ISAI 14 - Mara Bible RV (BSI)

Zakaw paduapathina

¹ Abeipa ta Zakaw ngiachhiepa ta, Izarei a tlyh heih aw ta, ama râh tlai liata a paysa heih aw ei. Chihropazy ta âmo cha a bai aw ei ta, Zakaw pathlazy cha amâ pazao aw.

² Phopizy ta Izarei pathlazy cha a chhipa ta, ama y nawpa su tlôkhei aw ei ta, Izarei pathlazy ta âmo cha seichapawzy nata seichanôzy ta Abeipa râh liata ama hnei aw. Sei ta âmo a vaw patu tyhpazy kha, Izarei pathlazy ta sei ta patu aw ei ta, âmo a vaw tlybai tyhpazy chô liata ryu ama reih aw.

³ Chatawhcha hetana heta a vaw châ aw. Nama pachârôhna, namâ tymâna nata rai ru ngaitapa ama cha pahriasapa zy tawhta apahâna Abeipa ta a cha pie ti ei ta,

⁴ Babylaw bei hnohta hetana heta pasipasawhna bie nama rei thlu aw: “Tlybaituhpa cha a chalih ta, A nôchhiena a dia ha dia!

⁵ Abeipa ta moleipazy sômasi cha thlie ta, Ryureituhpazy ryureina chôchahrei a thlie haw.

⁶ Pathi iapa ta a chalih beih leipa ta phopizy tu ta, Taolana chhâ thai khao leipa ta ryureih ta, Râhzy chô liata hiehâhpa ta ryu a reihpa Chôchahrei cha a thlie haw.

⁷ Chavâta leilô zydua cha a pahâpa ta sidiapa ta y ta, Thaphapa ta hla ama sa.

⁸ Meisah nata Lebanaw sidy thozy ta Ama palôh châ eih ei ta, ‘Panawhpa ta na y rakha tawhta cha, Tho thlutuhpazy ta miah siehnao khao veih ei,’ ama tah.

⁹ Na tlô tita cha vaw dy awpa ta, Ry lâ Athihkhih ta a patohpatia ta; Châ naoh awpa ta, Lei beizy thlahpa zydua pahra ta, Râh to bei zydua cha, Ama beidyuchhai tawhta a pathyu ei.

¹⁰ Cha zydua chata na hnohta hetana heta ama tah aw: ‘Nâ chhao keimo hawhta chiehleipa vaw châ ha chi ta, Keimo hawhpa na vaw châ ha hra he zaw!’

¹¹ Nâ papiparysana kha Athihkhih lâ sie ha ta, Na totâ pyu chhao Athihkhih lâ a sie haw. A ry lâta na hmohphaw châta, Alôpazy phawpa châ ta; A chô lâta nâ bu awpa ta, Châkariepazy sopa a châ.

¹² “Hy Deiva Awhsi, My khihdei sawchapawpa, Avâ tawhta dia na za tla haw! Hy râhzy a panawhtuhpa, Alei taihta chhawh pathlapa ta dia na y haw!

¹³ Na palôh liata, ‘Avâ lâ kiah aw na ta, Khazohpa awhsizy chô lâ liata Vâ chô sâhpa liata ei beidyuchhai patyu aw na ta, Maw chhâna pakhypi tlâh liata ei tyuh aw.

¹⁴ Meihdozy hlâta a sâh viapa lâ kiah aw na ta, Chônôchaipa hawhta ei y aw,’ tah chi ta.

¹⁵ Châhrasala Athihkhih lâ a chhipa châ chi ta, Khaohtlô chhâna lâ a chhipa na châ haw.

¹⁶ Châ hmôpazy ta ama mo cha tawpâpa ta, Na thâtih patuapalua aw ei ta; ‘He chyhsa he alei chalyusa ta, Khinarâhzy chathosapa ta,

¹⁷ Khizaw he râhchawhpa hawhta tao ta, Khihpizy pahleipadia ta, A patâhpazy ama o lâ a padisa khoh leipa kha châ vei ma?’ Ama tah aw.

