HÔSIA 3 - Mara Bible RV (BSI)

Hôsia ta a lapinô a chatlai

¹ Abeipa ta ei hnohta,“Izarei sawzy ta khazoh hropazy lâ tlei ei ta, amâ theihna hmohlâpa kresawhti nata kre chawhpa viahchhâzy ama tlaichhai kawna chô chhao ta Abeipa ta ama kyh a pachâpa hawhta, nâ chhao na lapinô cha a khopaw liata a châ pheisai hapa chhaota, vawh la, na kyhpachâna va palâsa heih teh,” tah ta.

² Chatanachata tâkâ sekel tlaw hrawh hleipangawh nata bâli sâh bai kha nata khophie a mâ châta pie na ta,

³ he hawhta zikyu ei râ, “Noh hluhpi nâma deita ta keima châta na y aw. Sihryh khao leipa aw chi ta, chapaw liata a phei khao aw va chi; kei chhao ta châ zialâh mâh khao aw va na.”

⁴ He he Izarei sawzy ta noh hluhpi bei tlyma, beisaw tlyma hnei leipa ta ama y awpa nata atheihna tlyma, panana tôh tlyma, ephaw nata terâfi zy hnei leipa ta ama y awpa pamosana a châ aw.

⁵ Cha khai tawhta, Izarei sawzy cha kua heih aw ei ta, Abeipa ama Khazohpa ama pado aw; ama bei Dâvi chhao ama pado hra aw. Noh hnôhlâzy liata cha china chôta Abeipa nata a phana lâ ama ngai aw.