ISAI 1 - Mara Bible RV (BSI)

¹ He aluahna he Zudâh bei Uzia, Zôthâ, Ahâza nata Hezekia zy amâ bei nota, Amôza sawchapawpa Isai ta Zudâh nata Zerusale kyh liata a hmôpazy a châ.

Zudâh moleina

² Hy avâzy saih u, nathlie u la, Hy leilô, na nah pachô teh; Abeipa ta hetana heta a tah: “Sawzy a kuhkheipa ta palaiseihsa ei na ta, Châhrasala einâ chariah ha ei.

³ Viahchao tôhpa ta a hneituhpa pahno ta, Alâ ta a puhpa châki a pahno; Izarei deikua ta pahno leipa ta, Ei phopi ta a novâh vei.”

⁴ Âh, râh moleipa châ ei ta, Paraona a phaohpa phopi ama châ; Moleina hmo a taopa chipathla châ ei ta, Avyuhna a taopa sawzy ama châ. Abeipa siesaipa ta, Izarei Pathaihpa cha mohnao ei ta, Hnôh ama chhy haw.

⁵ Khazia hmo parao lymâpa ta, Tupa ta khâ nama y aw? Na luh zydua pasa ta, Na palôh tlokhuh a panao haw.

⁶ Pheipazah tawhta luh taih tlai ta, Pasa khai ha ta; Hmah nata thidôna nata hniahzy ta bie ta, Hniahzy cha pazâpa châ leipa ta, Chahrypa nata sathaw hniapa châ hra vei.

⁷ Nama râh roryhrapa ta y ta, Nama khihpizy mei ta kâ ta; Nama mohmô lia tlai ta, Chihropazy ta nama râh ama palâ khai haw. Chihropazy ta râh parao khai ha ei ta, Roryhrapa ta a y.

⁸ Kre sadô liata byureih hawhta, Zaio sawchanô cha siesaipa châ ta; Athei lyu liata chapu hawhta siesaipa ta a y; Khihpi dôh hapa hawhta a châ.

⁹ Pheisaihzy Abeipa ta Laibâhpa chyhta miah pahlôhpa vei mawh sala; Sawdawmâ hawhna khata châ aw pi ta, Kawmawrâ hawhna khata eima y aw.

¹⁰ “Nâmo, Sawdawmâ ryureituhpazy saih u, Abeipa bie thei u la, Nâmo, Kawmawrâ mo saih u, Eima Khazohpa pachuna bie lâ nama nah pachôh teh u!

¹¹ “Nama atheihna hluh ngaitapazy he, Ei châta khâpa a phahnai?” Abeipa ta a tah. “Mietaku tôhpa raopa hlânazy na ai ha ta, Sahroh pathawhpa thawzy eina ai haw; Viahchao tôhpazy thisaih liata a ly leipa na ta, Mietakutaw nata mie thisaihzy liata a ly hra va na.

¹² “Ei hmiakô liata a luah awpa ta namâ vy nota, Ei dôhpachhôh tlyhmia tlybai awpa ta, Ahy ma châ hnaw ei?

¹³ Hraoleipa atheihnazy vaw cheih khao khah u; Ropahâhpa chhao ei châta pasichhihpa a châ. Thla thiehpa nata Pahânoh nama chay tyhpazy Chhyh thai khao leipa na ta; Noh peimawhpazy nama chay tyhpa chhao, Chhyh thai khao va na; Moleina chhaota pakhypi pathaihpa nama hmâ tyhpazy chhao Chhyh thei khao va na.

¹⁴ Nama thla thiehpa kyhchhi ei hro ta a hao ta, Nama daihti eihpa kyhchhizy ei hro ta â hao; Ei châta phaohri deita châ ei ta, Phaoh thei khao va na.

¹⁵ Nama ku avâ lâ nama pazawh tita, Ei mo châ chahusai aw ei na ta; Ei hluhpi thlah nama chhâpa chhao ta, Nathlie aw va na; Nama kuzy thisaih ta bie tlôh ta.

¹⁶ Nama ngai a sipa ta a pathai u la, Hmo moleipa nama taopazy ei mohmô tawhta pahlei teh u; Hmo pha leipa tao khao leipa u la,

¹⁷ Hmo pha tao a chu teh u; Adona tlua u la, Tlybaina a dyuh teh u; Paw hnei leipazy chô liata adona patlôsa u la, Nôhmeizy reikhei teh u.

¹⁸ “A vy teh u, Pachâ khoh tua suh u,” Abeipa ta a tah. “Nama moleinazy cha, Saihlawpa hawhta saih hra sala, Dâhaw hawhta ngyuh aw ta; Saihdôhpa hawhta saih hra sala, Mietaku hmi hawhta a y aw.

¹⁹ A phapa nata reingiahpa ta nama y khiahta cha, Râh phana nie aw ei chi ta;

²⁰ Reingiah leipa ta einâ dyuh khiah ei chi ta deikua cha, Zaozi ta a cha nie aw ei, Abeipa pakah ta a reih haw,” tah ta.

Ngâchhih leipa khihpi

²¹ Kheihtazieta ma khihpi ngâchhihpa, Adona ta a bie tyhpa khihpi kha, Sihryhpa lâta a pua ha tly i? Ano liata siana pahrâ tyh ta, Tahmâ deikua cha, Lianycheihtuhpazy pahrâna a châ ha hih!

²² Na tâkâ cha thua saiiepa lâta a lie ta, Na kresawhti pha chaipa chhao ti pahlaopa a châ haw.

²³ Na beimachâzy cha chyhsa a chakhia thaipa châ ei ta, Parutuhpazy viasa ama châ. Chyhsa to ta panaopapana tlaichhai ei ta, Kuhriazy amâ chadai tyh. Paw hnei leipazy a duakhei leipa ei ta, Nôhmeizy aduakheina bie chhao ama hnohta tlô beih vei.

²⁴ Chavâta Abeipa, Pheisaihzy Abeipa, Izarei Thatlôpa ta hetana heta a tah: “Âh, ei chariahpazy papai aw na ta, Ei khakhaipazy chô liata phuh ei la aw.

²⁵ Na chô liata ei ku pathla aw na ta, Na saiiepa cha lôiah ta pasi aw na ta, Na thua chhiepa cha ei pathaisa aw.

²⁶ Hnôhlâ daihti hawhna khata, Na ryureituhpazy padua heih aw ei na ta; Âthaona daihti hawhna khata, Na ryhraotuhpazy ei padua heih aw ei. Cha khai tawhta cha, siana khihpi tahpa châ aw chi ta, Ngâchhihpa khihpi tahpa na châ aw.”

²⁷ Zaio cha adona ta chatlaipa châ aw ta, A tlâh chyhsa molei ropazy chhao, Siana ta chatlaipa ama châ aw.

²⁸ Hmoparaopazy nata moleipazy deikua cha, Hmaohkha ta pahleipadiapa châ aw ei ta, Abeipa a siesaipazy chhao ama leidia aw.

²⁹ Nama mopakiapa ôkâ thozy zakhei aw ei chi ta, Sadô namâ tlyhpazy vâta nohzaopa ta nama y aw.

³⁰ A hna a uah hapa ôkâ tho hawhta châ aw ei chi ta, Ti y leina sadô hawhta nama châ aw.

³¹ Thatlôpa cha meibu hawhta châ aw ta, A raihria meihlih hawhta a châ aw; A miano ta kâ khoh aw ta, A pachhai awpa y aw veih ei.