ISAI 13 - Mara Bible RV (BSI)

Babylaw hriena

¹ He bie he Amôza sawchapawpa Isai ta Babylaw kyh liata aluahna a hmôpa a châ.

² “Tlâh padâ tawhta ngiana poh chaluahpa ta, A paropa ta Babylaw mo cha awsao u la, Beimachâ chhikaozy liata a ngia awpa ta, Nama ku thliethlâpa teh u.

³ Ei pathaisapazy cha keima tlai ta biepie ha ei na ta, Ei pasaipha, ei ly kawpa nata ei palaikhei kawpazy cha, Ei hiehâhna pi patloh nawpa ta ei aw ha ei.

⁴ “Tlâhpizy liata zawpi atymâna pyu cha nathlie u la, Zasâh manôh hluh ngaitapa pyu a lyupa cha nathlie tua u! Khinarâhzy palopasahpa pyu cha nathlie u la, Râhzy ahmaohpakhypa pyu cha nathlie tua u! Pheisaihzy Abeipa ta adyuhna châta Pheisaihzy a pahmaohpa pyu a châ chuh.

⁵ Abeipa nata a hiehâhna chariah chhaichhizy châ ei ta, Babylaw râh pôhpalôhpa parao awpa ta, Râh hlapi tawhta a vy ei ta, Avâ chy chhânazy tawhta amâ vy.

⁶ “A rôh teh u, Abeipa noh a hnia ha ta, Atotaotheipa ta a pahleipadia nawpa noh â hnia haw.

⁷ Chavâta ku zydua thazeipa ta y aw ta, Chyhsa to palôh a zao khai aw.

⁸ Chipa ta y aw ei ta, Pasana nata rietheitaona ta âmo cha a patu aw; Chanô saw a zeihpa hawhta, Pachârôh ngaitapa ta ama y aw. Thlazoh pachârôhpa ta a moh raihrie aw ei ta, Ama hmiazy meipaleih hawhta a saih aw.

⁹ “Moh teh u, Abeipa noh a vaw tlô hai, Ngiachhiena a hnei leipa noh châ ta, Pathiiana nata hiehâhna ru ngaitapa noh a châ. Râh cha roryhrapa ta paysa aw ta, A chhôh liata moleipazy a pahleipadia khai aw ei.

¹⁰ Vâ awhsizy ta ama khaihna papua leipa aw ei ta, Awhsi hlaozy ta ama khaihna papua aw veih ei; Noh a vaw chhipa nahta thlai pazohsapa châ aw ta, Thlâpâ chhao a khaihna papua khao aw vei.

¹¹ “Khizaw he a moleina vâta hrie aw na ta, Moleipazy cha ama paraona vâta ei hrie aw ei. Akhotlâhpazy apapiparysana pachhâsa aw na ta, Nôchhiepazy apalaina ei panawhsa aw.

¹² Chyhsazy cha ngôh suapa hlâta chakoh viapa ta tao aw ei na ta, Chyhsapa cha Ôphi ngôh hlâta chakoh viapa ta ei tao aw.

¹³ “Chavâta avâzy chalyusa aw na ta, Pheisaihzy Abeipa pathiiana noh liata, A hiehâhna ru ngaitapa vâta Alei he a yna tawhta chatho pathlahpa a châ aw.

¹⁴ Sakhih amâ chadaipa hawhta, Chyhsa to ama chiheihzy lâ a heih aw ei ta, Pahmaohtuhpa a hnei leipa mietaku hawhta, Chyhsa to ama râh chyu lâta amâ râpai aw.

¹⁵ Ama hmôpa maih a chôsaopa châ aw ei ta, Ama patupa maih zaozi ta ama pao aw.

¹⁶ Ama hawsaihzy taichheihpa châ aw ei ta, Ama mohmô lia tlai ta taichheihpa ama châ aw; Ama ozy hraopa châ aw ta, Ama lapinôzy patupakhipa ama châ aw.

¹⁷ “Pachâ teh u, âmo a dyuh awpa ta Media mo pathyu aw na ta, Cha phopi cha tâkâ pachâ leipa ei ta, Ngôh liata a ly hra veih ei.

¹⁸ Ama libawzy ta satliazy hriechheih aw ta, Chhi thei chô liata zawngiahna hnei leipa aw ei ta, Ama mo ta hawtizy ngiachhie hra aw vei.

¹⁹ “Khazohpa ta a parao ti ei ta cha, Khinarâhzy lôsôhpa Babylaw cha, Sawdawmâ nata Kawmawrâ hawh ta châ aw ta; Kaldia mo rônahna nata apalaina chhao, Sawdawmâ nata Kawmawrâ hawhta a châ aw.

²⁰ Khati ta hmahta, Cha liata chyhsa pahrâ khao leipa aw ei ta; Chhâ zydua ta, A chhôh liata chyhsa y khao aw veih ei. Arabia chyhsazy ta, Cha liata ama poh o parai khao leipa aw ei ta; Mietaku vaituhpa ta, Cha liata ama mietaku zawzy pabyusa khao aw veih ei.

²¹ Râhsazy ta cha liata tlao a byu aw ei ta, Ama ozy cha vakuzy ta a bie aw. Cha liata pavawpizy pahrâ aw ei ta, Sathawhzy châki ama zoh aw.

²² O sâhpazy liata changiezy pahrâ aw ei ta, Abei o ngiaryh chhihpazy liata savaizy ama pahrâ aw. Babylaw hriena daihti cha a hnia ha ta, A nohzy pasisapa châ aw vei.”