ISAI 15 - Mara Bible RV (BSI)

Môabâ kyh chhochhieliena

¹ He he Môabâ kyh chhochhieliena bie a châ: Môabâ râh Ari khihpi cha, Zâ kha ta parao khaipa a châpa vâta, Môabâ cha lei ha ta; Môabâ râh Kiri khihpi chhao, Zâ kha ta parao khaipa a châpa vâta, Môabâ cha a lei haw.

² Dibô cha achhyna o lâ pangaipa ta, Cha awpa ta a su sâhpazy lâ khy ta; Môabâ ta Nebô nata Medebâ khihpizy a chakhei ei. Luh zydua pôlô khai ha ta, Kâhhmi zydua a tlyh khai haw.

³ Lâlaizy liata latho poh a bupa ta, Vâphuh nata tlyliahzy liata, Chyhsa to sâh ei ta ama cha.

⁴ Hesbaw nata Elialeh cha ei ta, Ama chapa pyu cha Zahâ taihta â thei; Chavâta Môabâ pheisaihzy cha, Ao paro ngaitapa ta awh ei ta, Ama palôh a dua khai haw.

⁵ Môabâ vâta ei chhôhso â rôh; A chyhsazy Zawâ lâ a râ ei ta, Ekalâselisia lâ amâ râ khai haw. Chana chôta Luhi chakhâ kiah ei ta, Raona kyh awh laihpa ta Hôrônai lâpi lâ ama sie.

⁶ Niri tizy kua khai ha ta, Sibiepazy raohpa ta, Thoti hrohpazy thi khai ha ta, Râh hrohpa a lei khai haw.

⁷ Chavâta sôh ama hmôpa nata ama pachôpazy cha, Râbuh Chavah lâ ama siekhei haw.

⁸ Môabâ râhrizy liata awhsâhpa pyu pathâh ta, A chapa pyu cha Ekalai taih tlô ta, A chaphôhtupa pyu Bereli taihta a daih.

⁹ Dibô tizy cha thisaih ta bie ta, Dibô chô liata hmo rarôh y viapa ei patlôsa aw. Môabâ tawhta a râpaipazy lâ chakeibarôhneipa tuah aw na ta, Râh liata a nguapazy hnohta chhao chakeibarôhneipa ei tua thlu aw ei.