ISAI 10 - Mara Bible RV (BSI)

Tlybaituhpazy hupona

¹ Dâh hiehneipa a taotuhpazy nata Tlybaina bieraopa a papuatuhpazy cha, Ama hu a po na!

² Phahlapazy adona hny ei ta, Ei phopi dyhchhiepazy pikhei tovyuh ama chhu tyh. Nôhmeizy cha ama hraona sôh ta tao ei ta, Paw hnei leipazy chhao ama tai awpa sa ta ama tao tyh.

³ Lâhlapi tawhta chhiena vaw tlôna noh, Hriena noh liata khâpa ma nama tao aw? Baona hia awpa ta ahy lâ namâ râ aw? Khataih liata ma nama sôh nata thih nama siesai aw?

⁴ Atâhpazy hry liata a chakuhpazy tah leipa ta cha, Ahy hmahta pahlôhpa châ leipa aw ei ta, Thiepazy hry liata a paopazy tah leipa ta cha, Ahy hmahta pahlôhpa châ aw veih ei. Cha zydua cha a tao hapa chhao ta, A hiehâhna pai to leipa ta, A ku a hy ngâ thlâh ha chy.

 palaina vâta Asuria hriena

⁵ Asuria cha a hu a po na! Ano cha ei pathiiana sômasi châ ta, A ku liata ei hiehâhna chôchahrei a y.

⁶ Hraona sôh lapa ta, Ama hneipazy chhu ta, Khiliah chiatlao hawhta tlypâ awpa ta, Ano cha Khazohpa a pachâ leipa phopi lâ tuah na ta, Ei hie nâ pahâhpa phopi a dyuh awpa ta bie ei pie.

⁷ Châhrasala Asuria ta, Cha hawhta tao a chhuah leipa ta; A palôh ta pachâ hra vei. Pahleipadia khai awpa palôh tlao hnei ta, Phopi chyhta dei châ leipa ta, Phopi hluhpi pahleipadia awpa palôh a hnei.

⁸ Asuria ta, “Ei pheisaih hyutuhpa zydua cha, Abei sai châ veih ei ma?

⁹ Kânô khihpi kha Kâkhemi khihpi hawhta châ vei ma? Hâmathi khihpi kha Apâ khihpi hawhta châ vei ma? Samâri khihpi chhao kha Dâmaskâ khihpi hawhta châ vei ma?

¹⁰ Ei ku ta nothlahpa abeinarâhzy tlô ha ta, Zerusale liata nothlahpazy hlâta rônah via ei ta, Samâri liata nothlahpazy hlâta ama rônah via.

¹¹ Samâri nata a khazoh nothlahpazy chô liata ei taopa hawhta, Zerusale nata a khazoh nothlahpazy chô liata chhao, Tao hra aw va na ma?” tah ta.

¹² Chatawhcha hetana heta a vaw châ aw. Abeipa ta Zaio Tlâh nata Zeru­sale chô liata a raihria zydua a paloh tita, Asuria bei cha a palôh laina bie nata a mo â pasâhsana vâta a hrie aw.

¹³ Asuria bei ta, “Hezy he ei ku thatlôna ta tao na ta, Novâhna a hneipa ei châpa vâta, Ei sona ta ei taopa a châ. Phopizy râhrizy pasiepa ta, Ama ryusôhpazy hrao na ta; Beidyuchhai liata a tyuhpazy chhao, Viahchao tôhpa hawhta ei daophi pathlah ha ei.

¹⁴ Phopizy sôh nata thihzy cha, Pavaw bu lapa hawhta ei ku ta la ta; A panô thyusaipa pavaw tihzy lapa hawhta, Râh zydua ei la khai haw. Mathlaw a chakhyhpa y khao leipa ei ta, A pakah a âpa y khao hra leipa ei ta, A sâhpa chhao y khao veih ei,” tah ta.

¹⁵ Ahrei ta a hmâhtuhpa hmia liata â reithai aw ma? Thoâna ta a hmâhtuhpa â palai thlu aw ma? Sômasi ta a chabatuhpa chalo â chhuahpa lyu ta, Chôchahrei ta a chhytuhpa a chhy â chhuahpa a lyu.

