Sibmâ kre zôh châta, Zaze chana liata kei chhao cha na ta, Hy Hesbaw nata Elialeh, Ei mothlihzy ta ei cha padâ kanieh ei; Na nopi theilâpa nata na sâh hria vâta, Thapha ta a awh tyhpa pyu â chalih haw.

¹⁰ Lyu kôvei pha kaw tyhpa tawhta, Alyna nata thaphana zy pai ha ta; Kre sadôzy liata hla sa khao leipa ei ta, Rahao khao hra leipa ei ta, Kre saohtuhpazy ta kre saohna liata saoh khao veih ei; Thaphana pyuzy ei chalihsa khai haw.

¹¹ Chavâta ei chhôh nata rih zydua cha, Môabâ vâta totâ hawhta paro ta; Kiharese vâta ei chhôhso â rôh.

¹² Chatawhcha hetana heta vaw châ aw ta, Môabâ cha su sâhpazy lâ â luah tita, anosasyh ta a tha a pachhâ ta, thlahchhâ awpa ta a achhyna o lâ a pangaipa chhao ta, phahnai aw vei.

¹³ Khazy kha Abeipa ta Môabâ kyh liata kha hlâta a vaw reipazy a châ.

¹⁴ Tahmâ deikua cha, Abeipa ta hetana heta a tah: “Ahlaopa kô reizie ta reipa ta, kô thôh chhôh ta Môabâ rônahna cha panawhpa a châ aw. Râhsaw maluh hluhpi a hneina chôta, cha hmo cha a chô liata tlô aw ta, laibâhpazy cha a chyhta dei châ aw ei ta, ama chyh hleikhô ta ama dadieh kaw aw.”