ISAI 11 - Mara Bible RV (BSI)

Zese chiah ryureina siapa

¹ Zese thabypa tawhta chhyh vaw thao aw ta, A tharizy tawhta a chiah a thaopa a pathei aw.

² Abeipa Thlahpa cha a chô liata a choh aw ta, Cha Thlahpa cha sona nata novâhna Thlahpa châ ta, Ryhraona nata thatlôna Thlahpa chhao châ ta, Abeipa pahnona nata china Thlahpa a châ.

³ Â lyna cha Abeipa china liata châ aw ta, A mo ta a hmôpa hawhta pachia leipa aw ta, A nah ta a theipa hawhta bietluna tao aw vei.

⁴ Dyhchhiepazy chô liata adona ta ryureih aw ta, Lei chyhsa nônaipazy châta a khongâh kawpa ta a pachia aw. A pakah chôchahrei ta nôchhiepazy tu aw ta, A hmao hu ta hmoparaopazy a thie aw.

⁵ Siana ta a chai a saih aw ta, Ngâchhihna ta a chai â saih aw.

⁶ Changie cha mietakutaw hnohta pahrâ aw ta, Keichhoh chhao mietaw hnohta â byu aw. Viahchaotaw nata chakeibarôhneipa ama lao bâ khoh aw ei ta, Viahchaotaw pathawhpa chhao ama hnohta a lao bâ aw ta, Hawti chyhpata ta âmo cha a chhihtha aw ei.

⁷ Viahchao nata chavyh ama lao bâ khoh aw ei ta, Ama tawzy hmaohkha ta amâ byu aw. Chakeibarôhneipa cha viahchao tôhpa hawhta Sâhkô a bâ aw.

⁸ Hawti sâhpi a pazypa cha, Chyuphao khaoh chô liata palao aw ta; Hawti sâhpi a pathleih hapa chhao, Vâzi khaoh liata a ku a chahraoh aw.

⁹ Ei tlâh pathaihpa liata cha, Apasasana rai y khao leipa aw ta, Aparaona chhao y khao aw vei. Tilaipi cha tizy ta a biepa hawhta, Leilô he Abeipa pahnona ta a bie khai aw.

¹⁰ Cha noh liata, Zese thari cha phopizy châta ngiana poh hawhta a duah aw ta, râhzy ta a thâtih patluah aw ei ta, â pahâna su cha a rônah ngaita aw.

¹¹ Cha noh liata, Abeipa ta a ei nona ta a ku pazawh heih aw ta, a phopi laibâhpazy cha Asuria, Izi, Pâtharô, Kusi, Elâmi, Sinâ nata Hâmathi râhzy tawhta nata tilaipi kiah râhzy tawhta â vaw chhipakhy heih aw ei.

¹² Râhzy lâta ngiana poh chaluahpa ta, Ama râh tawhta papuapa Izarei sawzy pahmaoh aw ta, Zudâh paipatlapazy cha, Alei ki palih tawhta a pakhy aw.

¹³ Epharai hiatliana lei aw ta, Zudâh a patypamâtuhpazy Chhawh pathlahpa ama châ aw. Epharai ta Zudâh chô liata a hiatlia khao leipa aw ta, Zudâh ta Epharai patypamâ khao aw vei.

¹⁴ Epharai nata Zudâh cha, Notla lâta Philistinâ mo ngiatlâh liata a zâ zaw aw ei ta; Hmaohkha ta nochhi sawzy ama hrao aw. Edômâ nata Môabâ chô liata ama ku hy aw ei ta, Amawri mo ta ama rei amâ ngiah aw.

¹⁵ Abeipa ta Izi Tilaipi paleih cha, Tlokhuh pahleipadia aw ta; Ufrâti Chavah chhao, A ku ta thlih lalôhpa a chatho thlu aw; Vahtie miasari ta pachhaihna taihta tu aw ta, Pheiky dâ leipa ta ama chaka aw.

¹⁶ Izi râh tawhta ama kaw pua nota, Izarei châta lâlai a ypa hawhna khata, A phopi laibâhpazy châta chhao, Asuria râh tawhta lâlai a y aw.