¹⁸ Râh to beizy cha rônahpa ta a zia ei ta, Âmo thlâ chyu liata amâ zia.

¹⁹ Nâ deikua cha tho chiah raohpa ama thypa hawhta, Na thlâ tawhta lâhlapi lâta thypa na châ. Zaozi ta a chô pahliepa athihpazy cha poh ta a bu chi ta, Alô khaohtlô liata thypa na châ; Athihpa rizy ta ama phei ta ama cha tlypâ.

²⁰ Na râh parao chi ta, Na phopi na thiepa vâ ei ta, Ama hry liata pabupa châ aw va chi. ‘Moleipazy chipathla cha, A moh reipa châ beih khao khah sy!

²¹ Âmo pathlatuhpa moleina vâta, A sawchapawzy thie nawpa su a chhuahdy teh u; Chataleipatala thyu aw ei ta, Khizaw he hnei aw ei ta, Alei chô he khihpizy ta ama pabie pathlei aw na.’”

²² “Thyuhnao aw ei na ta, Babylaw cha a moh phie aw na ta, A laibâhpazy ei chhawh pathlah khai aw; A chhôhchhi nata a chipathlazy Ei chhawh pathlah khai aw ei,” Pheisaihzy Abeipa ta a tah.

²³ “Babylaw cha sawku pahrâna ta tao aw na ta, Chiatlao lâta palie aw na ta, Paraona ophi ta ei phi pathlah ha aw,” Pheisaihzy Abeipa ta a tah.

Asuria kyh chhochhieliena

²⁴ Pheisaihzy Abeipa ta, “Ei pachhuahpanohpa hawh tlai ta vaw tlô aw ta, Ei chhuahpa hawhta a vaw tlô aw.

²⁵ Asuria cha ei râh lia tlai ta parao aw na ta, Ei tlâhzy liata phei ta ei tlypâ aw; A raopaky cha ei phopi tawhta pahluhpa châ aw ta, A phaohri ama ngiatlâh tawhta pachhôpa a châ aw,” Tahpa ta bie a taih ha ta.

²⁶ Cha cha leilô zydua châta pachhuahpa châ ta, Phopi zydua chô liata ku pazawhpa cha a châ.

²⁷ Pheisaihzy Abeipa ta a chhuah ha ta, Ahy a pakhâ thei aw? A ku pazawh ha ta, Ahy a ku a pathliahsa thei aw?

Philistinâ kyh chhochhieliena

²⁸ He he Bei Ahâza a thi kô ta chhochhieliena bie a vaw tlôpa a châ:

²⁹ Hy Philistinâ râh zydua saih u, Nâmo châ tupa chôchahrei a tlie hapa vâta a ly hlei khuh vy; Vâzi thari tawhta chyuphao vaw thao aw ta, A thei cha vâzi mei a zawtheipa a châ aw.

³⁰ Dyhchhie chaipazy chhao ta, Ama tlaih nawpa sibiepa su hnei aw ei ta; Dyhchhiepazy â bohpa ta amâ zia aw. Nâma thari deikua cha, Chakâhna ta thie aw na ta; Na chyhsa laibâhpazy cha, Chakâhna ta a thie khai aw ei.

³¹ Hy thokhy chhikao y, thata cha la, Hy khihpi y, awh teh; Hy Philistinâ râh zydua saih u, Nama zydua ta chipa ta zao khai teh u! Maw lâ tawhta meikhuh za pua ta, A pheisaih hry liata hnôh a khawpa rai y veih ei.

³² Râh vyuhpa lyuhchâpazy cha, Kheihta a chhy awpa ma a châ aw? “Abeipa ta Zaio padua ha ta, A phopi saw pasa a taopazy cha, Cha liata amâ chhai aw,” Tahpa ta a chhy awpa a châ.