¹⁶ Chavâta Pheisaihzy Abeipa Zehôvâh ta, Asuria bei pasaipha thatlôpazy chô liata chaohna hri a patlôsa aw; Â papiparysana ry liata mei patipa châ aw ta, Meipaleih ta a kâ khai aw.

¹⁷ Izarei khaihna cha mei châ aw ta, A Mo Pathaihpa cha mei palei a châ aw; Chatanachata a diahsai nata ahlohzy cha, Noh kha ta a kâ patlô khai aw.

¹⁸ A râhmâhpa rônahna nata a kôvei phana râh zy cha, Abeipa ta tlokhuh pahleipadia khai aw ta, Tlâhleipa panao ta a chhâ laihpa hawhta a châ aw.

¹⁹ A râhmâhpa liata tho a chyhta dei y bâ aw ta, Hawtipa hmahta a reih khai thei aw.

Izarei laibâhpazy ama vaw kua aw

²⁰ Cha noh liata, Izarei laibâhpazy nata Zakaw pathla a hrohpazy cha, âmo a thietuhpa liata a pahnieh khao leipa aw ei ta, Abeipa Izarei Mo Pathaihpa liata tlao a pahnieh aw ei ta, biehmeiseihpa liata amâ pahnie bâ aw.

²¹ Laibâhpazy vaw kua aw ei ta, Zakaw laibâhpazy cha Khazohpa thatlôpa lâ ama kua heih aw.

²² Hy Izarei, na phopi cha tilaipi sadi tlu ta hluh hra ei sala, laibâhpazy deita ama vaw kua aw. Raona bie papua hapa châ ta, adona a khô pathlah.

²³ Alei chô zydua liata raona a tlô awpa kyh bieraopa cha, Pheisaihzy Abeipa Zehôvâh ta a patlôsa hai.

²⁴ Chavâta Pheisaihzy Abeipa Zehôvâh ta hetana heta a tah: “Hy ei phopi, Zaio liata a pahrâpa y, Izi mo taozie hawhta, Asuria ta sômasi ta cha chheipa ta, a chôchahrei cha hy thlu hra sala, Asuria cha chi khah y.

²⁵ Bohpi leipa liata ei pathiiana pai aw ta, ei hiehâhna cha âmo pahleipadiana lâ â heih bâ aw.

²⁶ Ôrebâ lôpanô liata Midia a thie no hawhna khata, Pheisaihzy Abeipa ta Asuria cha chheina savo ri ta a chhei aw. Izi râh liata a chaluahpa hawhna khata, tilaipi chô liata a chôchahrei a chaluah aw.

²⁷ Cha noh liata, Asuria phaohri cha na ngiatlâh tawhta pachhôpa châ aw ta, a raopaky chhao na rao tawhta pahluhpa a châ aw. Na thawhpa vâta a raopaky cha na thlie pachhô aw.”

Asuria siehnaona

²⁸ Asuria cha Aithâ khih tlô ta, Mikarô khih sie pahliepa ta, Mikamâ khih liata a hmo soh ta;

²⁹ Lytlâh khôna su liata khô ei ta, Kebâ khih liata amâ rie. Râmâ khihsawzy a chalyu ei ta, Sawla Kibia mo amâ râpai haw.

³⁰ Hy Kâli zuah y, ao paro ngaitapa ta awh la, Hy Laisah khih y, na nah pachôh teh! Hy Anathô, ngiachhie nâ chhih kaw dia!

³¹ Mamenah khihsawzy a râpai ei ta, Kebi mo chhao abohna su lâ amâ râ haw.

³² Tanoh tlai he Nôbâ khih liata châh aw ta, Zaio sawchanô tlâh, Zerusale tlâh byuhpa lia tlai ta, A kutô a chalyu aw.

³³ Moh teh u, Pheisaihzy Abeipa Zehôvâh ta, Hmotaotheina rarôh y ngaitapa ta a chiahzy chhawh pathlah aw ta, Â sâh ngaitapazy cha thlupa châ aw ta, A seih patluapazy chhao pahnaipa a châ aw.

³⁴ Râhmâhpa tho chha kaluhpazy cha ahrei ta thlu aw ta, Lebanaw cha Bei Thatlôpa hmiakô liata a pao aw.