HÔSIA 5 - Mara Bible RV (BSI)

Izarei nata Zudâh hriena

¹ Hy theihthaipazy saih u, He he thei teh u! Hy Izarei sawzy saih u, Nathlie teh u! Hy bei chhôhkhazy saih u, Nah pachôh teh u! Mizpâ châta khoheih châ ei chi ta, Tabaw liata sao nama paraipa vâta, Pachiana nama chô liata a vaw tlô.

² Dyuhtuhpazy ta chyhsa thata thie ei ta, Ama zydua ta ei chhorei aw ei.

³ Epharai cha pahno na ta, Izarei ta nâ nyusai thei vei. Hy Epharai, sihryh ha chi ta, Hy Izarei, na pualei haw.

⁴ Ama hmotaopazy ta Ama Khazohpa lâ kua heih awpa pakhâ ha ta, Sihryh khona ta ama palôh bie ta, Abeipa pahno veih ei.

⁵ Â palaina ta Izarei cha hmiadaisâ ta padei ta, A thaileichâna liata Izarei nata Epharai ama pao; Zudâh chhao ama hnohta a pao hra.

⁶ Ama mietaku zaw nata ama viahchao hrizy chhaota sie aw ei ta, Abeipa cha ama tlua aw; Châhrasala hmô aw veih ei, Âmo tawhta â chhei haw.

⁷ Abeipa châta ngâchhih leipa ei ta, Chihropa sawzy ama sa. Chavâta ama thla thieh chaypi ta Ama lyuzy chhaota a palâ khai aw ei.

⁸ Kibia liata saki tô teh u; Râmâ liata chiahmie tô u la, Bethave liata adyuhna pyu parosa teh u; Hy Benzami, eima cha pazi.

⁹ Hriena noh liata Epharai cha roryhrapa ta a y aw, Izarei chizy chô liata a tlô thlyu awpa ei phuah.

¹⁰ Zudâh chhituhpazy cha, Râhri a pasie thaipazy hawh châ ei ta; Ei pathiiana cha ama chô liata Ti hawhta ei lei thlu aw ei.

¹¹ Epharai cha hmo puapa tao awpa Khâchâ â chhuah hapa vâta, Tlybaipa ta y ta, Reikheituhpa hnei khao vei.

¹² Keima hmâchhâh he Epharai châta Chhoma-u hawhta châ na ta, Zudâh chhôhkha châta hmyna hawhta ei châ.

¹³ Epharai ta a pasana hmô ta, Zudâh ta a hmah a hmô nahta; Epharai cha Asuria lâ sie ta, Bei rônahpa lâ chyhsa a tuah. Châhrasala ano ta Cha patlâh thei leipa aw ei ta, Nama hmah paphasa thei aw vei.

¹⁴ Epharai châta chakeibarôhneipa hawhta châ aw na ta, Zudâh châta chakeibarôhneipa lochopa hawhta ei châ aw. Kei, keima tlai ta hriechheih aw ei na ta, Ei sie ha aw; Siekhei aw ei na ta, A pachha awpa y aw veih ei.

¹⁵ Ama thaileichâna a pahnopa ta, Ei hmia ama tlua hlâlei cha, Ei pahrâna su lâ ei kua chy aw; Chtanachata ama riethei pasataona vâta, Eina tlua hmeiseih bâ aw ei.