HÔSIA 2 - Mara Bible RV (BSI)

Izarei ngâchhih leina nata hriena

¹ Nama unawhzy cha “Ei phopi” tah u la, nama sietanôzy cha “Ei kyhpachâpa” tah teh u!

² “Nama nô cha a haw u la, A haw chaimâh teh u; Ei lapinô châ leipa ta, A vahpa châ va na. A sihryhna cha a hmia tawhta thy sala, Â pheina cha a sâhpizy tawhta thy mawh sy!

³ Chataleipatala thluahruapa ta soh aw na ta, A pi noh hawhna khata ei tao pathlei aw na; Râh chawhpa ta tao aw na ta, Sadi su lâta paliepa ta, Dâhphina ta ei thie pathlei aw na.

⁴ A sawzy chhao sihryhna ta sapa ama châpa vâta, Zawh a ngiah aw veih ei na.

⁵ Ama nô ta sihryhpa ta y ta, Âmo a phaohtuhpa ta Nozana chhao pahno leipa ta, ‘Ei khopawzy ei chadai aw ei; Ei viahchhâ nata ei ti, Ei sahmi chysia nata pala rih dipa poh, Ei sathaw nata ei dopa Nâ pietuhpazy ei chadai aw ei,’ a tah.

⁶ Chavâta ahloh buhzy ta a lâpi pamaipa ta, Thokhy taokhâh aw na ta, A sie nawpa pahno aw vei.

⁷ A khopawzy cha chadai aw ta, Châhrasala pha aw vei; Tlua laih aw ta, Hmô aw vei. Cha tita, ‘Ei vahpa tuapa lâ ei kua aw, Kha daihti kha tahmâ tahpa hlâta Ei châta a pha via,’ a tah aw.

⁸ Sâh nata kresawhti ta vaohei na ta, Sathaw ta a vaoheituhpa kha, Keima tlai he ei châpa pahno vei. Bâlâ châta ama hmâpa tâkâ nata ngôh ta A tobituhpa chhao kha, Keima tlai he ei châpa pahno vei.

⁹ Chavâta sâh a hmoh tita, Ei sâh thiehpa cha ei la ha aw; Kre â daih tita, Ei kresawhti thiehpa ei la ha aw; Ei sahmi nata ei pala zy chhao, A la pakhua ha aw na ta, A thluahruana khu nawpa ta a hmâpazy tlai chhao, Ei la pakhua ha aw.

¹⁰ A khopawzy mohmô lia tlai ta, Thluahruapa ta soh aw na ta, Ahy ta hmah ei ku tawhta pachha thei aw vei.

¹¹ A kyhchhizy ei pachhâsa khai aw; A thla thieh chaypi nata a Pahânohzy pachhâsa aw na ta, Â lyna kyhchhi zydua ei pachhâsa khai aw.

¹² A kre zôhzy nata a theiku kôzy parao aw na ta, A khopaw tawhta a hmôpa, A hlao hawhta a pachâpazy ei parao khai aw. Lyurâhpa lâta palie aw ei na ta, Râhsazy ta ama bâ khai aw.

¹³ Bâlâzy â chhy tyhna nohzy vâta, Ano cha ei hrie aw. Bâlâzy lâta ropahâhpazy hlâ ta, Rahyzy nata lôsôhpazy ta a tobipa ta A khopawzy pazi ta, Kei deikua cha eina my haw,” Abeipa ta a tah.

Izarei chôta Abeipa zawngiahna

¹⁴ “Chavâta, pachâ teh, ano cha sydiepa ta, Râhchawhpa lâ a chhi aw na ta, Ao naipa ta ei chho heih aw.

¹⁵ Cha liata a kre sadôzy pie pakhua aw na ta, Akhaw Saikao cha, Hnabeiseihna ochhi ta ei tao aw. A thyutlia daihti hawhna khata, Na chyh-ei heih aw ta; Izi râh tawhta a kaw puana no hawhna khata, Eina chyh-ei heih aw.

¹⁶ “Cha noh liata cha, ‘Ei zibeipa’ na tah khao leipa aw chi ta, ‘Ei vahpa,’ ei na tah bâ aw chi,” Abeipa ta a tah.

¹⁷ “Bâlâ mohzy a pakah tawhta thy aw na ta, Ama mohzy reipa châ beih khao aw vei.

¹⁸ Cha noh liata, Râhsazy chô liata biehrai tao aw na ta, Vâ pavawzy chô liata biehrai ei tao aw; Alei liata âlyhpasazy chô liata chhao, Biehrai ei tao aw. Libaw nata zaozi nata adyuhna zy Râh tawhta pahlei khai aw na ta, Â bohpa ta ei paziasa aw ei.

¹⁹ “Chhâzaw châta châ pahawh aw na ta, Siana nata adona ta ei châ pahawh aw; Kyhpachâna ta châ pahawh aw na ta, Ngiachhiena ta ei châ pahawh aw.

²⁰ Ngâchhihna ta châ pahawh aw na ta, Abeipa cha na pahno aw.

²¹ “Cha noh liata, Ei cha chyh-ei aw; Avâ chyh-ei aw na ta, Avâ ta alei a chyh-ei aw,” Abeipa ta a tah.

²² “Alei ta sâh chyh-eipa ta, Kresawhti nata sathaw zy chyh-ei aw ta; Âmo ta Zezari ama chyh-ei aw.

²³ Cha chanô cha, Ei châta alei liata loh aw na ta, Lôruhâmâ cha ‘Ei kyhpachâpa’ ei tah aw; Lôami chhao ‘Ei phopi na châ’ tah aw na ta, Ano ta, ‘Ei Khazohpa na châ’ eina tah aw.”