HÔSIA 9 - Mara Bible RV (BSI)

Izarei hriena phuah chaneina

¹ Hy Izarei, a ly leipa la, Phopi hropazy hawhta na thapha khah sy. Sihryhpa ta na Khazohpa a pheisai chi ta, Sawhrihmo to liata Âzuahnô ty na tlaichhai tyh.

² Sawhrihmo nata kresawhti saohnazy ta Âmo cha chyh leipa aw ta, Kresawhti thiehpa ta ama lôhrâ patlô aw vei.

³ Abeipa râh liata pahrâ thei aw veih ei; Epharai cha Izi râh lâ kua aw ta, Asuria râh liata pati pathaih leipa a nie aw.

⁴ Abeipa lâta kresawhti hlânazy patlai thei leipa aw ei ta, Amâ theihnazy ta a palôh patlâh aw vei; Amâ theihna viahchhâ cha âmo châta, Mâchhiesapazy viahchhâ hawhta châ aw ta, A niepa maih a papuapalei aw; Ama viahchhâ cha, Âmo nodi papaina châ deita a châ aw; Abeipa o lâ a vaw ngia aw vei.

⁵ Nama noh peimawhpa liata Khâpa nama tao aw? Abeipa kyhchhi noh cha, Kheihta ma nama hmâh aw?

⁶ Moh teh u, raona amâ râsaipa chhao ta, Izi ta âmo cha patupakhy aw ta, Mephi ta a pabu aw ei. Thlahbei ta ama tâkâ hmobaoh sôhpazy hnei aw ta, Ama poh ozy liata ahlohzy a y aw.

⁷ Hriena nohzy vaw tlô ha ta, Viarithôna nohzy a vaw tlô haw; Cha cha Izarei ta pahno mawh sy. Nama moleina hluh tupa nata namâ haona lai tupa vâta, Hrohsopa cha ahrupa châ ta, Thlahpa chyhsa cha angâpa a châ.

⁸ Hrohsopa cha ei Khazohpa châ ta, Epharai riahvaituhpa a châ; Châhrasala a lâpi zydua liata, Pavaw khoheih ta y khâh ta; A Khazohpa o liata, Ahaona ta a ykhâh.

⁹ Kibia liata ama y no hawhna khata, Avyuhna thata ama tao; Abeipa ta ama paraonazy a thei aw ta, Ama moleinazy vâta a hrie aw ei.

¹⁰ Râhchawhpa liata kre thei hawhta Izarei cha hmô na ta; Theiku a daih tuapa ei mopa hawhta, Châ pathlatuhpazy kha ei moh ei. Châhrasala Bâlâpeô ama vaw tlôpa nahta, Nozachhihpa hmo lâta thlai ama tlei haw; Chavâta ama tlaichhaipa hmozy hawhta, Âmo chhao pasichhihpa ama châ haw.

¹¹ Epharai rônahna cha, Pavaw hawhta â zaw syulyu ha aw; Saw sapa nata saw phaopa y khao leipa aw ta, Nawh â chohpa y khao aw vei.

¹² Saw amâ pyhpa chhao ta, Pakha hmah ama y khao leina taihta Mâchhie ei pasasa lymâ aw ei. Ei heihsai ti ei ta cha, Ama hu a po tlai aw.

¹³ Tyre hawhta Epharai chhao, Si panyupa su liata lopa a châpa ei hmô; Châhrasala Epharai cha, Thietuhpazy lâta a sawzy â chhi aw ei.

¹⁴ Hy Abeipa, âmo cha pie mah y, Khâpa na pie aw ei? Nawh raona chhi pie la, Sâhpi chawhpazy pie mah y.

¹⁵ Ama moleina zydua Kilkal liata y ta, Cha su liata ei hao tua ei. Moleina hmo ama taopa zydua vâta, Ei o tawhta papua aw ei na ta, Kyhpachâ khao aw veih ei na; Ama beimachâ zydua cha, Chhorupa sai ama châ.

¹⁶ Epharai cha tupa ta y ta, Ama thari a raoh haw; Pathei thei khao aw veih ei. Hawti ama hneipa chhao ta, Ama saw mopakiapazy ei thie lymâ aw.

¹⁷ A rei amâ ngia leipa vâta, Ei Khazohpa ta dytha aw ei ta, Phopizy hry liata viavipa ta ama y aw.