HÔSIA 7 - Mara Bible RV (BSI)

¹ Izarei cha patlâh ei chhuahna maihta, Epharai moleina a vaw lâ tyh ta, Samâri paraona â vaw luah ha chhyh. Âdoleipa ta hmo ama tao; Parutuhpa ta o liata hmozy paru ta, Hraotuhpazy ta khôtho liata ama hrao tyh.

² Ama moleina zydua ei pahno khaizie Ama palôh liata pachâ veih ei. Ama hmotaopazy ta âmo cha chadô ta, Ei hmia liata amâ lâ khai.

³ Ama moleina ta abei palysa ei ta, Ama haipa bie ta beimachâzy ama palysa.

⁴ Ama zydua ta apheipa châ ei ta, Lômathu sahpa ama lyu. Viahdie neihna daihti tawhta viahchhâ thyuna taihta, Viahchhâ taotuhpa ta tho a ti awpa a byuh khao leipa, Lômathu sahpa hawhta ama châ.

⁵ Eima bei kyhchhi noh liata, Beimachâzy kresawhti pari khai ha ei ta, Abei chhao chyhsa a pahneisaotuhpazy hry liata â hlao hra.

⁶ Lômathu hawhta ama pathi sah ta, Arulâta amâ byh; Azozâkhihdei ama pathi a pa-ih ta, My ta meipaleih hawhta a kaw ia.

⁷ Ama zydua ta lômathu hawhta sah ei ta, Ama ryureituhpazy ama palâ khai haw. Ama bei zydua pao khai ei ta, Ahy hmahta na pado veih ei.

⁸ Epharai cha phopi hropazy a pahlao ta, Epharai cha viahchhâ palie leipa a châ.

⁹ Chihropazy ta a thatlôna nie khai ei ta, Châhrasala a pahno vei; Sâ pawhpa thiapa châ ta, Châhrasala pahno vei.

¹⁰ Izarei apalaina ta ano cha hmiadaisâ ta leih ta, Chatanachôta Abeipa ama Khazohpa lâ kua leipa ei ta, Cha zydua vâta ano cha tlua hlei veih ei.

¹¹ Epharai cha vachhuh lyu ta, Dôvei nao ta, palôh hnei vei; A châh ta Izi awsao ei ta, A châh ta Asuria lâ ama sie.

¹² Sie hra ei sala, Ama chô lâta ei sao parai khâh aw ei na ta, Avâ pavawzy hawhta ei daophi aw ei; Ama zawpi ta bie ama theipa hawhta Ei chhorei aw ei.

¹³ Ama hu a po na, Eina tleisaipa vâ ei ta; Paraopa ama châ, Einâ dyuhpa vâ ei ta. Âmo chatlai awpa khoh na ta, Châhrasala haipa bie ta tlao eina tei ei.

¹⁴ Ama palôh hmeiseihpa ta na aw leipa ei ta, Ama rakhô liata tlâ ama awh; Sâh nata kresawhti vâta a pakhy ei ta, Kei deikua eina tleisai ha ei.

¹⁵ Kei ta pachu ei na ta, Ama bâh tha ei patlô; Chatanachôta chhiena ta eina tei ei.

¹⁶ Kua ei ta, Châhrasala chô lâ kua veih ei, Dôvei thaipa libaw hawhta ama châ; Ama paleih a khotlâh tuna vâta, Ama beimachâzy zaozi ta ama thi aw. Cha cha Izi râh liata Pahneisaopa ta ama y nawpa a châ.