HÔSIA 8 - Mara Bible RV (BSI)

Izarei hriena

¹ Ei biehrai parao ei ta, Ei ryhpa amâ dyuhpa vâta, Abeipa o chô liata pahmôhpi hawhta, Na hmao liata chiahmie pataoh teh.

² Na awsao ei ta, “Eima Khazohpa, Izarei ta eima cha pahno,” tah ei ta.

³ Izarei cha phana a dytha hapa vâta, Chariahpa ta â chadai aw.

⁴ Beizy padua ei ta, Châhrasala keima raopa châ veih ei; Beimachâzy rao ei ta, Châhrasala pahno veih ei na. Ama tâkâ nata ngôh ta nothlahpazy tao ei ta, Âmosasyh ta amâ parao.

⁵ Hy Samâri, Na viahchaotaw nothlahpa kha ei dytha; Ama chô liata ei hie a hâh ngaita. Khachâ ma sia leipa ta ama y aw tly?

⁶ Viahchaotaw cha Izarei ta a taopa châ ta, Syudaihpazy ta ama daipa a châ; Khazohpa châ vei. Samâri viahchaotaw cha, Pakeichheih khaipa a châ aw.

⁷ Ziza chi tu ei ta, Khisô tlao ama hria aw. Sâh kô a suh leipa ta a duah ta, Viahdie papua aw vei. Sâh hria awpa a ypa chhao ta, Chihropazy ta ama nie aw.

⁸ Izarei cha ama palâ khai haw; Phopizy hry liata y ta, Hmobaoh hmâ tlâh leipa a châ bâ.

⁹ Epharai cha râh alâ ano dei ta a tlaihpa châ ta, Asuria lâ khy ei ta, Ama khopawzy ama kaw chalei.

¹⁰ Phopizy hry tawhta viasazy chalei hra ei sala, Thlai ei pahmaohpakhy aw ei. Bei laipa hnohta pie awpa râhpaw phaohri vâta, Bei nata beimachâzy riethei taopa ta ama y aw.

¹¹ Epharai cha moleina atheihna maisâh hluhpi tao ta, Châhrasala moleina taona maisâhzy lâta amâ lie haw.

¹² Ei ryhpa bie hluhpi ropa na ta, Ano eih hawhta pachâ vei.

¹³ Kei lâta atheihna ama hlâ tita, Atheihna sa hlâ ei ta, Cha cha ama nie tyh; Châhrasala Abeipa ta a pyh vei. Ama paraopazy Abeipa ta a thei thlah ha aw ta, Ama moleinazy vâta a hrie aw ei; Izi râh lâ amâ lie aw.

¹⁴ Izarei cha ano a taotuhpa my ta, Abei ozy tlao a sa; Zudâh ta thokhy ta dôhpa khihpizy A padua via lymâ. Châhrasala a khihpizy chô liata mei tuah aw na ta, Ama thokhyzy a kâ khai aw.