HÔSIA 4 - Mara Bible RV (BSI)

Abeipa ta Izarei â kho

¹ Hy Izarei sawzy saih u, Abeipa bie thei teh u; He râh liata a pahrâpazy Abeipa ta a cha leih ei: Ngâchhihna charei leipa ta, Ngiachhiena charei hra leipa ta, Râh liata Khazohpa pahnona y vei.

² Chhiesana nata haiphiana ta bie ta, Lianycheina nata paruna ta biepa ta, Apheina zy a pôh lymâ; Pakhâpa to parao khai ei ta, Thisaih lona â zao thlâh haw.

³ Chavâta râh cha mâchhiesa ta, A chhôh liata a pahrâpa to ama leidia; Râh sazy nata avâ pavawzy siekheipa châ ei ta, Tilaipi ngazy taihta ama siekhei.

⁴ Chatanachôta Hy theihthaipa, “Ahy hmahta miah dyuh leipa ei sala, Ahy hmahta miah leih khah sy,” na tah. Hy theihthaipa, Keima tlai ta ei châ dyuh hih.

⁵ Nohchhô sawhvaw ta pao aw chi ta, Zâ ta hrohsopa nata na pao khoh aw; Na nô cha ei pahleipadia aw.

⁶ Pahno leina vâta Ei phopi cha paraopa a châ; Pahnona na dythapa vâta, Ei theihthaipa na châna tawhta Ei cha dytha ha hra. Na Khazohpa ryhpa na mypa vâta, Kei chhao ta na sawzy ei my hra aw.

⁷ Ama pôh via nahta, Ei chô liata tlao molei via ei ta, Ama rônahna cha nozana ta ei tao aw.

⁸ Ei phopi moleina atheihna sa nie ei ta, Chavâta chyhsazy ta moleina hmo ama tao awpa Tlao ama khoh kaw tyh.

⁹ Zawpi nata theihthaipa amâ lyu khai; Ama hrozie vâta hrie aw ei na ta, Ama hmotaopazy viari ei thô aw ei.

¹⁰ Abeipa amâ heihsaipa vâta, Nie aw ei ta, Ama py bie aw vei; A patla aw ei ta, Pôh hlei aw veih ei.

¹¹ Sihryhna nata kresawhti a ly ei ta, Kresawhti thiehpazy amâ ly; Chazy chata ama pahnona a pahlei lymâ.

¹² Ei phopi ta ama tho nothlahpa a saohiah ei ta, Ama tho chôchahrei tawhta bietapazy ama dao. Sihryhna thlahpa ta lâpi paviasa ei ta, Ama Khazohpa amâ pheisai haw.

¹³ Tlâh lakizy liata atheihna hlâ ei ta, Tlâhthlôhzy liata raopa hlâna ama hlâ tyh; Ama buh nohdi a pha kawpa vâta, Ôkâ, pôpalâ nata terebi kôzy ry liata, Atheihnazy ama hlâ tyh. Chavâta nama sawchanôzy ta sihryh ei ta, Nama myuhnôzy ta amâ phei tyhpa a châ.

¹⁴ Chatahrasala, nama sawchanôzy cha, Ama sihryhna vâta hrie aw veih ei na; Nama myuhnôzy chhao, Amâ pheina vâta hrie aw veih ei na; Chapawzy ta sihryhnô cha a pheikhei ei ta, Âzuahnôzy nata atheihna ama hlâ khohpa tlao a châ. Pahnona a phahlapa phopi cha a leidia aw.

¹⁵ Hy Izarei, nâma a pheina vâta, Zudâh cha thailei châ khah sy. Kilkal lâ vawh leipa la, Bethave lâ chhao khy khah y; “Abeipa a hrohpa hawhta,” tahpa ta Bie a taih hra khah y.

¹⁶ Viahchao zeinô chhorupa hawhta, Izarei cha a chhoru kaw; Chavâta Abeipa ta ano cha, Sibiepa su kawhpa liata mietakutaw a pasapa hawhta, Tahmâ he a pasa khoh khao aw vâ ma?

¹⁷ Epharai cha nothlahpa nata a zao ha ta, Ano y ta y mawh sy.

¹⁸ A laothaopa ta doh ei ta, Â zaopa ta ama sihryh; Ryureituhpazy cheingei ta Nozachhihpa hmozy ama tao.

¹⁹ Chavâta thlih ta âmo cha a mathlaw liata chahry ha ta, Amâ theihnazy vâta nozapa ta ama y aw.